Bispu Leandro : “Amu Du, Halo Buat Hotu Ho Domin, Nia Espíritu Horik Nafatin Iha Ita”.

SAPNewsTL, Dili : Durante preside misa ba Padre Domingos da Silva Soares “Maubere”, Bispu Diocese Baucau Dom Leandro Maria Alves konsidera Amu Du maka Padre ida ne’ebe hala’o ho domin, domin boot tebtebes ba sarani sira durante sei moris.

Ermelinda Soares & Dircia Belo – SAPNews

“Padre Domingos Maubere nia espíritu no naran sei horik nafatin iha ita, ita hotu kunhese se mak Amu Du, hahalok domin nian, nia halo buat hotu-hotu tanba nia hadomi Na’i Maromak”.

“Amu Domingos sempre hamanasa, nia hamanasa tanba domin no hadomi Na’i Maromak, nia domin boot tebtebes, iha lorosa’e nia sa’e foho no tun foho (Viqueque), kunhese husi Ossu to’o Uatukarba, Nia kaer buat hothotu ho domin, nia ema ida domin na’in”.

“Tebes duni, ohin ita la haree ona Amu Du ho fizikamente, ohin evanjellu, Jesus dehan “Imi keta laran resin,imi fiar iha Maromak no fiar mos iha ha’u”, Jesus husu ita atu haksolok iha realidade ida ne’e, labele laran taridu, tebes ita sente lakon, maibe ita reza atu nia bele hetan fatin diak iha na’i maromak nia sorin kuana”. Hateten Bispu Diocese Baucau Dom Leandro Maria Alves iha Igreza Sagrado Coração de Jesus (SACROJES) Becora,18/05/2025

Misa ne’ebe preside hosi Bispu Dioseze Baukau Dom Leandro Maria Alves ne’e hetan partisipasaun maksimu hosi sarani sira, padre, madres no leigu sira.

Biografia Pe. Domingos Maubere : “Moris Ho Dedikasaun, Mate Husik Hela Memória Valiozu & Lisaun Inesquecível”.

Padre Domingos da Silva Soares, moris iha Letefoho, Suco Ducurai iha loron 12 fulan Maio 1952, hosi aman Sr. Isaías José Soares no inan Senhora Tereza da Silva Soares.

Iha tinan 1956: Amu Domingos ho naran famozu Amu Maubere/Amu Du, simu batismu hosi Reverendu Pe. José Álvaro Nolasco Menezes Santimano e Monteiro iha Capela Fatubessi.

Iha tinan 1964: Amu Domingos simu primeiro comunhão iha Colégio de Infante de Sagres Maliana hosi Reverendu Pe. Manuel Silveira Luis.

Iha tinan 1960-1966: Tama Escola Primária Católica iha Missão Ermera no completa ninia escola iha Colégio de Infante de Sagres Maliana.

Iha tinan 1966: Tama Pré-Seminário São Francisco Xavier Dare no hahú ninia formação preparatório ba dalan Nailulik nian. Iha Tinan 1967: Simu sacramento Crisma hosi Dom José Joaquim Ribeiro.

Iha tinan 1967-1973: completa curso 2°ano no 7º ano a nivel secundario iha Seminário Menor de Nossa Senhora de Fátima Dare.

Iha fulan Outubro 1973: tama iha Seminário Conciliar São Pedro e São Paulo hahu ho ano Propedêutico. Iha tinan 1974-1978: halo curso Teologia iha Seminário São Pedro e São Paulo.

Iha 27 de Março tinan 1977: simu Ministério de Leitor hosi Dom Manuel Ferreira Cabral iha capela Seminário Conciliar-Braga. Iha 17 de Julho de 1977: simu ministério de Acólito hosi Dom Manuel Ferreira Cabral iha Seminário Conciliar-Braga.

Iha loron 12 de Março tinan 1978 simu ordenação diaconal hosi Dom Manuel Ferreira Cabral, Bispo Auxiliar Arquidiocese de Braga.

Iha loron 16 de Julho: Simu ordenação Presbiteral iha Capela Seminário Menor de Nossa Senhora Imaculada Conceição Braga, hosi Dom Eurico Dias Nogueira, Arcebispo Primaz de Braga.

Iha loron 19 de Maio de 1980: fila mai Timor ho colega Padre Domingos Alves. Iha loron 10 de Junho 1980: nomeado nu’udar Superior de Missão de Santa Terezinha- Ossu.

Iha tinan 1982: nomeado nu’udar Superior de Missão de Uatolari no Presidente da Comissão Diocesana Catequética. Iha tinan 1983: Nomeado nu’udar Director Instituto Pastoral de Dili.

Iha tinan 1988: muda hikas hosi Paroquia Ossu mai Dili. Iha loron 5 de Agosto de 1990: nomeado nu’udar Pároco Paroquia Suai.

Iha loron 16 fulan Julho de 1994: simu posse nu’udar Pároco da Paroquia de Nossa Senhora do Carmo Letefoho. Iha loron 1 fulan Julho de 1997: simu Prémio Pax Christi Internacional iha Londres, hosi Sua Eminência Cardeal Suennes da Bélgica.

Iha tinan 1997-1998: Amu Domingos hamutuk ho belun ou colega Dr. Filomen Jacob, hasoru malu ho líderes políticos sira iha rai liur organiza, oinsá forma plataforma unidade Nacional, hodi ikus mai harí CNRT iha nebé hakerek mos ninia Estatuto Magna Carta.

Iha dia 1 de Setembro tinan 2002: simu posse nu’udar Pároco da Paróquia de Nossa Senhora de Lourdes de Ermera.

Iha tinan 2018: simu posse nu’udar Pároco da Paroquia do Sagrado Coração de Jesus-Becora to’o Amu Domingos fila hikas ba Aman Maromak kadunan Santo.

Padre Domingos Maubere hakotu iis ho idade tinan 73 no halo tinan nu’udar nai-lulik durante tinan 48, iha loron 16 fulan Maiu 2025, iha iha Intensive Care Unit, Hospital Nacional Guido Valadares (ICU-HNGV) tanba sofre infesaun pulmonar.

Padre Domingos Maubere hala’o ona tratamentu ba nia saúde dala barak iha rai liur maibe doutor sira foti liman no la konsege salva nia vida tanba hetan ne’ebe todan.

Aleinde, Padre Domingos Maubere hala’o knaar vokasaun nu’udar Amu Lulik, maibe iha tempu funu laran, Maktoban mos halo komunikasaun no ajuda guerileiru sira hodi salva no proteje timoroan sira.

Iha loron 20 Abril 1991, Amu Domingos hala’o primeiru enkontru ho Komandante Em-Xefe das Falintil Kay Rala Xanana Gusmão iha Mirtutu, Hatulia, Ermera.

Iha enkontru ne’e toka kona-ba Reforsa Rejistensia Klandestina no Dsikute Futuru Transformasaun Movimentu Rezistensia CNRM ba CNRT.

Iha tempu ukun rasik an, Saudozu Padre Domingos mós sempre ko’alia, halo krítika, hafanun, no defende liberdade, direitos humanos, democracia, desenvolvimento sustentável, defende ema kiik no kiak sira hodi livre hosi exploração, exploitasaun, discriminação, injustiça social, desigualdade, korupsaun, koluzaun, nepotizmu no violasaun direitos humanos.

Ita hotu reza ba Amu Domingos Maubere nia klamar atu hetan ksolok rohan laek iha Aman Maromak nia kadunan Santu.

Padre Domingos da Silva Soares Maubere, ba hamutuk ho Maromak, la’o ho Maromak no hela hamutuk ho Maromak hodi hetan naroman Maromak, damen no ksolok rohan laek iha nia lalehan leten aas ba.

Adeus……. Adeus no Adeus.

Obrigadu barak ba dedikasaun tomak

Boa viagem, deskansa ho damen no até um dia.