Bispu Leandro Konsidera Ema Ne’ebe Halo Orasaun Ne’e Saudades Maromak
SAPNewsTL, Lautem: Iha Parokia São Paulo Lospalos iha missa solenidade ba festa São João Bosco Bispo Dioseze Baucau hateten nu’udar sarani di’ak importante mak halo orasaun, ema ne’ebe halo orasaun hatudu katak nia iha saudades ba maromak.
Iha homilia Bispo Dioseze Baucau Dom Leandro Maria Alves hateten sai sarani di’ak importante iha orasaun, ema ne’ebe halo orasaun ne’e dehan katak ema ne’e iha saudades ba maromak.
“São Paulo hanorin ita atu hatene hamulak hanesan sarani diak, orasaun ne’e importante tebes, ema ne’ebe halo orasaun hatudu katak nia iha saudades ba maromak”. Tuir Bispo Dom Leandro Maria Alves iha igreja São Paulo Lospalos, Kuarta-Feira, 31/01/2023
Bispo Dioseze Baucau ne’e hatutan ema ne’ebe halo orasaun ne’e hatudu katak ema ne’e atu moris hamutuk ho maromak katak atu sai santidade.
“Ne’e duni wainhira ita reza, ida ne’e hatudu katak atu moris hamutuk ho Na’i maromak, wainhira ita moris liu ho Na’i maromak ida ne’e mak hatudu dehan ita moris iha santidade ita ema santu ne’e”. Bispo Leandro informa
Dom Leandro akresenta liu husi orasaun sira ne’ebe halo maromak horik iha ema ida-idak nia an no horik hamutuk ho sira.
“Santu tanba Na’i maromak ida santu ne’e mai horik iha ita nia le’et, mai horik iha ita nia an liu husi ita nia orasaun sira ne’ebe mak ita halo”. Tenik Dom Leandro
Iha sorin seluk Bispo Baucau ne’e mos husu sarani sira atu tuir missa kompletu labele tarde iha missa sira.
“Hanesan sarani di’ak mos wainhira partisipa iha missa sira, missa dader loron-loron ninian ka missa domingu sira, ita buka atu mai labele tarde wainhira mai tarde karik lalika ba komuñaun tanba tuir missa la kompletu”. Dom Leandro tatoli
Aman ba Dioseze Baucau ne’e informa”Missa kompletu ne’e mak hahú kedas wainhira Na’i lulik sira halo prosesaun tama ida ne’e mak dehan missa ne’e hahú husi ne’eba, labele ema lee leitura ona hafoin to’o kumunaun ba komunga deit ne’e labele ne’e santa kreda nia ukun fuan hanorin ita hanesan ne’e”. Nia afirma
Jornalista: Luis Pailofo