Kuda Domin ! Bispu Leandro : Wainhira Hahalok Ladi’ak, Ema Sei La Hakbesik Ita

SAPNewsTL, Lautem: Iha missa solenidade festa São João Bosco iha Parokia São Paulo Lospalos Bispo Dom Leandro Maria Alves hateten maromak nia illas rasik mak oinsa haree malu diak, la kria violensia iha komunidade no sai ema ne’ebe domin nain.

Bispo Dioseze Baucau Dom Leandro Maria Alves haktuir moris nu’udar imajem maromak nian buka atu haree malu di’ak no haksolok nafatin tuir maromak nia hakarak.

“Ita nia moris, ita hanesan kriatura imajen maromak ninian ne’e duni buka atu haksolok tuir illas maromak ninian, maromak nia illas ne’e mak domin, maromak nia illas rasik ne’e mak atu oinsa halo ita sira ne’e haree malu di’ak”. Bispo Dioseze Baucau Dom Leandro Maria Alves informa liu husi nia homilia iha missa solenidade Festa São João Bosco iha igreja São Paulo Lospalos, 31/01/2024

Dom Leandro hatutan hanesan illas maromak nian buka haksolok nafatin ho ema hotu-hotu labele sai ema ne’ebe violentu maibe sai ema domin nain iha sosiedade.

“Labele kria violensia iha ita nia komunidade, buka hases violensia husi ita nia an, ita labele sai ema violentu maibe buka sai ema domin nain ema paz nain, wainhira ita sai ema domin nain no ema paz nain ida ne’e mak exprime liafuan ne’ebe mak Sao Paulo dehan haksolok nafatin tuir Na’i maromak nia hakarak”. Tenik Bispo Leandro

Bispo Dom Leandro akresenta “Na’i maromak nia hakarak ne’e mak atu ita moris fo diak ba malu, hahalok hadomi malu ne’e mak importante”.Dom Leandro afirma

Aman Dioseze Baucau ne’e salienta hahalok satanas ka diabu nian ne’e mak hafahe no ida kria problema ne’e tanba ne’e buka hakoak ema hotu-hotu iha moris loron-loron nian.

“Ida ne’e mak hahalok diabu nian, wainhira ita sente katak ema la hakbesik ita tanba ita nia hahalok ladun diak ne’e hatene katak diabu mak iha ita nia laran, ba konfesa para atu sai ema ne’ebe mak simu ema hotu-hotu hakoak ema hotu-hotu iha ita nia moris”. Nia fundamenta

Jornalista: Luis Pailofo