Blokeia Servisu Reitoria, La Rezolve ! João Deklara Buka Reitor UNTL Alternativu
Imajem : Senadu Jeral UNTL Cejar João iha Kampus Sentral UNTL, 10/12/2024
SAPNewsTL, Dili : Estudante Universidade Nasionál Timor Lorosa’e (UNTL) halo asaun bloekia servisu gabinete reitoria, Senadu Jeral UNTL Cejar João deklara sei buka reitor alternativu wainhira ezekutivu lakohi rona estudante sira nia preokupasaun.
Durante hala’o asaun pasífiku iha resintu UNTL, Senadu Jeral UNTL hateten kestaun kaixa UNTL, osan edifisiu, sala de aula, projetor laiha, problema korupsaun no nepotizmu iha UNTL.
“Ami halo denúnsia públika dala rua, halo karta ba magnífiku reitor kona ba relatóriu kaixa, problema infraestrutura hanesan kadeira la to’o, kuadru aat, projetor laiha, ventunha laiha, halo korupsaun”. Tenik Senadu Jeral UNTL Cejar João ba SAPNews iha Kampus Sentral UNTL, 10/12/2024.
Senadu Jeral João hatutan wainhira Magnífiku Reitor UNTL la rezolve Problema hirak no apresenta relatóriu kaixa UNTL no responde preokupasaun estudante sira nian mak sira sei apresenta reitor alternativa foun hodi rezolve problema UNTL.
“Se la rezolve ami sei nafatin blokeia ninia odamatan, hein nafatin iha ne’e to’o hetan solusaun, la apresenta relatóriu ba reprentante estudante iha konsellu jeral, se la rezolve mak ami sei apresenta reitor alternativa hodi rezolve problema UNTL”. Nia deklara
Imajem : Karta Sirkular Hosi Reitor UNTL João Soares Martins. Dili, 09/12/2024
Ligadu ho karta sirkular ne’ebé Reitor UNTL João Soares Martins kona ba la autoriza estudante hodi halo asaun pasífiku no perturba prosesu ensinu iha UNTL, maske nune’e maibé Cejar João afirma nia parte prontu simu nia konsekuénsia wainhira mosu buat ruma.
“Kona ba karta sirkular ne’e reitor la kompreende karta ne’e, ami halo tanba ne’e hakerek klaru iha kódigu konduta UNTL, ami sei kontinua halo to’o hetan solusaun”. Nia afirma
Tuir observasaun jornalista SAPNews iha terenu nota katak estudante sira blokeia odamatan boot gabinete reitoria hodi halo asaun pasífika, apresenta poezia, dahur no hakilar iha resintu kampus UNTL.
Maske nune’e, maibé prosesu ensinu aprendijajem iha aula balun kontinua la’o normal tanba iha ona faze ezame média no ezame final.
Molok notísia ne’e publika, SAPNews tenta atu halo komfirmasaun ho Magnífiku Reitor João Soares Martins kona ba preokupasaun ne’ebé estudante sira apresenta maibé nia laiha servisu fatin.
https://www.facebook.com/SAPNewsTimorLeste/videos/1040661337750082/?app=fbl
Jornalista : Ermelinda Soares