CDTL Sei Realiza Simpoziu Nasional Desportu 2022

SAPNewsTL, Dili – Konfederasaun Desportu Timor-Leste (CDTL sigla portuges) sei realiza simpoziu nasional desportu 2022 ba federasaun desportivu Timor-Leste iha loron 18 fulan novembru 2022, objetivu husi eventu ne’e atu hatene obstakulu husi federasaun desportivu sira ne’ebe durante ne’e tuir ona kompetensaun internasional sira iha rai liur.

“Ohin ami hakarak hato’o ba publiku katak ami sei realiza simpoziu nasional desportu 2022 ba federasaun desportivu sira iha Timor-Leste ho tema desportu pasadu, agora no futuru, eventu ne’e sei realiza iha loron 18 fulan Novembru 2022 iha Timor Plaza ne’ebe ami mos sei bolu orador importante mak hanesan eis primeiru ministru Mari Alkatiri ne’ebe sei hamutuk orador nain haat ne’ebe sei lori materia ketak-ketak ba ita nia federasaun desportivu sira”, dehan Vise Prezidente CDTL Zeferino Tilman ba jornalista sira iha edifisiu CDTL Caicoli, Dili kuarta (16/11).

Nia hatutan, Depois simpoziu ne’e remata konfederasaun sei foti konkluzaun ne’ebe nu’udar rekomendasaun ba membru governu ne’ebe tutela ba area desportu no partidu politiku sira ne’ebe sei kompete iha eleisaun parlamentar 2023

Nia informa, objetivu husi simpoziu ne’e mak atu hatene obstakulu husi federasaun desportivu sira ne’ebe durante ne’e tuir ona kompetensaun internasional sira iha rai liur no partisipante husi simpoziu ne’e mak SEJD no reprezentante embaixada sira iha Timor-Leste ne’ebe haree ba desportu

“Objetivu husi simpoziu ne’e ita atu haree obstakulu ne’ebe durante ita nia federasaun desportivu sira hetan ona bainhira ba tuir kompetisaun internasional sira iha rai liur no partisipante sira ne’ebe sei partisipa hamutuk ho prezidente no sekretariu jeral federasaun desportivu sira iha Timor-Leste mak SEJD no reprezentante embaixada sira ne’ebe haree ba area desportu iha Timor-Leste”, tenik Zeferino

Reportajen: Augusto dos Santos