CEO HWPL Konsidera Damen & Domin Mak Bele Halo Mundu Sai Ida De’it

SAPNewsTL, Korea do Sul : Kultura Lalehan, Dame Mundiál, Restaurasaun Naroman (HWPL sigla inglés) selebra aniversáriu Simeira Mundiál  Pás nian  ba dala 10 iha Korea Sul. CEO HWPL Chairman Lee hateten damen no domin mak save ida ne’ebé bele halo mundu sai ida deit.

Selebrasaun ne’ebé hala’o iha Korea do Sul ho tema ‘Kria Komunidade Dame Mundiál Liuhosi Kolaborasaun Rejionál’, eventu ida-ne’e komemora hosi líder globál sira no sidadaun sira-nia kompromisu ba dame ne’ebé dura durante dékada ida no tau matan ba estratéjia sira iha futuru hodi promove armonia globál.

Chief Ezecutive Officer HWPL, Chairman Lee hateten objetivu husi aniversáriu ne’e maka atu haree fila fali realizasaun sira dezde 2014 no diskute planu sira ba futuru.

“Sesaun oioin hala’o hela iha nasaun ida-idak (nasaun 122 iha mundu) iha nivel oioin hodi halibur talentu rejionál sira no estabelese rede sira ne’ebé esensiál ba estratéjia dame nian ne’ebé bele adapta, hametin rede rejionál sira hodi hasoru ameasa lokál sira no aproveita kapasidade koletiva sira”. Tenik CEO HWPL Chairman Lee iha Seul, Korea do Sul, 18/09/2024.

CEO HWPL Chairman Lee sublinha divizaun relijiaun nian kauza lakon vida ne’ebé maka’as tanba ne’e presiza halo diálogu hodi kria pás iha mundu ba futuru.

“Ita tenke serbisu hamutuk hodi kria mundu ida damen no husik hela hanesan legadu ida ba jerasaun sira iha futuru, ida-ne’e atu kumpre ami nia misaun nu’udar naroman ne’ebé lori moris ba aldeia globál. Só liuhosi domin no dame maka mundu bele sai ida de’it “. Hateten Chairman Lee

HWPL forma parseria ida ho organizasaun intergovernamentál Grupu 7+(G7+) no organizasaun fórum polítiku nivel aas Parlamentu Amérika Latina (Parlatino) hodi dezenvolve inisiativa dame nian.

G7+ hari’i atu halibur nasaun sira ne’ebé afetadu hosi konflitu liuhosi vizaun ida kona-ba dame, estabilidade, no dezenvolvimentu ho Estadu-membru ruanulu resin(20 itál).

Parlatino hari’i atu promove dezenvolvimentu no integrasaun iha kuadru demokrasia tomak ho Estadu-membru hamutuk ruanulu resin-tolu (23).

Chairman Lee informa, antes ne’e asina ona projetu dame ida iha Timor-Leste ne’ebé aprezenta ona husi Ministru Ensinu Superior, Siensia no Kultura, Dr. Jose Honorio da Costa Pereira Jeronimo.

“Ministériu Ensinu Superior, Siensia no Kultura hamutuk ho instituisaun ensinu superiór ualu halo parseria ho HWPL hodi introdús edukasaun dame iha rai-laran”.

Chairman hatutan, “Ha’u fiar katak edukasaun dame nian sei hala’o papél krusiál ida, la’ós de’it hanesan matéria simples ida, maibé hodi ajuda estudante sira sai sidadaun globál iha futuru no hodi hari’i fundasaun ba dame no estabilidade iha sosiedade tomak.“ nia espresa.

CEO HWPL ne’e hateten, Kriasaun dame ba mundu importante tebes no presiza ema hotu hodi kontribui ba pás global desde 2014.

“Buat ida ne’ebé inkrível no impresionante, prova katak fiar iha dame globál ne’ebé hahú iha tinan 2014. Iha momentu ne’ebá maka ha’u sente duni katak ita hotu ida de’it no la haree ba ita-nia diferensa sira ne’ebé ita haree. Ita hotu hamutuk iha iis ida de’it iha servisu ba vizaun boot liu maka dame globál.”

Kultura Lalehan, Dame Mundiál, Restaurasaun Naroman (HWPL) maka ONG internasionál ida ne’ebé afiliadu ho UN ECOSOC.Tinan ne’e, Kultura Lalehan, Dame Mundiál, Restaurasaun Naroman (HWPL) selebra aniversáriu ba dala X (10⁰).

Ohin loron Liuhusi tinan 10 kooperasaun internasionál ba pás, HWPL rejista ona membru hamutuk 500,000 iha nasaun 170 no hala’o hela projetu dame liuhosi MOU ho organizasaun 1,014 iha nasaun 105.

Enkuantu, Organizasaun internasionál ne’e asina ona Memoradum of Understanding ida ho orgaun komunikasaun sosial 5 iha Timor-Leste hanesan Média Hatutan, LABEH, SAPNewsTL, Rádiu Liberdade, no Rádiu Comunidade Comoru.

Jornalista : Dircia Baptista Belo