Dalan Ba ASEAN ! Vietnam & TL Selebra Akordu Izensaun Vistu Passaporte
Imajem : Timor-Leste no Repúblika Sosialista Vietnam asina tan akordu izensaun vistu ba pasaporte servisu no diplomátiku, Salaun Prezidensial Hanoi-Vietnam,01/08/2024. Foto : Media MNEK
SAPNewsTL, Díli – Timor-Leste no Repúblika Sosialista Vietnam asina tan akordu izensaun vistu ba pasaporte servisu no diplomátiku, akordu ne’e nu’udár prinsípiu adezaun Timor-Leste nian ba organizasaun rejionál Association of Southeast Asian Nation (ASEAN).
Ministru Negósiu Estranjeiru no Kooperasaun, Bendito Freitas haktuir, Timor-Leste ho Vietnam selebra ona akordu kona-ba izensaun vistu ba pasaporte servisu no diplomátiku, tanba konsidera akordu refere nu’udár prinsípiu adezaun Timor-Leste nian ba ASEAN.
“Iha prosesu enkontru ne’e mós termina ho asinatura akordu ida kona-ba izensaun vistu ba pasaporte servisu no pasaporte diplomatku, ne’e hanesan prinsípiu ida-ne’ebé Timor-Leste nia adezaun ba ASEAN, País ASEAN sira ita iha konkordánsia ba akordu izensaun vistu ba pasaportes servisu no diplomátiku, au-mezmu tempu sei trata ba izensaun ba pasaporte ordináriu, ita espera katak, kooperasaun bilateral entre Timor-Leste ho Vietnam, bele forte liután,” haktuir Bendito dos Santos Freitas, SAPNewsTL asesu liu husi Gabinete Média MNEK, Sesta (02/08/2024).
MNEK Bendito Freitas akresenta, enkontru ne’e destaka mós kona-bá mekanizmu valores no prinsípiu kooperasaun ida-ne’ebé mak Vietnam bele tulun Timor-Leste nia adezaun ba ASEAN.
Vietnam mos apresia Timor-Leste nia susesu lubuk ida-ne’ebé alkansa hodi bele sai membru plenu ba ASEAN inklui Organizasaun Mundiál Komérsiu (OMK).
“Importante liu mós ohin ita-nia Prezidente Repúblika mós husu atu Vietnam estabelese ona embaixada iha Timor-Leste, tanba ita tau ona ita-nia embaixada iha paízes ASEAN hotu, agora Vietnam mós tau nia embaixada iha Timor-Leste di’ak teb-tebes, neste momentu Embaixadór Vietnam ne’ebé kobre ba Timor-Leste ne’e nia rezidente iha Jakarta,” Bendito dos Santos Freitas informa.
Akordu ba izensaun vistu ba pasaporte servisu no diplomátiku entre Ministru Negósiu Estranjeiru no Kooperasaun, Bendito dos Santos Freitas ho Vise Ministru Negósiu Estranjeiru Vietname, Do Hung Viet, ne’e hetan sasin husi Prezidente Repúblika, José Ramos-Horta ho nia omólogu Prezidente Repúblika Sosialista Vietnam, To Lam.
Jornalista : João Marito