Dalan Ba Kualidade Ensinu, Governu Aprova Projetu-Lei Husi MEJD

SAPNewsTL, DILI- Liu husi reuniaun konsellu ministru, governu aprova projetu dekretu-lei n.23/2010,loron 9 fulan dezembru, kona-ba Estatutu Karreira Edukadór sira ba Infánsia no ba Profesór Ensinu Báziku no Sekundáriu,ida ne’ebe aprezenta husi Ministru Edukasaun Juventude no Desportu,(MEJD)Armindo Maia.

“Alterasaun ida-ne’e hakarak atu atualiza Estatutu Karreira Dosente hodi akomoda evolusaun no dezafiu sistema edukativu daudaun ne’e nian iha Timor-Leste, atu fó kontinuidade ba dezenvolvimentu rekursu umanus nasionál, hodi promove kualifikasaun profesór sira nian no atu asegura katak hirak ne’e tenke koloka tuir nesesidade reál país nian”Dehan Presidensia Konsellu Ministru Fidelis Leite Magalhaes, ba Jornalista sira iha palasiu Governu, kuarta-feira(08/03/2023)

Nia haktuir katak sistema edukasaun ensinu tenke hametin mekanizmu formasaun no avaliasaun hodi garante kualidade edukasaun ne’ebe mak diak

“Hakarak atu hametin valorizasaun karreira liuhusi sistema regulár sira atu halo verifikasaun ba kompeténsia sira no prevee mekanizmu formasaun no avaliasaun dezempeñu nian ne’ebé bele garante kualidade sistema edukasaun no ensinu nian”Tenik nia

Governante informa katak dekreitu lei refere sei iha sistema rekrutamentu ba dosente foun liu husi kriasaun bolsa kandidatura ho objetivu atu garante kualidade ensinu no profesor sira nian

“Aleinde ne’e, Dekretu-Lei ida-ne’e determina estabelesimentu sistema rekrutamentu ida ba dosente foun sira liuhusi kriasaun Bolsa Kandidatura sira nian no kria rejime espesiál ida ingresu nian ba profisionál sira edukasaun nian ne’ebé dedika an ba ensinu no ne’ebé hetan ona abilitasaun mínima ne’ebé lei haruka hodi bele tama ba karreira.ninia objetivu mak atu garante kualidade ensinu no profesór sira nian, hodi promove meiu sira atu halo selesaun, verifikasaun no kolokasaun husi rekursu sira, bazeia ba méritu no profisionalizmu, no ho adaptasaun ba nesesidade nasionál sira”Nia esplika

Nia salienta katak pessoal kontratadu ne’ebe ezerse nu’udar dosente iha durante tinan 2023 maibe menus abilitasaun akademika sira iha oportunidade hodi hili sira nia futuru liu husi dedikasaun ba sistema edukasaun
“Ba indivíduu kontratadu sira ne’ebé mak ezerse hela funsaun dosente durante tinan 2023 maibé laiha abilitasaun akadémika mínima ne’ebé presiza atu sai dosente, sei garante oportunidade atu hili kona-ba sira nia futuru, hanesan rekoñesimentu ba sira nia dedikasaun ba sistema edukasaun nasionál nian”Haktuir nia

Governante ne’e esplika, sira bele hili entre kontratu provimentu ba tempu indeterminadu atu ezerse funsaun administrativa ka funsaun apoiu ba dosénsia, ho remunerasaun ekivalente ba Grau D, eskalaun dahuluk, husi rejime jerál administrasaun públika nian, ka indemnizasaun ida hanesan kompensasaun ba dedikasaun tempu servisu nian, ho valór saláriu ida ba tinan tolu ida-idak iha ne’ebé nia ezerse funsaun sira, tuir períodu kontratasaun ne’ebé rejista ona iha SIGAP

Jornalista : Marcela Mery da Costa