Departamentu Engenharia Sivil, UNTL Prontu Kompete Iha Avaliasaun Internasionál
SAPNewsTL, Dili : Departamentu Engenharia Sivil, Fakuldade Engenharia Ciénsia no Teknolojia, Universidade Nasionál Timor Lorosa’e (FEST-UNTL) realiza semináriu sientífiku kona ba importansia husi engeneiru ba dezenvolvimentu infraestrutura iha futuru.
Iha intervista, Diretor Departamentu Engenharia sivil Aleixo Sarmento haktuir, Semináriu sientífiku ne’e organiza husi estudante finalista sira ne’ebe sei gradua iha tinan ne’e.
“Semináriu ne’e ligadu ho enjenharia sivil, objetivu atu hasa’e konesimentu no kapasidade estudante sira nian liu husi kompanha internasional, péritu sira hirak ne’ebe mai kompartilla experiensia ba sira ne’e ema ne’ebe expertu no experensiadu, tanba ne’e partisipasaun estudante nian importante tebes iha semináriu iha semináriu ne’e hodi forma sira hateke ba konstrusaun real liga ho teoria sira ne’ebe aprende ona”. Tenik Diretor Departamentu Aleixo Sarmento ba SAPNewsTL iha Auditorium Fakuldade Engenharia UNTL Hera, 09/02/2024
Aleixo hatutan, estudante barak sei iha mundu akadémiku, dala barak seidauk iha experiensia barak, entaun liu husi semináriu ne’e bele dezenvolve no aumenta estudante sira nia kunhesimentu iha area engenaria sivil tanba ema hotu hatene katak departamentu ne’e hetan ona akreditasaun A husi Ajénsia Nasionál Avaliasaun Akreditasaun Akadémika (ANAAA) liu husi Ministériu Ensinu Superior Siénsia no Kultura (MESSK) iha tinan kotuk.
“Avalisaun ne’ebe ita ultrapassa ona, ita nia valor de akreditasaun husi ANAAA ne’ebe fo valor A (ekivale 85), signifika A ne’e ita sei presiza esforsu makas liu tan hodi hadia an diak liu tan, servisu di’ak liu tan para depois bele kontinua mantein no sai referénsia ida, wainhira iha avaliasaun internasional, ita prontu hodi kompete iha avaliasaun internasional sira iha futuru”. Aleixo Xavier Fundamenta
“La’os valor ne’e deit maka determina, valor ida ne’e nu’udar referensia, Ita atu esforsu an didiak ba oin, tuir regras regras ne’ebe husi Ministeriu Ensino Superior Siensia no Kultura hatun mai ita tuir lei ne’ebe iha, Ita hot-hotu tenki kumpri nune’e bele alkansa objetivu sientifika, hodi lori UNTL sai sentru ekselénsia iha mundu”. Nia afirma
Diretor Departamentu ne’e informa, semester ne’e departamentu refere sei produz graduadu 56 ba UNTL tanba UNTL sei gradua tan graduadu iha fulan junhu tinan ne’e.
“Semester ne’e bele hetan 56, komforme sira ne’ebe tuir ona ezame defeza monografia, semester tuir mai ita tenki gradua 60 estudante finalista iha departamentu ne’e, ita la to’o númeru ne’e maibe ita agora komesa la’o dadauk ona, ita sei hadia diak liu tan ba oin.” Nia informa
Iha parte seluk, Diretor ne’e husu estudante UNTL ne’ebe agora daudaun abandona estudu, atu fila hikas ba universidade no departamentu sira hodi kontinua fali ninia estudu tanba ba futuru Timor Leste presiza ema ne’ebe ho grau akadémiku no matenek hodi servi povu no nasaun
“Estudante sira lolos ne’ebe abandona estudu ne’e, balun husu lisensa tanba kondisaun ekonomia familia obriga, balun ba servisu nein husu lisensa, balun vontade laiha atu kontinua, tan ne’e ita husu para bele mai kobtinua fali estudu tanba futuru rai ne’e ninia dezenvolvimentu presiza ema nia kapasidade hodi dezenvolve”. Nia Husu
Durante tinan 12, Departamentu ne’e eziste konsege produz ona gradua kuaze atus tolu, graduadu hirak ne’e maioria hetan servisu iha kompanha internasional sira, instituisaun estadu sira, komapanha nasional no balun servisu iha organizasaun sira.
Universidade Nasionál Timor Lorosa’e (UNTL) eziste fakuldade sanulu (10), entre sira Fakuldade Engenharia Siénsia no Teknolojia (FEST) iha departamentu hamutuk lima mak hanesan Engenharia Sivil, Mekánika, Informátika, Eletronika no Elétrika, Geologia no Petróleu.
Fakuldade Engenharia antes ne’e hetan apoia husi JICA, iha ne’ebe konstrui edifisiu ho kualidade internasional ne’ebe kompleta ho biblioteka, laboratóriu, sala de aulas, sala professores, sala de estudu, sala de reuniaun, auditorium inklui ho nia sistema ne’ebe dizitalizadu no modernizadu.
Jornalista : Ermelinda Soares