Deskonfia Leonito Mate Iha SOLS Likisa, PNTL Asegura Ona Sidadaun Na’in 3

Imajem : Mate Isin Leonito Belo to’o iha Mortuáriu HNGV Dili, 04/10/2025.

SAPNewsTL, Dili : Deskonfia Sidadaun Leonito Belo hosi munisípiu Baucau mate iha SOLS Bogoro munisipiu Likisa.

Família Matebian Constâncio Pinto haktuir Leonito Belo tuir kursu lian Inglês iha SOLS Likisa, iha inisiu tinan 2025. Iha loron 03 Outubro, família hetan kontaktu katak Leonito hakotu ona iis tanba ne’e família to’o kedas iha Likisa hodi haree no lori ba Mortuária Hospital Nasional Guido Valadares (HNGV) Dili.

“Dader hader mai, atu ba ense mina ba motor mak katuas sira telefone mai katak Leo mate ona iha SOLS Likisa, entaun ha’u to’o ba, nia latan hela iha kuartu laran”.

“Mate iha kuartu ne’ebe kalan-kalan toba ba ne’e, nia kaben mutin sai, ran sai hosi inus, nia kakorok ne’e mak metan maibe ita la hatene polisia mak sei investiga, ha’u halo tiha video no hasai foto”. Hateten Família Matebian Constâncio Pinto ba Mídia Sapnews iha Mortuáriu HNGV Dili, 04/10/2025

Constâncio konta, Leonito “Mate desde horikalan tanba isin to’os tiha ona, ha’u to’o ne’eba, maun ida mak dehan lori tiha nia ba lai, ba oin nia kazu la’o oinsa mak ita haree”.

“Ha’u sente triste tanba lakon ema diak, nia badinas no lakon joven ida, nia nunka halo problema no nia nunka komete kazu ida, nia prosesu orsida ninia inan aman mai mak haree, mate ne’e ha’u deskonfia”.

Mate Isin Leonito Belo oras ne’e iha onaMortuária Hospital Nasional Guido Valadares (HNGV) Dili.  Nia mate ho idade ruanulu resin ida (21).

Enkuantu, Sidadaun nain rua ne’ebe antes ne’e toba hamutuk Matebian no Mestre SOLS ida, oras ne’e iha ona komandu PNTL munisípiu Dili hodi halo investigasaun.

Oras ne’e, Matebian nia inan hosi Baucau Villa to’o ona Mortuária Hospital Nasional Guido Valadares (HNGV) Dili. Família sira deside sei autópsia, nune’e parte saúde sei halo autópsia iha loron 6 Outubro 2025.

Hafoin sei entrega ba família Matebian hodi lori ba halot iha nia rai moris fatin munisípiu Baucau.