Deskunhesidu Hadau Telefone CEO SMNews Nian ! Ho Pániku, Duni Tuir Maibe La Toman

SAPNewsTL, Dili : Hafoin fila Sentru Formasaun Akademia Posilia Comoro, iha oras rai kalan fahe ba rua maiz ou menuz 23:39, Deskunhesidu ho motor hadau CEO (Chief Ezecutive Officer) Mídia SMNews Silco Mariano nia telefone iha Palásiu Prezidensia oin, hafoin ema hadau telefone refere, ho pániku Mariano duni tuir maibe la toman.

Tuir informasaun ne’ebe SAPNews asesu liu husi pajina facebook privadu Silco Mariano haktuir nia fila husi Akademia Polísia Comoro maka deskunhesidu hakbesik an ho motor hodi hadau telefone ho marka Samsung S23 Ultra.

“Ema hadau ona, ha’u nia telemovel horikalan (12/06/2024) iha oras 23: 39:23 OTL iha Aitarak Laran areadores Palasio Presidente oin bainhira fila husi servisu iha Akademia Polisia Comoro Dili. Telemovel ne’ebe sira hadau mak hanesan iha fotografia ho marka Samsung S23 Ultra”. Hakerek CEO SMNews liu husi nia pajina Silco Mariano ohin dader,13/06/2024. SAPNewsTL screenshot

Mariano hatutan, Ema hirak ne’ebe hadau ninia telefone refere, deskonfia sira akompanha kedas nia hahu husi diresaun Comoro nian to’o iha Palasiu Presidensial oin

“To’o iha Palásiu Prezidensial oin, ha’u ne’ebe foin hasai telemovel husi Bolsu derepenti sira nain 2 ho motorizada rabat mai ha’u hodi hadau husi liman, ho pániku, ha’u duni sira nain-2 hahu kedas fatin akontesimentu liu Pertamina ETO (Esperansa Timor Oan) tun Palapasu, tesik dalan klot hafoin lakon sira nia diresaun iha Kruzamentu Igreja Motael”.Silco Mariano hakerek

Hafoin enfrenta situasaun ne’e, Lider Mídia Nasionál SMNews ne’e hato’o keixa ba parte Komandu PNTL Dili ho evidénsia balun, nune’e bele buka tuir autor ne’ebe tenta hadau nia telefone.

“Ha’u hato’o kedas kazu refere ba Komando PNTL Dili hodi kontinua buka tuir akompanha ho evidensia balun, Ohin kazu refere akontese ba ha’u hanesan jornalista, Parese aban bairua sei akontese tan ba sira seluk wainhira la konsidera ho seriu.” Mariano haktuir

Mariano sente triste tanba kazu hadau telefone iha motor, akontese ona hidi rezulta labarik feto ida mate no inan sofre kanek grave iha fulan kotuk, maske nune’e maibe kazu hadau telefone kontinua mosu iha fati-fatin.

“Triste tanba seidauk liu fulan ida kazu refere akontese ba inan feton ida ho nia oan idade tinan 6 lakon vida, no inan refere sei hetan hela tratamento iha Hospital”.

Diretor SMNews ne’e garante katak to’o tempu sei hetan autor ne’ebe hadau telefone, iha ne’ebe nia uza hodi halo ninia servisu lor-loron.

“Ha’u nia telemovel o foti ona, parese ha’u nia todan kala o hasai, maibe husi ha’u nia parte o hasai deit todan, keta halo sei akontese fali ba o ida halo asaun ne’e tauk keta liu fali ida ne’e, Ha’u fiar, laos oras, laos loron, maibe lori tempu balun sei hetan o.” Tenik Mariano

Antes ne’e, Komandante Departamentu Investigasaun Kriminál Nasionál (DIKN) Superintendente Polisia João Belo dos Reis hateten, Polísia sei halo operasaun hodi identifika bengkel sira ne’ebé durante ne’e modifika motor hodi submete ba prosesu.

“Parte Polísia investigasaun kriminal nafatin halo operasaun buka tuir grupu no individu sira ne’ebé durante ne’e naok motor ho Telefone no sasán iha Teritoriu Timor-Leste”.

“Ita nia servisu informasaun detekta, depois aprezenta mai parte departamentu investigasaun kriminal rasik halo operasaun hamutuk ho ita nia parseiru sira atu halo atuasaun ba krimi ne’ebé mak akontese iha dalan estrada públiku ita bele hapara ka hamenus,” Dehan Komandante Departamentu Investigasaun Kriminál Nasionál (DIKN) Superintendente Polisia João Belo dos Reis iha Kuartel Jerál PNTL Kaikoli (11/06/2024).

Nia dehan kazu naok ne’ebé durante ne’e akontese, polísia Alerta ba inan aman sira atu eduka oan sira, tanba oan sira la’o livre latama uma sira kaer telefone no kaer motor sira depois inan aman sira la hase sasan sira ne’e mai husi ne’ebé mak oan sira uza.

Nia Dehan aktu krime sira atu reduz, kontribuisaun husi inan aman nian hola parte edukasaun nian ida ne’e importante, kuandu inan aman rasik la eduka, maibe husik nafatin laiha informasaun ba polisia ida ne’e oan sira kontribui ona ba krime.

“Kazu sira ne’e akontese maioria aksaun ne’e individual, maibé balun mos ita identifika aksaun organizadu, ita sei buka tuir bengkel sira ne’ebé mak modifika motor nauk sira no loja sira ne’ebé mak hadia telefone naok. Depois ita sei buka tuir responsabiliza sira nia aktus ne’ebé sira halo tanba ida ne’e kontribui hotu ba situasaun krimi iha dalan públiku,” informa nia.

Enkuantu, tuir dadus balun ne’ebe SAPNews asesu durante ne’e kona ba kazu motor lakon, telefone lakon, laptop lakon, sasan lakon ne’e akontese ona iha Munisipiu sira, kazu hirak ne’e maioria akontese iha Munisipiu Dili inklui kazu hadau telefone iha motor leten ne’ebe mosu iha Praia dos Coceiros Pantai Kelapa hodi rezulta labarik feto ida lakon vida tanba monu husi motor.

Jornalista : Ermelinda Soares