Dezenvolve Kapasidade Tékniku & Professionál ! Délio Sei Treinu Iha Canadá Durante Fulan Tolu
Imajem : Boxista Délio Mouzinho hamutuk ho nia Patrosinador & Treinador sira iha Lecidere, 20/03/2025
SAPNewsTL, DÍli : Boxista Délio Mouzinho sei ba treinu iha Canadá durante fulan 3 tanba hetan apoia hosi patrosinador Caltech Group, nune’e bele dezenvolve kapasidade tékniku no professionál iha mundu boxing.
Chief Executive Officer (CEO) Caltech Group Jean Vezina hateten, nia parte hakarak apoia Délio Mouzinho hodi bele hetan ninia karreira profesionál liu hosi treinu iha Canadá.
“Bazikamente, ha’u ho ha’u- nia kaben Angela sente orgullu tebes apoiu el matador desde 2019, hanesan patrosinador ba El-Matador nian ami hakarak atu apoiu nafatin Délio hodi bele hetan ninia karreira profisionál, ami sei apoiu Délio ba Canadá hodi treinu durante fulan tolu iha modalidade boxing club Canada ho treinador famozu ida ho naran Estevan Lavus”. Hateten Chief Executive Officer (CEO) Caltech Group Jean Vezina iha Lecidere, 20/03/02025.
Jean Vezina hatutan, “Ami uza oportunidade ida ne’e hodi fo parabens ba esforsu no susesu sira ne’ebe Délio hetan tiha ona, ami fiar katak desportu ida ne’e importante tebes ba dezemvolvimentu nasaun nia, ami kontinua akompanha El-Matador, hili no kontaktu Canadá atu bele fo fatin ba Délio”.
“Treinador Lavus ne’e treinador ida famozu iha ne’eba (Canadá), treinador ida ne’ebe konsege lori ekipa nasaun Canadá olímpiku, iha Jullu mós iha oportunidade ida ba treinador Abilio sei halo treinamentu formasaun treinador nian iha Canadá”.
Iha fatin hanesan, Délio Mouzinho sente kontente tanba bele hetan oportunidade ba treinamentu no dezenvolve an diak liután ba oin.
“Ha’u kontente tebes ba oportunidade ida ne’e, espera katak iha ne’e atividade ne’ebe barak hanesan treinu, eskola no servisu maibé sempre hetan klasifikasaun, espera katak mehi sei sai realidade”.
“Iha ne’ebá ambiente ne’ebe mak foun, treinador mós foun, karik hetan oportunidade diak husi Canada entaun bele joga iha ne’ebá, iha fulan Jullu fo konfiansa bele joga, diak liu ita kontinua merkadu ne’ebe mak boot duke ita hetan merkadu ne’ebe mak ki’ik”. Nia sublinha
Boxista timoroan ne’e fo mos agradese ba suporter sira, nia afirma kontinua prepara an no prontu atu joga iha nasaun ne’ebe deit mak disponivel no iha oportunidade.
“Ha’u sempre iha nasaun ne’ebe deit ba futu iha ne’ebe deit, ha’u prontu ba futu, ida ne’e hanesan primera ves, loke dalan Timor ona laos ba El-Matador maibe nakloke ba timoroan hotu, nune’e bele hetan oportunidade hodi aumenta abilidade profisionál”.
Enkuantu, Boxista Delio Mouzinho sei aranka ba nasaun Canadá iha loron Sábadu, 22 fulan Marsu 2025, boxista ne’e sei treinu iha Canadá durante fulan tolu, hafoin sei fila hikas mai iha fulan junhu 2025 tanba tuir planu Delio sei fight ho Saroha hosi Indonésia iha fulan Jullu tinan ne’e.
Jornalista : Ermelinda Soares
