Dias Deklara Nia Vitória & Konsidera Golpe de Estadu “Falsu” ! Observador Sira Lamenta Situasaun

SAPNewsTL, Guiné-Bissau : Kandidatu prezidensiál Fernando Dias afirma “Ami sai alvu hosi tentativa golpe Estadu falsu ida, tanba razaun simples ida: ha’u manán eleisaun prezidensiál sira iha primeira volta”, nia eskapa hosi tentativa kapturasaun ida hosi ema armadu sira iha Bissau.

Iha vídeo ida ne’ebé fó sai iha rede sosial, Fernando Dias haktuir katak ema armadu sira invade nia sede kampaña nian bainhira nia hasoru malu ho observadór internasionál sira, nia konsege halai tanba intervensaun lalais hosi joven sira ne’ebé marka prezensa iha fatin akontesimentu.

Kandidatu independente ne’ebé hetan apoiu hosi Partidu Renovasaun Sosial (PRS) no hosi Partidu Afrikanu ba Independénsia Guiné no Cabo Verde nian (PAIGC), ne’ebé deklara aan hanesan manán-na’in hosi eleisaun prezidensial iha loron-domingu (23 Novembru), afirma katak nasaun hasoru hela golpe Estadu ida ne’ebé “falsu”.

“Ami sai alvu hosi tentativa golpe Estadu falsu ida, tanba razaun simples ida: ha’u manán eleisaun prezidensiál sira iha primeira volta. No ida ne’e hanesan planu ida ne’ebé orkestra hosi Umaro Sissoco Embaló hodi entrega podér ba militár sira, dezde nia lakon eleisaun sira, hodi kastigu povu guiniense”, nia deklara iha Bissau, 27/11/2025. Sita média DW Guiné-Bissau

Kandidatu konfirma mós detensaun hosi Líder PAIGC Domingos Simões Pereira, no advogadu Octávio Lopes, lori ona sira na’in rua ba sela tanba nasaun iha ámbitu hosi golpe militár ne’ebé halo nakdoko nasaun.

“Ami husu ba povu Guiné-Bissau nian atu tun ba dalan sira hodi eziji libertasaun hosi Domingos Simões Pereira no ami hotu. Ami husu ba autoridade kompetente sira, sira ne’ebé hadau poder ho forsa, atu liberta detidu sira hotu no permiti publikasaun hosi rezultadu eleitoral sira no restaurasaun hosi Estadu Direitu iha nasaun”, apela Dias ba guineense.

Dias mós husu ba komunidade internasionál atu asume ninia responsabilidade, nune’e Komisaun Nasionál Eleisaun (CNE) bele fó sai rezultadu eleisaun.

Altu Komandu asume podér estadu nian

Hafoin tiruteiu ne’ebé rona iha Bissau tuku 12:40 loron Kuarta ne’e (26 Novembru), militár hadau poder iha nasaun ne’e. Iha komunikadu ida ne’ebé transmiti hosi Televizaun Públika Guiné-Bissau nian, Komandu Militár ba Restaurasaun Orden Konstitusionál nian fó sai katak asumi ona “poder tomak hosi Estadu Repúblika Guiné-Bissau nian”. Deklarasaun ne’e lee hosi Denis N’tchama iha Televizaun Públika.

Tuir komunikadu, desizaun ne’e mosu hafoin deskoberta “planu ida ne’ebé la’o hela hodi destabiliza nasaun”, ne’ebé alegadamente envolve polítiku nasionál sira no estranjeiru sira, nune’e mós “partisipasaun hosi drogadu koñesidu ida”.

Altu Komandu apela ona ba povu hodi kalma no husu kooperasaun hosi populasaun guiniense, hodi justifika sira asaun hirak ne’e hanesan resposta ida ba “emerjénsia nasionál”.

Misaun Observasaun Eleitorál Uniaun Afrikana (UA), hamutuk ho Komunidade Ekonómika Estadu Áfrika Osidentál (CEDEAO) no Fórum Katuas Áfrika Osidentál, hatudu preokupasaun maka’as no kondena maka’as saida maka akontese, iha véspera divulgasaun rezultadu eleisaun prezidensiál no lejislativa, ne’ebé marka ona ba loron-kinta ne’e (27 Novembru).

Iha sorin seluk, Xefe Misaun Observasaun Eleitorál hosi Uniaun Afrikana, CEDEAO, no Fórum Anciões Áfrika Osidentál, Filipe Nyusi, Issufu Kamara, no Goodluck Jonathan, respetivamente, preokupa ho situasaun pós-eleitorál iha Repúblika Guiné-Bissau.

“Ami, Xefe Misaun Observasaun Eleitorál nian hosi Uniaun Afrikana, CEDEAO no Fórum Anciões Áfrika Osidentál nian, nota konkluzaun ordenadu no pasífiku hosi prosesu votasaun ba eleisaun prezidensiál no lejislativa sira ne’ebé hala’o iha loron 23 fulan-Novembru tinan 2025 iha Repúblika Guiné-Bissau”. Sita iha deklarasaun konjunta ne’ebé hato’o husi xefe misaun observasaun na’in tolu (Filipe Nyusi, Issufu Kamara, no Goodluck Jonathan)

Apezarde prosesu demokrátiku no eleitoral ne’ebe la’o, “ami espresa preokupasaun kle’an ba anúnsiu golpe Estadu husi forsa armada sira enkuantu nasaun hein hela anúnsiu rezultadu sira”.

“Ami lamenta katak anúnsiu ne’e halo iha tempu ne’ebé misaun sira foin konklui enkontru ho kandidatu prezidensiál prinsipál na’in rua, ne’ebé garante mai ami kona-ba sira-nia vontade atu simu povu nia vontade”.

Filipe Nyusi ne’e lamenta ho akontesimentu refere tanba kontradiz ho prosesu estadu direitu no demokrátiku.

“Ami lamenta tentativa klaru ida-ne’ebe atu perturba prosesu demokrátiku no lukru sira ne’ebé hetan ona to’o agora. Ami husu ba Uniaun Afrikana no CEDEAO atu foti medida nesesáriu sira hodi restaura orden konstitusionál”.

Nia mós husu ba militar hodi liberta funsionariu sira hodi bele servisu no fo konkluzaun ba prosesu eleitoral iha Guiné-Bissau.

“Ami hato’o preokupasaun kona-ba detensaun ba funsionáriu sira ho pozisaun aas, inklui sira ne’ebé responsavel ba prosesu eleitorál. Kona-ba ida-ne’e, ami husu ba forsa armada sira atu liberta kedas funsionáriu sira ne’ebé maka hetan detensaun hodi permite prosesu eleitorál nasaun nian atu la’o ba nia konkluzaun”.

“Ami apela ba povu Guiné-Bissau nian atu mantein kalma no reafirma ami-nia kompromisu atu apoia nasaun ne’e iha ninia dalan demokrátiku no ami subliña importánsia atu prezerva dame, estabilidade no moris-di’ak povu guiniense nian durante períodu sensível ida ne’e.”

Notícia Relevante :

Guiné-Bissau Tama Ba Golpe Estadu ! Militar Demite Sissoco & Kontrola Total

SAP News TL, Guiné-Bissau : Militár suspende prosesu eleitorál, hasai Prezidente Guiné-Bissau Sissoco Embaló no taka fronteira sira, Komandu Militár asume poder no disolve autoridade polítika nasaun nian iha Guiné-Bissau tanba deskonfia mosu planu destabiliza nasaun.

Tuir publikasaun Video hosi Índico News TV porta-vós Altu Komandu Militár, Denis N’Canha deklara desizaun ne’e akontese hafoin deskoberta hosi “planu ida ne’ebé la’o hela hodi destabiliza nasaun”, ne’ebé alegadamente envolve polítiku nasionál sira no estranjeiru sira, nune’e mós “partisipasaun hosi na’ok-teen koñesidu ida”.

Komunikadu ne’e temi mós tentativa manipulasaun rezultadu eleitorál no ezisténsia “depózitu arma nian”, ne’ebé deskobre hosi servisu intelijénsia Estadu nian.

Entre medida sira ne’ebé fó sai husi Altu Komandu Militár mak hanesan:

1. Ezonerasaun imediata ba Prezidente Repúblika;
2. Taka instituisaun hotu-hotu Repúblika nian to’o avizu seluk;
3. Suspensaun ba prosesu eleitorál ne’ebé la’o hela;
4. Taka fronteira rai, tasi, no espasu aéreu nasionál;
5. Impozisaun ba restrisaun entre tuku 7:00 kalan no tuku 6:00 dadeer;
6. Suspensaun ba atividade meiu komunikasaun sosiál sira hotu.

Komunikadu ne’e subliña katak medida sira ne’e sei vigora nafatin “to’o situasaun ne’e hetan esklaresimentu loloos no kondisaun sira hetan restaurasaun ba retornu tomak ba normalidade konstitusional”. Altu Komandu apela ba povu hodi kalma no koperasaun ba asaun sira hanesan resposta ida ba “emerjénsia nasional”.

Porta-vós komandu militár, Denis N’Canha, deklara ona katak Forsa Armada sira desidi ona “demiti kedas Prezidente Repúblika no suspende, to’o avizu seluk, instituisaun tomak hosi Repúblika Guiné-Bissau nian”. Tuir nia, medida ne’e foti hafoin “deskoberta planu ida ne’ebé la’o hela” hodi destabiliza nasaun.

N’Canha afirma katak “sidadaun nasionál no estranjeiru sira” tenta ona manipula rezultadu eleitorál sira hodi bele implementa planu ne’e.

Ho hanoin ida-ne’e, militár sira mós fó sai suspensaun hosi prosesu eleitorál, atividade sira hosi mídia, no taka imediatu hosi fronteira sira “terrestre, aéreu no tasi nian” ho obrigatóriu.

Iha loron-kuarta, rona tiruteiu ne’ebe besik palásiu prezidensiál no mane sira ho farda militár nian kaer kontrolu hosi estrada prinsipál ne’ebé lori ba rezidénsia ofisiál. Iha loraik, estrada sira Bissau nian sai mamuk, no militár sira kaer ona kontrolu ba estrada prinsipál sira hotu.

“Atuál Prezidente Guiné-Bissau, Umaro Sissoco Embalo, hetan detensaun no detein hela iha kuartél Estadu-Maiór Jerál, iha ne’ebé nia hetan tratamentu di’ak”, haktuir fonte militár ida ba ajénsia AFP.

Ofisiál superiór ida konfirma ba AFP katak Embalo hetan detensaun “hamutuk ho Xefe Estadu-Maiór no Ministru Interiór.”

Embalo hanesan favoritu hodi manán mandatu daruak iha eleisaun prezidensiál iha Domingu liubá. Eleitor millaun ida resin maka ba vota iha eleisaun sira ne’ebé hala’o lahó prezensa hosi partidu opozisaun prinsipál no nia kandidatu.

Antes ne’e, Eis Presidente Guiné-Bissau Sissoco Embaló hateten “Se ha’u ko’alia demais, sira sei konfiska ha’u nia telefone; ha’u hetan destituisaun ona,” deklara Umar Sissoko Embaló.

Nia hatutan, “Tuir loloos, ha’u hetan demisaun; ha’u labele hatete buat barak, se lae sira sei konfiska ha’u nia telefone”, subliña hosi Eis Prezidente Sissoco Embaló wainhira hetan kontaktu hosi Jeune Afrique, Guiné-Bissau, 26/11/2025

Entretantu, Guiné-Bissau hala’o eleisaun prezidensiál no lejislativa simultánea iha loron 23 fulan-novembru. Eleisaun sira konvoka iha ámbitu ditadura ida ne’ebé dura tinan neen no lidera hosi Umaro Sissoco Embaló.

Komisaun Nasionál Eleitorál (CNE), responsável ba organiza prosesu eleitorál, iha ona lideransa tinan tolu nia laran, maibé konveniente ba Sissoco. Supremu Tribunál Justisa nian (STJ), órgaun judisiál supremu iha Guiné-Bissau ne’ebe instánsia aas liu ba fiskalizasaun ba prosesu eleitorál iha ninia faze hothotu.

Iha prezidente ida ne’ebé impoin liuhosi prosesu eleitorál ne’ebé falsu, ne’ebé hala’o hosi Sandji Fati, hanesan servidór prinsipál ida ditadór nian, ne’ebé nomeia hosi prezidente ida hosi Asembleia Nasionál Populár (ANP) ne’ebé impoin hosi Sissoco. Oponente polítiku prinsipál sira hosi tiranu no nia líder Domingos Simões Pereira, hetan impedimentu abuzivu hodi kandidata-an iha eleisaun sira.

Povu Guiné-Bissau ba vota hodi hili xefe ba sira-nia instituisaun estadu nian hodi fo atensaun no foka ba eleisaun prezidensiál sira, tanba povu hamrook ba liberdade ne’ebé luta hasoru despota ida ne’ebé perigozu liu iha Áfrika durante tinan neen.

Maski iha ditadura, sistema eleitorál Guiné-Bissau nian iha modelu ida hosi kontajen votu nian ne’ebé transparente liu iha Áfrika. Faze rua hosi prosesu kontajen nian maka krusiál ba transparénsia: kontajen iha sentru votasaun sira, ne’ebé rezulta hosi kontajen buletin votu nian, no kontajen iha Komisaun Rejionál sira Eleisaun nian (CRE), ne’ebé rezulta hosi adisaun hosi númeru sira ne’ebé sura iha rejistu sentru votasaun nian tuir rejiaun eleitorál. Guiné-Bissau iha rejiaun eleitorál 9, no mós eleitoradu sira diáspora nian iha Europa no Áfrika.

Alternativa ida iha minutu ikus nian ne’ebé hetan hosi grupu opozisaun sira hanesan mekanizmu ida ba kombate eleitorál hasoru ditadura. Apoiu populár durante kampaña eleitorál loron 21, povu prontu atu ba vota ho spanduk rua hanesan : unidade nasionál hasoru divizionizmu étniku-relijiozu Sissoco nian; no liberdade demokrátiku sira hasoru rejime ida ne’ebé nakonu ho raan, no nakonu ho terror.

Prosesu ne’ebe iha faze atu halo tabulasaun ba rezultadu eleisaun rejionál sira. Lideransa kandidatura Fernando Dias da Costa nia delegadu iha sentru votasaun hotu-hotu hala’o kontajen paralelu ba votu sira uza relatóriu sumáriu hosi sentru votasaun sira. Projesaun refere indika maioria absoluta iha primeira volta no derrota konsekuente hosi ditadór. Resultadu ne’e espekta atu Guiné-Bissau fila fali ba períodu ne’ebé hakmatek liu iha nia istória.

Guiné-Bissau, nasaun ida hosi Áfrika Osidentál, sofre ona golpe Estadu dala haat dezde nia independénsia hosi Portugal iha tinan 1974, aleinde tentativa golpe Estadu oioin.

Foto : Sosial Media Internasional