Dies Natalis SAPNews ! Alkatiri, Expedito & Otelio Lansa Revista Papa Francisco
Imajem : Lansamentu Revista visita Papa Francisco iha Timor-Leste, Singapura, Indonesia no Papua Nova Giiné iha Salaun Cristal Balide, 26/02/2025. Foto : Jufer Guterres
SAPNewsTL, Díli : Eis Primeiru Ministru Marí Bin Amude Alkatiri, SEKOMS Espedito Dias Ximenes, Presidente Konsellu Imprensa Otello Ote no konvidadu sira lansa ofisialmente revista visita Papa Francisco iha Timor-Leste, Singapura, Papua Nova Guiné no Indonésia.
Revista refere hakerek hosi ekipa midia nasional SAP News Timor-Leste, iha ne’ebe ho nia objetivu konserva, asegura no prezerva memoria Timor-Leste nian iha jornada igreja katolika mundial. Revista ne’e lansa diretab hosi Eis Primeiru Ministru Marí Bin Amude Alkatiri, SEKOMS Espedito Dias Ximenes, Presidente Konsellu Imprensa Otello Ote no konvidadu sira.
Timor-Leste nu’udar estadu direitu demokrátiku ne’ebé ukun an, hari’i husi vontade popular no respeitu ba dignidade ema moris ida-idak nian, estadu ne’ebé povu 99,6% relijiaun katólika, sempre fo respeitu ba diversidade no universalidade.
Iha tinan 1989, Santu Padre João Paulo II vizita Timor-Leste ho mensajem save maka ‘Imi Masin Rai Nian No Naroman Mundu Nian’, liu tiha tinan tolu nulu resin-lima, Papa Francisco halo vizita pastoral ho eslogaun ‘Atu Imi Nia Fiar Sai Imi Nia Kultura’ nu’udar tema sentral iha momentu istóriku ne’e.
Liafuan save maka fiar no kultura, fiar hanesan buat abstratu ne’ebé labele haree ho matan no kaer ho liman, maibe fiar ne’e bele expresa hosi hanoin, orasaun, hahalok no toman ema nian. Kultura mak ábitu ne’ebé sosiedade hatudu hosi atetude no prátika iha família, igreza no nasaun.
Tuir Biblia, Saun Tiagu haktuir, ‘fiar moris ho nia hahalok, fiar sai lolos ho hahalok mos, Abrão fiar ida ne’e nu’udar Maromak nia justisa’(Tiago 3:22-23). Fiar ne’ebe la ho hahalok, fiar ne’e mate, enkuantu hahalok ne’ebe la ho fiar, hahalok ne’e la folin.
Fiar ne’e konkretiza liu hosi hatudu dalan, serví no domin, karidade no moris ho unidade iha diversidade, la haree kor, ras, relijiaun, etnia no grupu. Mensagem, ‘atu imi nia fiar, sai imi nia kultura’(que a vossa fé, seja a vossa cultura), katak ita nia fiar sai identidade, sai adultu iha fiar no hahalok, hanesan Dom Bosco dehan ‘sai sarani di’ak no sidadaun honestu’ la‘os de’it iha igreja wainhira tuir missa, maibe sai kultura ba missa, toman iha orasaun, respeita malu, haraik an, perdaun, serví malu iha familia, grupu, instituasaun, nasaun no mundu inteiru.
Santu Padre nia visita ho vizaun hametin fiar katóliku, promove unidade nasionál, inspira ema hotu halo nia fiar sai kultura damen, amizade, fraternidade, solidariedade, karidade, toleránsia, halakon violénsia, diskriminasaun, explorasaun, exploitasaun, korupsaun, koluzaun, nepotismu no injustisa sosial iha mundu.
Mídia SAPNewsTL hanoin hamutuk no deside hakerek revista vizita Santu Padre Papa Francisco hodi prezerva no asegura nafatin memória furak no kmanek ne’e hodi hatutan hosi jerasaun ba jerasaun iha istória Timor-Leste nian, aliende ne’e bele promove kultura literasia iha sosiedade liu hosi halo leitura, análiza, peskiza no hakerek nu’udar papel krusiál ba juventude iha sékulu XXI.
Marí Alkatiri Lee Revista Visita Papa Francisco, hafoin lansamentu ba revista refere.
Revista vizita Papa Francisco ne’ebé ho tema “Imi Nia Fiar Sai Imi Nia Kultura”, ne’e bele fanun no motiva ema hotu hodi moris iha fiar no hahalok ne’ebé loos, sai kultura familiar, servi, laran metin iha Maromak, tulun malu no moris hamutuk iha toleránsia, unidade iha diversidade nia laran tuir prinsípiu dokumentu fraternidade umana nian hahú husi família, instituisaun to’o nasaun.
Entretantu, atu hetan asesu ba revista refere bele halo kontaktu ba ekipa SAPNews (75700031) hodi bele imprime iha fatin ne’ebé disponivel tanba produsaun revista ho presu ne’ebé karun iha rental sira.
Jornalista : Anina Martins
