Difisil 𝗔𝘀𝗲𝘀𝘂 𝗦𝗮ú𝗱𝗲 & 𝗠𝗲𝗿𝗸𝗮𝗱𝘂 ! 𝗩𝗲𝘁𝗲𝗿𝗮𝗻𝘂 Raimerhei 𝗛𝘂𝘀𝘂 𝗚𝗼𝘃𝗲𝗿𝗻𝘂 𝗦é𝗿𝗶𝘂 𝗛𝗮𝗱𝗶𝗮 𝗘𝘀𝘁𝗿𝗮𝗱𝗮 𝗚𝗹𝗲𝗻𝗼 𝗕𝗮 𝗘𝗿𝗺𝗲𝗿𝗮

Imajem : Estrada Ligasaun Gleno ba postu administrativu Ermera, 28/11/2025

SAP News TL, Ermera : Eis guerileiru FALINTIL Responsavel Seguransa Formasaun Zona Hemtin Ermera, Sup-Regiaun 7 de Dezembru Ermera, Adolfo Inacio da Silva Maia tatoli ba Governu, hodi tau atensaun seriu ba kondisaun estrada diresaun Gleno ba Ermera liga ba Suku Raimerhei.

𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 𝐝𝐚 𝐂𝐫𝐮𝐳 – 𝐒𝐀𝐏𝐍𝐞𝐰𝐬𝐓𝐋

Iha intervista Veteranu Adolfo Inacio hateten, hanesan komunidade iha Aldeia Timlele Buras Suku Raimerhei Postu Administrativu Ermera Munisipiu Ermera husu ba Governu atu fó atensaun seriu ba kondisaun estrada ne’ebé liga ba área ne’e, tanba iha tempu udan monu rai difikulta movimentasaun transporte diresaun Postu Ermera ba Suku Raimerhei.

“Hanesan veteranu, ha’u rekomenda ba Governu atu bele tau matan ba área ne’e, liu-liu ba kondisaun estrada, tanba wainhira tempu udan to’o, transporte sira susar tebes atu liu, aat liu tan inan isin rua sira bainhira atu partus ami lori ba postu saúde dok tebe-tebes,” Dehan Veteranu Adolfo Inacio ba SAPNews, Iha Suku Raimerhei, Sexta-feira, (28/11/2025)

Nia hatutan, tinan barak ona komunidade Postu Ermera kontinua halerik ba kondisaun estrada ligasaun Gleno ba to’o iha Suku Raimerhei, tanba estrada refere desde tempu kolonial mai to’o iha tempu ukun rasik an Governu seidauk tau atensaun seriu.

“Tinan barak ona hahu kedas iha tempu Portugués mai to’o ohin loron Timor-Leste ukun an tinan 24 liu ona maibé estrada hahu husi Gleno mai iha ami nia suku estrada aat tebe-tebes, situasaun ida ne’e ami labele lori produtu ba merkadu Gleno” Tenik nia.

Imajem : Eis guerileiru FALINTIL Responsavel Seguransa Formasaun Zona Hemtin Ermera, Sup-Regiaun 7 de Dezembru Ermera, Adolfo Inacio da Silva Maia. 

Nia realsa situasaun real ne’ebe komunidade enfrenta, antes ne’e impaktu husi estrada at obrigadu komunidade sira leba deit inan feto balun husi Suku Raimerhei ba to’o iha sentru saude hodi tur ahi, tanba ambulasia labele movimentu ba to’o iha fatin ne’ebe komunidade hela ba.

“Kondisaun estrada la diak afeta direta servisu saúde nian, ezemplu dalaruma tempu udan inan isin rua mak atu partus, komunidade sira bolu ambulasia, maibé tanba estrada la diak, ami tenki leba hodi ultrapasa estrada aat sira ne’e ba to’o iha estrada diak mak ambulasia foin tula Ospitál Gleno” Nia dehan.

Suku Raimerhei iha potensia ba produtu lokal hanesan, batar, Ai-farina, Hudi Modo tahan no kafe, maibé produtu hirak ne’e komunidade sira labele lori ba to’o merkadu Gleno, tanba impaktu husi estrada ne’ebe ho kondisaun aat.

Iha aspétu ekonomiku, kondisaun estrada ne’e mós halo komunidade hasoru difikuldade atu hasai produtu agríkola ba merkadu tanba iha ami-nia área iha produtu barak, hanesan ai-farina, talas, fehuk no kafe, maibé ho kondisaun estrada ne’ebé la diak, komunidade sira susar atu lori produtu sira ba merkadu, inklui ema seluk ne’ebé hakarak sosa no lori sira mai, mós hasoru problema hanesan”.

Adolfo mós husu ba Prezidenti Autoridade Munisípiu Ermera (PAM), atu kordena ho Ministeriu Obras Publika (MOP) hodi toma responsabilidade ba difikuldade ne’ebe komunidade Ermera enfrenta.

“Ha’u hakarak realsa tan ba PAM Ermera no Ministeriu relevante liu-liu Obras Públikas, atu bele toma medidu konkretu no imediatu hodi hadia kondisaun estrada ne’e, tanba konsidera estrada nu’udar fator importante ba asesu saúde, ekonomia no moris di’ak komunidade sira nian”.

Entretantu, Suku Raimerhei Postu Administrativu Ermera Munisipiu Ermera mós iha tempu rezistensia sai baze no abrigu ba konsentrasaun FALINTIL, maibé to’o agora komunidade sira kontinua halerik ba kondisaun estrada.