Diretor Eskola Uza Osan Rasik Dada Ahi, CNRT Husu Atensaun IGE Ba Ma’abat
SAPNewsTL, Dili: Deputadu Bankada CNRT Gabriel Soares husu ba Ministériu Obras Públikas atu haree problemas sira ne’ebé mak Populasaun Suku Ma’abat, Munisipiu Manatuto ne’ebe hasoru hanesan mota ne’ebé sobu no fo ameasa ba komunidade sira
Tuir Deputadu Gabriel Soares, Munisípiu Manatutu iha Suku Ma’abat tinan-tinan iha mota oan ida ne’ebé mak sempre sobu hela de’it wainhira udan bo’ot, be’e sobu husi Merkadu Manatutu to’o iha komunidade ne’ebé hela iha Suku Ma’abat tanba ne’e nian husu ba MOP hamutuk ho IGE atu tau atensaun.
“Iha Munisipiu Manatutu ne’e liga ba to’o iha Suku ida Naran Ma’abat ne’eba ne’e iha mota oan ida ne’ebe mak iha tinan-tinan, bainhira udan bo’ot sempre sobu hela de’it, be’e ne’e sobu husi Merkadu Manatutu nian mai to’o komunidae sira iha Suku Ma’abat ne’e hotu, ami sujere se bele karik Ministeriu Obras Públikas (MOP) liu husi IGE atu tau hela atensaun imediatu i urjenti ba iha fatin refere”. Dehan Deputadu Gabriel Soares iha plenaria extra ordinaria terxa-feira (02/08/2022).
Iha fatin hanesan Deputadu Gabriel Soares hatutan pagamentu segundu faze ba projetu komunitáriu iha Munisípiu sira ne’ebe atraza no husu Ministériu Edukasaun atu bele finaliza projetu komunitariu sira ne’e inklui pagamentu ba segundu faze.
“Liga ho área edukasaun nian kona-ba atrazu ba segundu pagamentu ba projetu komunitáriu ne’e nian iha Munisipiu sira, hanesan iha Munisipiu Manatutu nian iha primeiru pagamentu nian hala’o hotu ona iha fali segundu faze nian atraza tiha fali, iha segundu faze nian atu ba foti osan hodi kontinua kontrusaun nian maibé ba foti osan la iha até agora liu fulan hira ona nia rezultadu la iha, projetu komunitaria ba konstrusaun eskola nian sai paradu hotu kedas até agora i husu Miniteriu Edukasaun atu halo hotu projetu komunitaria sira ne’e tanba orsamentu ne’e kleur ona tau iha fundus ida traferénsia públikas maibe ninia ezekusaun to’o agora ita haree paradu hotu iha dalan klaran”. Tenik Gabriel
Deputadu ne’e hatutan, dehan iha problema ho Agensia de Desenvolvimentu Nasionál (AND) maibé uluk sira dehan laiha problema no sira ezekuta tiha mak ikus mai sai fali problema ho AND nune’e projetu paradu.
Entretantu, Nia mos husu ba Ministériu Edukasaun atu aselera projetu ne’e no aumenta fasilidade ba Eskola Tékniku Vokasional sira tanba iha Manatuto ETV Mauhunu Bukar la iha kadeira ba estudante sira no sira hadia kadeira a’at husi eskola seluk mak bele uza.
“Sira uluk hateten dehan la iha problema, maibé ezekuta tiha ikus rona fali ba katak iha fali problema ho ADN sira, ho ida ne’e husu atu Ministeriu Edukasaun atu aselera lalais tiha ida ne’e tanba paradu kuaze fula tolu no fulan ha’at ona”. Dehan Deputadu Gabriel.
Nia hatutan Diretór Eskola ne’e rasik mak uza nia osan hodi selu ema dada eletrisidade ba Eskola Tékniku Vokasional ne’e.
“Diretor ne’e rasik uza nia osan rasik hodi selu ema hodi bele dada listrik (Ahi) ba iha eskola refere, ita hotu hatene katak edifisiu eskola ne’e la’os Diretor nian maibe governu nian, patrimoniu estadu nian, ita hotu hatene Eskola ne’e gratuita maibé ita mos tenke hatene husi eskola, problema saida mak eskola sira hasoru”. Nia hakotu.
Jornalista : Lidia Amaral
Editor : Luis dos Santos