Dizitaliza Servisu Komisaun Terras & Propriedades! MJ Lansa Website Fasilita Públiku Asesu Informasaun
Imajem : Lansamentu website Komisaun Terras no Propriedades iha Sala Auditorium JM Colmera, Segunda, 07/07/2025.
SAPNewsTL, Díli : Ministru Justiça (MJ) Sérgio Hornai hamutuk ho Diretor Ezekutivu TIC -Timor hala’o lansamentu ofisiál ba website KTP hodi fasilita asesu informasaun ba públiku no aumenta transparénsia iha procesu administrativu terras no propriedades.
Marcela Mery da Costa — SAPNewsTL
Ministru Justiça Sérgio Hornai hateten, lansamentu ne’e mak parte hosi esforsu governu atu digitaliza servisu públiku hodi bele halo prosesu ne’ebé liu hosi KTP sai transparente no asesível ba sidadaun hotu tuir fenomenu dezenvolvimentu teknolojia.
“Mundu modernu hakarak ou lakoi, ita labele hases aan husi teknolojia no modernizasaun, ita presija ajusta ita nia ann ba situasaun modernu nian husi ida-idak no insituisaun estadu ninian no mos privadu sira atu hatan ba fenonenu dezenvolvimentu, evolusaun, dinamika iha ita nia sosiedade.” Dehan MJ Sergio Hornai liu husi nia diskursu iha Sala Auditorium JM Colmera, Segunda, 07/07/2025.
Governante ne’e fundamenta, Ministeriu Justiça koordena hamutuk ho Ajensia TIC-Timor hala’o lansamentu ofisial ba Website, ne’e sei ajuda povu Timor atu hetan informasaun los kona-ba direitu rai nian, no hatama aplikasaun ka halo kestaun online, tanba preokupasaun bo’ot ida mak oinsa tau reafirma, rekonfigura iha area oioin liga ba dinamika teknolojia modernu.
“Ita-nia hanoin atu konhese, oinsa mak atu buka ida diak, prestasaun ida ho kualidade iha area oioin inklui ba dijitalizasaun teknolojia no informasaun ne’ebe mak sai hanesan prioridade ba programa governu nian” Dehan Nia.
Website hanesan forma ida atu halo artikulasaun atu hato’o mensagen, produtu no atividade sira ne’ebe mak ministeriu hala’o ba komunidade sira, timoroan asesu prestasaun servisu ne’ebe ministériu hala’o.
“Lansamentu ne’e hodi fó informasaun ba ita-nia komunidade husi akrividade sira ne’ebe mak ita presta, sientifikamente nu’udar informasaun estadu nian ba komunidade atu iha baze de dadus ida konsolidariu tanba ne’e importante tebes ba teknolojia no informasaun iha mundu modernu ba sosiedade agora”.
Iha fatin hanesan, Diretor Ezekutivu TIC-Timor Venâncio Pinto dehan momentu ne’e importante ba terras propriedade tanba iha ona diskusaun entre MJ ho TIC Timor hodi kontinua halo koneksaun ida husi terras propriedade nasional to’o munisipiu.
Ekipa rua ne’e espera katak fulan oin TIC ho terras propriedade bele halo ona assesmentu husi munisipiu hotu, nune’e bele halo liña integradu ida husi nasional to’o munisípiu, nune’e koneksaun bele diak liutan.
“Ohin, ita bele hamutuk iha ne’e hodi lansa portal Komisaun Terras no Propriedades (KTP), portal ne’e hanesan meios ida ne’ebe fo informasaun, ita bele konsulta iha portal, bainhira ita ba nasaun estranjeiru, ita haree katak ita sei dook tebes tanba ema nia nasaun agora to’o ona iha fase Artificial Intelligience (AI) ho Internet of Things (IOT) ita foin mak iha portal nian”.
Komisaun Terras no Propriedades hein katak website ne’e sei sai plataforma útil ba komunidade, bele fasilita asesu informasaun, diminui tempu prosesu dokumentu, no fo espasu ba feedback públiku kona-ba servisu KTP.
Entretantu, serimonia lansamentu ne’e ofisialmente lansa husi Ministru Justiça Sérgio Hornai hamutuk ho kargu xefia sira, Prezidente KTP, Pascoal da Costa Soares, Sekretáriu Ezekutivu KTP Celito Cardoso Diretor Ezekutivu TIC-Timor, Venâncio Pinto, funsionáriu no jornalista sira.