Dom Virgílio: Joven Banati Tuir Kristu, Servi Ho Domin
Imajem : Dom Virgílio Cardeal do Carmo da Silva iha Aeroportu Nicolau Lobato Comoro, 23/08/2025
SAPNewsTL, Díli : Sua Eminência Dom Virgílio Cardeal do Carmo da Silva SDB, husu ba juventude timoroan sira atu banati tuir kristu liu husi prezensa Kruz Joven Internasional iha Timor-Leste, hodi servi ema seluk ho domin karidade no sakrifisiu.
Tuir Líder Igreja Katólika Timor-Leste ne’e hateten, vizita Cruz Joven Internasionál ho iIlas Maria Salus Populi Romani ba dala rua, prezensa iha timoroan nia le’et abre oportunidade ida bo’ot ba labarik, foin-sa’e, ferik no katuas iha Timor-Leste
“Prezensa Krus Joven Internasionál mai iha Timor-Leste atu fó korajen ba foin-sa’e sira atu banati tuir, kristu hodi servi ema seluk ho domin karidade no sakrifisiu, laos ita atu agradese deit, maibé ita mós tenke aproveita oportunidade ida-ne’e” Dehan Dom Virgílio, liu husi nia mensajen, iha Paroquia Katedral Imaculada da Conceição, Vila-Verde, Sabadu, (23/08/2025)
Arcebispu Metropolitana Dili fundamenta, vizita ida ne’e esensial tebe-tebes tanba, lori oportunidade ba kiik oan sira atu reafirma sira nia fiar ba Maromak, nu’udar sarani hodi servi igreja ho sabedoria.
“Vizita ida ne’e fó husi nai nia grasa hodi hela metin iha ita ida-idak no ba ita nia rain, momentu ida ne’e mós importante ba labarik no foin-sa’e sira, atu sira hetan kna’ar nu’udar sarani hodi servi kreda no nasaun ho domin tuir kristu nia hanorin”.
Dom Virgílio hatutan, ho prezensa kristu nian, iha timoroan nia le’et sai korajen bo’ot ba foinsa’e katólika sira, atu hare ba Krus Joven no banati tuir ezemplu kristu ne’ebé murak husik hela iha Kruz.
“Tinan ida ne’e povu Timor hetan grasa oin-oin liu-husi vizita Cruz Joven Internasionál nu’udar sarani timoroan, ita sente kontente tebes, maski ita-nia nasaun ki’ik, maibé iha Maromak nia oin ita la’ós ki’ik, tanba ita folin iha Maromak nia matan, ita tenke agradese ba Maromak,” Tenik Nia.
Cardeal hatutan, memoria timoroan nian sei nakonu ho vizita maktoban Santu Padre Papa Francisco nian sai hanesan grasa ba povu no sarani tomak, tinan ida ne’e sarani timoroan simu tan vizita husi Cruz Joven Internasionál
“Ita lembra ba kotuk loron sia (9) fulan Setembru 2024, Timor-Leste simu vizita hosi Santu Padre Papa Francisco, agora mós vizita Krus Joven Internasionál hamutuk ho iIlas Maria fó sinal rekonhesimentu extraordináriu ba Timor”.
Entretantu, Dom Virgílio Cardeal do Carmo da Silva, hato’o mensajen ba Juventude sira katak krus maka ita nia esperansa, tinan ida-ne’e mós nu’udar tinan Jubileu, ne’e esperansa ida ne’ebé fó ksolok ba povu Timor-Leste.