Ecuador : Sarani Sira Selebra Misa Funeral Ba Maktoban Pe. Enio Esteves

Imajem : Misa Funeral Ba Pe. Enio Esteves iha Ecuador, 29/01/2026.

Sapnews Pro, Ecuador : Ligadu ho asidente aero ne’ebe halakon ema na’in tolu nia vida, Sarani Ecuador selebra misa Eukaristia Funerál ba Pe. Enio Esteves, SDB, iha Katedrál Purísíma, Macas.

Misa eukarístika ne’e prezide direta hosi Vigáriu Apostóliku Méndez Mons. Néstor Montesdeoca no akompaña hosi Pe. Marcelo Farfán.

“Ita hotu hamutuk iha orasaun atu husu deskansu eternu ba ita-nia maun misionáriu Padre Énio Esteves”. Hateten Vigáriu Apostóliku Méndez Mons. Néstor Montesdeoca, Ecuador, 29/01/2026

Iha sorin seluk, Komunidade Wasakentsa halo mós omenajen póstumu ba Pe. Enio Esteves (+), misionáriu ida ne’ebé husik legadu boot ida iha labarik sira, joven sira no família sira iha misaun Amazónia sira.

“Ami fiar katak agora nia hela haksolok iha Maromak nia prezensa”.

Nune’e mós sarani Bomboiza halo misa no fo omenajem ba Padre Énio Esteves hodi hakerek katak laiha domin ida ne’ebe boot liu ema ne’ebe saran nia moris ba nia belun sira.

“Ho serteza katak laiha domin boot liu husi ema ne’ebé fó nia moris ba ema seluk, ami hahú loron primeiru husi #tríduu iha Koléjiu “ETSA”, ho lema “halo saida mak nia hatudu ba imi”.

Hanoin hikas kazamentu Caná no kompromisu atu rona no hakmatek ba Jesus, hanesan mos Pe. Enio Esteves ne’ebé fahe nia moris no nia testemuñu iha povu Shuar no Achuar sira iha Ekuador.

Moris no misaun Pe. Enio Esteves sai hanesan ezemplu domin loos no servisu laran-luak no domin nian ne’ebé kontinua moris no buras iha labarik sira, joven sira no komunidade sira ne’ebé nia servi ona.

Husi Eukaristia funerál to’o ba triduu no orasaun hamutuk, “ita reafirma ita-nia fiar no esperansa katak ema ne’ebé fó nia moris ba sira seluk la lakon, maibé moris nafatin iha Maromak nia prezensa no iha testemuñu ne’ebé ita hotu presiza atu kontinua”.

Fo hanoin fali katak Padre Énio Esteves hakotu iis tanba sofre ba asidente aviaun monu iha Ecuador, hafoin halo asaun komunitariu iha Provínsia Morona Santiago.

Vítima sira ne’ebe identifika mak hanesan Padre Enio Esteves SDB. (Pastor Parokia Zona Achuar), Kapitaun Danny Patricio López (Pilotu no jerente kompañia Aero Morona) no Roberto Wisum Tsamaraint (Sekretáriu Misaun Wasakentsa).

Vítima sira ne’ebé mate, komunidade sira konsidera sira ativu tebes iha atividade sosiál no relijiozu iha Provínsia Morona Santiago.

Fo hanoin mós katak Komunidade Salesianu Dom Bosco iha Timor-Leste sei selebra mós misa ba Padre Énio Esteves iha Igreza Parokia Maria Auxiliadora Comoro, oras 18:00 otl, loron 29 Janeiru 2026.