Eis MSSI, Sekretariu Jerál OPMT Florentina Hakotu Iis Iha HNGV
Imajem : Sekretariu Jerál OPMT Florentina Smith. Foto : Média Sosial
SAPNewsTL, Dili : Eis Ministra Solidariedade Sosial no Inkluzaun (MSSI) iha sétimu governu konstitusional, atual Sekretariu Jerál Adjunta Partidu FRETILIN & Sekretariu Jerál OPMT, Florentina Smith hakotu nia peregrinasaun iha mundu.
Marciana da Conceição – SAPNewsTL
Ohin, Sekretariu Jerál Adjunta Partidu FRETILIN no Sekretariu Jerál OPMT Florentina Smith remata nia peregrinasaun iha mundu, wainhira hala’o tratamentu ba nia saúde iha Hospital Nasional Guido Valadares (HNGV) Bidau Dili.
Wainhira rona katak Eis Ministra Solidariedade Sosial no Inkluzaun (MSSI) iha sétimu governu konstitusional ne’e hakotu iis, Sekretariu Jerál Partidu FRETILIN Mari Bin Amude Alkatiri to’o iha Mortuariu HNGV Dili hodi haree no fo omenajem.
Eis Ministra Solidariedade Sosial no Inkluzaun (MSSI) iha sétimu governu konstitusional, Florentina Smith hakotu iis iha Sexta-feira, Loron 22 fulan Agostu tinan 2025.
Lembra fali katak, wainhira Mídia Sapnews selebra aniversáriu ba datoluk iha Salaun Instituto Superior Cristal, Saudoza Florentina Smith ho laran ksolok ba partisipa no fo mensagem ba ezekutivu SAP News katak nia parte orgulhu wainhira joven sira hatudu ninia sentidu responsabilidade no fo ninia komitmentu hodi hari’i média.
“Ha’u kontente los mai partisipa imi-nia aniversáriu SAPNews, imi hakerek revista Papa Francisco, imi halo filmajem, imi halo kobertura no imi hatudu imi-nia responsabilidade ba nasaun, joven ne’e tenki hanesan ne’e”.
Florentina dehan teni, “Imi kontinua ba oin hamutuk, imi bele halo buat ne’ebe laos ema barak halo, imi ba oin nafatin konta ho ha’u nia apoia, ha’u orgulhu tebes haree imi-nia prestasaun”.
“Imi kontinua defende lialos, hatutan joven nia lian no defende direitu ema hotu nian, parabéns ba imi hotu iha SAPNews, ha’u nia oan no beioan sira”. Hateten Florentina Smith ba Diretor Ezekutivu SAPNews wainhira dada lia iha Salaun Instituto Superior Cristal Balide, 26/02/2025.
Saudoza Florentina Smith ba ho Maromak, la’o ho Maromak no hamutuk ho Maromak, obrigadu barak ba dedikasaun tomak. Adeus no adeus.
Hafoin notisia ne’e públika, SAPNews seidauk halo komfirmasaun ho parte família kona ba kauza hakotu iis no ninia prosesu Funeral.
Nune’e, SAPNews sei kolleta informasaun kompletu hafoin sei publika iha oras tuir mai.