Enkontru Ho Klube Sira ! Maiu, LFTL Realiza Liga Timorense 2025
Imajem : Ezekutivu LFTL hala’o enkontru ho estrutura klube sira iha salaun Xanana Sport Center Bairro Formosa, Dili, 15/03/2025.
SAPNewsTL, Dili : Orgaun Liga Futebol Timor-Leste (LFTL) prontu ona realiza Liga Timorense epoka 2025 hafoin aprezenta planu liu husi enkontru ho membru klube sira divizaun dahuluk sanulu no divizaun daruak hitu.
“Ohin enkontru dahuluk ami husi estrutura foun LFTL ho ami nia membru klube sira atu koalia katak estrutura orgaun liga prontu ona atu realiza liga, tan ne’e liu husi enkontru ami mos husu opiniaun klube sira nian ho preparasaun, nune’e bele hala’o liga iha fulan maiu ne’ebe klube sira antusiazmu tebes hakarak liga la’o lalais tanba para kleur ona, tan ne’e sira husu orariu jogu”, dehan prezidente LFTL Ipolito Soares ba jornalista sira iha salaun Xanana Sport Center Bairro Formosa, Dili,15/03/2025.
Prezidente hatutan, oráriu tentiva liga nian orgaun liga prepara ona jogu komesa iha loron 9 fulan maiu 2025, semana orgaun liga sei enkontru para halo orariu fiksu, nune’e fo sai ba klube sira halo preparasaun.
Ipolito informa tan, orsamentu orgaun liga sei esforsu buka finanseiru dolar amerikanu millaun sanulu tanba liga sei la’o durante fulan neen ka hitu no kustu operasional makaas liu tanba sei joga iha munisipiu Baucau no Ermera, finanseiru ba liga orgaun liga sei halo proposta ba parte governu ho FFTL no mos buka patrosinador nasional no internasional.
Nia salienta tan, janela tranferésia ba jogador sira orgaun liga sei fo sai ba klube iha semana oin, nune’e klube sira halo kontratu ba jogador sira.
Iha fatin hanesan, Prezidente Klube Karketu Dili FC Luis Oliveira dehan, enkontru ohin ne’e pozitivu tebes orgaun liga prepara ona orariu tentiva Liga Timorense komesa iha loron 9 fulan maiu 2025.
“Enkontru ida ohin ne’e pozitivu tebes, pasu dahuluk atu hala’o liga, nune’e ami klube kontente ohin mai rona resposta ida husi orgaun liga katak orariu tentiva loron 9 fulan maiu 2025, ita komesa liga epoka 2025 nune’e ami mos fila husi enkontru ne’e, ami husi klube sira bele koalia ho jogador sira para halo preparasaun ona”, tenik Luis
Luis hatete tan, sira mos ohin ko’alia subsidiu ba klube sira katak dollar amerikanu rihun hitu nulu ba klube divizaun dahuluk no dollar amerikanu rihun tolu nulu ba klube divizaun daruak hodi ida ne’e klube sira mos buka tan sponsor sira para halo liga ne’e rame liu tan.
Entretantu Klube hamutuk 17 mak sei partisipa Liga Timorense epoka 2025, klube sanulu iha divizaun dahuluk no klube hitu iha divizaun daruak.
Jornalista : Augusto dos Santos
