“Esforsu & Servisu Makaas” ! Armanda Deklara KHUNTO Sei Hetan Votus Barak Iha 2027 No 2028

Imajem : Presidente Partidu KHUNTO Armanda Berta dos Santos iha Maliana, 02/08/2025.

SAPNewsTL, Bobonaro : Partidu Kmanek Haburas Unidade Nasional Timor Oan (KHUNTO) realiza konferensia munisipal hodi kontinua halo reajustamentu estrutura, fo pose ba estrutura foun no simu afialiasaun hosi militante CNRT & PD iha Munisipiu Bobonaru.

Ermelinda Soares – SAP News – TV

Presidente Partidu KHUNTO Armanda Berta dos Santos garante katak estrutura husi munisípiu Bobonaro sei servisu makaas hodi hetan votus maioria iha eleisaun presidensial no parlamentar tinan 2027-2028.

“Ha’u fiar katak Bobonaro oan sira sei servisu hamutuk ho estrutura foun sira ne’ebe simu pose hodi servisu no tau konfiansa ba malu, ita bele hetan votus barak liutan iha eleisaun 2027 no 2028”. Hateten Presidente Partidu KHUNTO Armanda Berta dos Santos iha Maliana, 02/08/2025.

Prezidente Partidu KHUNTO ne’e dehan atu halo desenvolvimentu ba povu no nasaun, KHUNTO oan sira tenki servisu, esforçu no buka konfiansa hosi povu,hafoin bele atinji mehi ne’ebe partidu kuda.

“Fiar ho ita-boot sira nia prezensa, votus sei bele aumenta barak liu tan iha 2027 to’o 2028, maibe presiza servisu mak bele atinji mehi ne’ebe mak ita hakarak, karik Partidu manan iha 2027 no 2028, presiza ita-boot sira-nia kapasidade atu hamutuk haree ba dezemvolvimentu, entaun agora tenke esforsu an.”Dehan Armanda Berta

Iha fatin hanesan, Konseleiru Masimu Partidu KHUNTO José dos Santos Naimori Bucar husu estrutura munisípiu Bobonaro prepara an hodi sai líder ne’ebe di’ak, hanoin no halo polítika ne’ebe di’ak mai husi fuan, polítika labele mai husi matan tanba matan bele hamosu buat ne’ebe la di’ak iha povu nia oin.

“Halo polítika ho fuan, prepara an sai lider diak, halo polítika ne’ebe aban bainrua sai valor ba ema hotu-hotu no lori nasaun ba oin, polítika ne’ebe diak tenke mai husi fuan, politik laos mai husi matan, halo polítika ne’eve ita atu dudu nasaun ba oin”.

Naimori Bucar mós fo agradese ba afiliante sira no estrutura foun sira, nia parte husu atu hatiku aten brani no hatan ba situasaun polítika iha Timor-Leste.

“Agradese ba estrutura foun maibe tenke brani hodi responde ba polítika ne’ebe la’o iha imi-nia oin, polítika ne’e la fasil, polítika ne’e manas no midar sin mai dala ida”. Nia sublinha

Lider Masimu Partidu KHUNTO husu deskulpa ba povu no komunidade Cailaco kona-ba akontesimentu iha loron 20 fulan Maiu 2025 ne’ebe rezulta joven ida lakon vida, nune’e nia husu ba joven sira hodi hamutuk lori Timor-Leste ba oin.

“Kazu Cailaco, ho haraik an ha’u lori lider hanesan Partidu KHUNTO husu deskulpa ba problema ne’e, ha’u hakarak imi hamutuk hodi lori nasaun ne’e ba oin”.Naimori husu

Iha sorin hanesan, atual Xefe Aldeia Holsa Rofino Carlos, militante ativu CNRT ne’ebe halo afiliasaun ne’e deklara hakarak hamutuk fali ho Partidu KHUNTO tanba lakohi promesa falsu sira, nune’e deside hamutuk ho KHUNTO hodi halo dezenvolvimentu ba Munisípiu Bobonaru.

“Ha’u mai hamutuk ho Partidu KHUNTO tanba ha’u hakarak servisu hamutuk hodi hadia buat ruma iha Bobonaro ne’e, tanba barak ukun ona mas bosok mak barak, ko’alia mai promete, promete mais rezultadu laiha, ha’u la mai mesak, povu no joven barak hakarak mai, ha’u reprezenta sira mai hamutuk ho Partidu KHUNTO”.Afirma Xefe Aldeia Holsa Rofino Carlos

Entertantu, konferensia ne’e simu afialiasaun husi Partidu CNRT no PD, afilisaun ne’e simu direita husi Prezidente KHUNTO, Armanda Berta dos Santo no Koselleiru Masimu Partidu KHUNTO, Jose Dos Santos Naimori Bucar) no estrutura ne’ebe hetan partisipasaun masimu husi militante sira husi postu neen iha munisipiu Bobonaro.