Espíritu Kruz Joven ! “Badinas Halo Diak, Kria Paz & Hadomi Malu”
Imajem : Vizita Kruz Joven Internasional iha Dili, 30/08/2025.
SAPNewsTL, Díli : Durante misa enseramentu ba vizita Kruz Joven no Illa Na’in Feto, Kardeal Dom Virgílio dos Carmo da Silva husu timoroan hotu hodi hatudu domin, karidade no hadomi malu.
“Ohin loron ita fo obrigadu, momentu furak ida ita agradese, ita hamutuk hodi fo agradese ba Maromak ba buat furak no diak tomak ne’ebe ita hetan”.
“Depois tinan 26, ita hetan vizita hosi Kruz Joven Internasional, oinsa mak atu ita agradese ba Maromak”, agradesimentu ne’e mós liga ba loron konsulta popular ne’ebe rezulta Timor-Leste hetan ukun rasik, Dehan Dom Virgílio Cardeal do Carmo da Silva iha Igreja Katedral Díli, 30/08/2025
Dom Virgílio hatutan, ohin mak tempu atu hatudu domin liu hosi asaun karidade, hadomi ema no badinas halo diak iha moris ne’e.
“Leitura sira konvida ita kona-ba domin, domin ne’ebe fo fuan no ativu laos domin ne’ebe indiferente. Domin ne’ebe iha karidade, tulun malu, hadomi malu, hahi no louva ba buat diak”.
“Domin ne’e kontinua dejafia ita atu badinas halo buat ne’ebe diak, keta baruk atu halo buat ne’ebe diak, sai ema ne’ebe iha responsabilidade”. Cardeal sublinha
Nia hatutan, liu tiha tinan 26 loron konsulta popular, istória ne’e fanun timoroan sira hodi buka sai badinas liutan halo diak no hametin liutan ita-nia fiar, haree ba sinal kruz nian, foti neon no fuan hodi hahi Maromak.
“Moris ne’ebe Maromak fo ba ita atu halo diak, salmu dehan moris ne’e grasa ida, buat ne’ebe Maromak fo ba ita uza ho didiak no desenvolve buat ne’ebe Maromak fo ba ita”.
“Keta tauk, hahi no fo onra ba Maromak, konvite ba ita atu fiel, servisu makaas no moris ne’ebe integral iha fiar, hanoin no hahalok sai ida deit, haksolok iha moris lorloron, keta lakon oportunidade ne’ebe Maromak fo ba ita”.
Dom Virgílio husu ba joven sira hodi hateke ba kotuk, refleta pasadu hodi badinas estuda, hakribi violênsia no hamutuk kria damen iha sosiedade.
“Badinas halo buat ne’ebe diak, joven badinas estuda, kontribui ba desenvolvimentu, hakribi problema no konflitu, hamutuk kria paz no estabilidade iha ita-nia rain”.
“Ema sarani laos devosaun pessoal maibe ne’e sai kristianismu ne’ebe empenhu ba justiça, fraternidade, paz no moris diak”.
“Ita haree ba kotuk, ita-nia dezeju atu hakat ba oin, desenvolve liu tan buat ne’ebe Maromak tau ba ita-nia liman, hamutuk hametin liu tan terra de Santa Maria no Terra de Santa Cruz”. Tenik Dom Virgílio
Hafoin misa agradesimentu, sarani sira hamutuk uma hierarquia igreja katólika akompanha Kruz Joven Internasional no ilhas Na’in Feto to’o Aeroporto Internasional Nicolau Lobato hodi entrega ekipa delegasaun no kontinua ba vizita Tailândia.