Espíritu Natál Inspira Sarani Hatene “Haraik An, Simples, Respeitu & Hadomi Malu”.

Imajem : Padre Guilhermino da Silva iha Igreja Motael, 24/12/2025

SAPNewsTL, Díli : Paroku Parokia Santu António Motael Pe. Guilhermino da Silva hateten selebrasaun natal hanesan festa dame nian tanba Jesus nia prezensa atu kria dame no konvida ema atu hatene haraik an, respeitu no hadomi malu nu’udar Maromak oan.

Iha intrevista ho Amu Parokia Santu António Motael Pe. Guilhermino da Silva haktuir Maromak mai moris iha mundu tanba maromak hadomi nia kriasaun sira, nune’e maromak hakbesik ba nia ema atu horik ho nia ema sira.

“Iha refleksaun ne’ebe ha’u halo iha missa ohin ne’e hakarak hateten katak Maromak tun mai rai atu hasoru ita, konvida ita atu lori ita ba Lalehan, Maromak tun mai rai halo an sai ema tanba Maromak hadomi ita Maromak hakarak hakbesik an ba ita, moris ho ita iha ita-nia situasaun tomak, iha ita nia frazilidade hanesan ema iha moris loron-loron nian, Maromak halo ida ne’e tanba Maromak hadomi nia kriasaun”. Dehan Pe. Guilhermino da Silva hafoin missa vijilia natal iha igreja Santu António Moatael Dili, 24/12/2025.

Pároku Santu António Motael ne’e hatutan natal nu’udar festa dame tanba ne’e konvida ema hotu atu kria dame hodi dame ho an rasik hafoin dame ho ema seluk.

“Iha selebrasaun natal ita selebra festa dame, Maromak mai moris iha rai atu halo ita hetan dame, primeiru dame ho ita nia an rasik hafoin dame ho ema seluk, dame ho ita nia an rasik katak ita-nia pekadu no, frazilidade, ita nunka hetan hakmatek lolos iha moris tanba ne’e ho Jesus nia prezensa ita hakarak kria dame iha ita nia fuan, dame ida ne’e halo ita hakmatek no hakmatek ida ne’e la’os hakmatek ida ne’ebe aparensia de’it maibe hakmatek ida ne’ebe mai husi ita-nia rekonsiliasaun ho ita-nia Maromak ne’ebe mai atu soi ita”. Tuir Pe. Guilhermino

Padre Guilhermino haklean “Iha mundu avansadu, mundu teknolojia dijitalizasaun liuliu media sosial, ema hotu tenke aprende haraik an respeitu no hadomi ne’e importante, se ita loke, ita halo defamasaun ruma, ita hatun ema iha media sosial, ita tenke hanoin katak ita la iha dignidade hanesan ema ne’ebe Maromak fo atu respeitu ema, Maromak konvida ita atu respeitu tanba ne’e ita respeitu ita-nia maluk hanesan mos ita respeitu maromak” Tenik Amo Guilhermino

Amo Guilhermino subliña ho espíritu natal nian ne’e ema hotu-hotu tenke aprende haraik an,
“Natal konvida ita atu haraik an, natal konvida ita atu hatene moris hanesan ema simples”.

“Jesus rasik moris iha fatin ne’ebe simples, nia la mai moris iha fatin luxu maibe Nia moris hanesan ema ne’ebe simples, nune’e mos ema ne’ebe simu Nia, ne’e mos laos ema Nai ulun laos ema boot ida maibe ema simples ida mak primeiru simu nia mai iha raiklaran ida ne’e tanba ne’e Timor oan sira ema Katolika sira tenke aprende husi Jesus”.Katak Nia

Padre Paroku Motael informa “Ema hotu iha esperansa atu sai ema foun iha tinan foun tinan foun tenke halo buat foun, hanesan ema tenke hadia ita-nia vida hanesan ema Timor oan”.

“Ita buka atu halo buat ne’ebe diak liu, liu husi ita-nia atitude, dezenvolve ita-nia an, nasaun no familia diak liu tan, se iha tinan ne’ebe ita atu husik liu ne’e iha buat balun la diak buka atu iha tinan foun ne’e halo diak liu tan, tinan foun halo buat foun, halo buat ne’ebe diak liu”.

Entretantu, Padre Guilhermino nia esperansa ba tinan foun ne’ebe sei mai maka ema hotu sei moris iha paz no prosperu.

“Buat ne’ebe ha’u espera iha tinan foun hanesan povu Timor mak primeiru ema hotu tenke moris iha paz, segundu ema hotu tenke pelumenus to’o iha nivel ida moris prosperu iha espiritual nomos iha vida material nian liu-liu iha vida ekonomia”.

“Konserteza ba moris prosperu ida ne’e ita so bele hetan kuandu kondisaun ekonomia iha Timor Leste ne’ebe di’ak, se mak halo ida ne’e, estadu mak halo ida ne’e, estadu mak kria prosperu ba povu Timor”. Nia hakotu