Estabilidade Governativa Importante, PD Sei Deside Ba Entre Partidu CNRT & Plataforma

SAPNewsTL, Dili : Relasiona ho senariu governasaun dasia iha tinan 2023, Deputado Bankada Partidu Democratiku (PD) António da Conceição ‘Kalohan, haktuir Partidu mais votadu Congressu Nasional Rekonstrusaun Timorense (CNRT) mak autor prinsipal hodi garante estabilidade governativa no normaliza situasaun nasaun nian

“Perspetiva estabilidade ida atu halo konstrusaun Timor ida ba oin, ema hotu tenki tenta, hanoin no kontribui para depois de normaliza fila fali ita nia situasaun ba oin ho diak, nune’e ita bele ba oin di’ak liu tan ho estabilidade governativa ne’ebe depende ba Partidu mais votadu Congressu Nasional Rekonstrusaun Timorense (CNRT)”. Tenik Deputado Bankada Partidu Democratiku (PD) António da Conceição ‘Kalohan, iha Uma Fukun PN, Dili 29/05/2023

Sekretariu Jeral PD ne’e akresenta, “Se iha ona diferensa estratéjia governasaun ninia agora ida hakarak hamosu ninia alternativu, nia tenke la’o rasik para hodi fo duni resposta, saida mak durante ne’e nia iha espetativu, estabilidade importante, maibe mos mai ho aktus governativus ne’e rasik ne’ebe atu responde ba saida mak ita hakarak atu haree mudansa ne’e rasik.” Deputado Sublinha

Alende ne’e, relasiona ho governasaun dasia, PD se halo reuniaun superior hodi deside no hatur nia pozisaun ba governasaun ida ne’ebe sei mai

“Kona-ba koligasaun Partidu mais votadus, PD iha mekanismu atu halo dezisoens sira, PD sei iha nia reunian superior partidu atu halo avaliasaun ida ba situasaun hotu hodi bele haree oinsa governasaun ida mai ne’e, Depois ami halo dezisoes atu ba CNRT ka Plataforma ne’e buat ne’ebe mak iha dalan atu halo, ba PD vizita ne’ebe ofisial parte ida Komunikasaun la kesi ita konsidera hanesan desizaun”.nia hatete

Antonio Kalohan reforsa, “Ami agora aktulmente posisaun mak CNRT ho PD, ami mak hamutuk kontesta governasaun ida ne’e tanba ida ne’e mak ha’u dehan tenke ser la’o iha mudansa ne’ebe mak hakarak, se mudansa ne’e atu halo signifika tenke hasoru fila fali politika aktual kontesta malu partidu laos kontesta malu politika partidu nian ba ukun.” Hakotu Deputado PD António da Conceição ‘Kalohan

Enkuantu, Bazeia ba dadus ne’ebe SAPNewsTL asesu liu husi Sekretariadu Tekniku Administrasaun Eleitoral (STAE) hatudu katak Partidu Congresso  Nacionál Para Reconstrução de Timor (CNRT) mak sai Partidu Mais Votadu ho votus 288.101 ho 41,62 pursentu ne’ebe koresponde ba kadeira 31

Partidu Frente Revolucónario Timor Leste Independente (FRETILIN)  hetan votus hamutuk 178.248 ho 25,75% ne’ebe koresponde ba kadeira 19, portantu Partidu FRETILIN lakon kadeira 4 iha Eleisaun tinan ne’e, maske iha tinan 2020 FRETILIN viabiliza guvernu hodi hatan ba krize polítika, dezastre naturais, pandemia kovid 19 no problema social sira ne’ebe mosu iha Timor Leste

Partidu Demokrátiku (PD) ne’ebe sai opozisaun durante tinan 5 iha Parlamentu Nasionál okupa terseiru lugar ho votus 64.492 ho 9,32% koresponde ba kadeira neen (6), nune’e PD aumenta kadeira ida iha eleisaun parlamentar tinan ne’e

Partidu Kmanek Haburas Unidade Nasionál Timor Oan (KHUNTO) sai kuartu lugar iha eleisaun ne’e ho votus 52.021 ho 7,52% koresponde ba kadeira lima (5), portantu Partidu KHUNTO mantein kadeira 5, maske antes ne’e hola parte iha oitavu guvernu konstitusional

Entretantu, Partidu Libertasaun Popular (PLP) ne’ebe lidera guvernu daualu atual mos hetan votus total 40.696 ne’ebe koresponde ba 5,88% koresponde ba kadeira haat iha eleisaun tinan ne’e, enkuantu PLP antes hetan kadeira 8 iha eleisaun Parlamentar 2017, rezultadu ne’e kritíku tebes ba PLP tanba, lidera hela guvernu maibe, infelizmente kadeira tenki tun iha eleisaun ne’e

Partidu Os Verdes de Timor (PVT) hetan votus ho total 25.100 ho 3,63%, nune’e PVT seidauk liu barreira 4% husi Lei Komisaun Nasional Eleisaun (CNE sigla Portuges), inklui Partidu Unidade Desenvolvimentu Demokratiku (PUDD) mos seidauk liu barreira 4% tanba foin hetan votus hamutuk 21.696 ho 3.13%, Porantu partidu polititiku sanulu seluk sura ho votu kada Partidu la konsege to’o 1% husi eleitor hamutuk 292.169 iha rai-laran no rai-liur

Enkuantu, atu harii governu foun nia dalan maka hartuur ona iha Konstitusaun RDTL artigu  106 n.o 1, Primeiru-Ministru partidu ne’ebé hetan votu barak liu ka partidu sira iha aliansa ho maioria parlamentár maka hatudu. Signifika negosiasaun foun hodi  hari’i Nonu Governu Konstitusional lidera husi CNRT hanesan partidu mais votadu

Nune’e, senáriu foun ba Nonu Governu Konstitusional ne’ebe Ideal entreformasaun guvernu ne’ebe unidade nasional, aliansa maioria parlamentar, guvernu inkluzaun;

1. CNRT+PD [ 31+6 = 37 kadeiras ] ; 2. CNRT+FRETILIN [ 31+  19= 50 ] ; 3. CNRT+PLP [ 31+4= 35 kadeiras ]  ; 4. CNRT+KHUNTO [ 31+5 = 36 kadeiras ] ; 5. CNRT+PD+FRETILIN [ 31+ 6+ 19 = 56 kadeiras ] ; 6. CNRT + PD+PLP [ 31+6+ = 41 kadeiras ] ; 7. CNRT+PD+KHUNTO [ 31+6+5 = 42 kadeiras ] ; 8. CNRT +FRETILIN+PLP [ 31+19+4 = 54 kadeiras ] ; 9. CNRT+FRETILIN +KHUNTO [ 31+19+5 = 55 kadeiras ]; 10. CNRT+PLP+KHUNTO [ 2018 EA ] [ 31+4+5 = 40 kadeiras ]

Jornalista : Ermelinda Soares