SEJD & KOICA Realiza Sports Youth Camp 2023

SAPNewsTL, Dili: Sekretariu Estadu Juventude Desportu (SEJD) ho Korea International Cooperation Agency (KOICA) realiza Sports Youth Camp 2023 hodi fo biban ba jogador sira durante ne’e hala’o treinamentu iha KOICA nian atu aumenta kuñesimentu laos joga deit iha kampu laran.
“Ohin SEJD hamutuk no KOICA, ita realiza Youth Camp ba jogador sira durante treinu iha FC Dezenvolve, programa ne’e tanba ita nia governu liu husi SEJD servisu hamutuk ho KOICA hala’o sports for Children development project in Timor-Leste, iha akampamentu ida ne’e jogador sira sei aprende iha area oi-oin FC Dezenvolve iha tanba labarik laos aprende deit futebol maibe sira hatene kona ba nutrisaun, primeiru sokoru, anti dopazen, life skill no igualdade jeneru”, tenik diretor nasional desportu SEJD Cesarino da Costa ba jornalista sira iha resintu edifisiu SEJD Lecidere, Dili sabadu (27/06/2023).

Diretor hatutan, akampamentu ne’e fo espasu ba jogador sira idade 8 to’o 16 hodi dezenvolve sira nia karakter rasik hodi aprende informasaun oi-oin hanesan servisu ekipa, lideransa no komunikasaun diak laos aprende futebol deit jogador sira ne’e tuir akampamentu ne’e mai husi FC Dezenvolve ne’ebe kria husi KOICA no SEJD.

Cesarino informa, SEJD halo akordu ho KOICA kria FC Dezenvolve ne’e governu prepara fasilidade mak kampu treinamentu ho halo rekrutamentu ba Timoroan sira iha kapasidade ba area futebol nian no esperansa governu nian ba oin governu nafatin realiza programa ne’e hamutuk ho KOICA atu nune’e labarik sira gosta futebol bele mai aprende atu nune’e bele reforsa klube sira iha futuru mai.

Iha fatin hanesan project Leader KOICA Chang Young Park hatete, ohin sira realiza akampamentu ba jogador sira iha FC Dezenvolve ne’ebe sira halo rekrutamentu iha fulan marsu atu nune’e sira bele aumenta kuñesimentu laos iha futebol deit.

“Ohin ita realiza Youth Camp ida ne’e tanba iha fulan marsu ita halo rekrutamentu ba jogador labarik sira hamutuk nain-288, mane nain-188 no feto nain-180 tama iha futebol akademiku FC Dezenvolve, sira hala’o sira nia treinamentu iha fulan abril nune’e jogador sira partisipa akampamentu ohin nian hamutuk 144 iha tempu dader no loraik no ita sei halo tan akampamentu daruak ba jogador nain-188 iha fulan juñu atu nune’e sira bele aprende kona ba nutrisaun, primeiru sokoru, anti dopazen, life skill no igualdade jeneru laos futebol deit “, tenik Chan
Chan haforsa tan, objetivu husi akampamentu ne’e atu aumenta sira nia kuñesimentu kona ba nutrisaun, primeiru sokoru, anti dopazen, life skill no igualdade jeneru atu nune’e sira bele sai futebolista diak iha Timor-Leste nune’e iha tinan 2023 sira realiza akampamentu ba jogador sira dala rua ida sira realiza iha fulan maiu no sei realiza tan iha fulan juñu no materia sira iha tinan ne’e diferente oituan ho tinan kotuk nian tanba tinan ida KOICA halo akampamentu dalarua ba jogador sira iha FC Dezenvolve.