Estudante FECT-UNTL Transmite Materia Geologia Ba Kanorin Eskola IHSM Likisa
SAPNewsTL, Likisa : Estrutura Nucleo Departamento Geologia e Petróleo hamutuk ho estudante sira husi Departamentu Geologia e Petróleo, Faculdade de Engenaria Ciência e Tecnologia UNTL halo sosializasaun kona ba Introdusaun Geologia ba estudante sira iha Eskola Sekundária Katólika Immaculate Heart Of Mary School (IHSM) Tibar.
Xefe Nucleo Geologia e Petróleo, Abilio Isac Casimiro Lopes fo agradese ba Diretora da Eskola tanba autoriza ona sira hodi hala’o aktividade sosializasaun ida ne’e.
“Ha’u agradese ba Diretora da Eskola ne’ebé autoriza ona ami hodi ami bele hala’o atividade sosializasaun Jeolojia ba estudante sira iha eskola ida ne’e no ami agradese ba Profesór sira no estudante sira hotu ne’ebé iha vontade tebes hodi partisipa iha sensibilizasaun ida ne’e”. Dehan Xefe Nucleu Departamentu Geologia e Petrélo FECT-UNTL liu husi WA iha Eskola IHSM Tibar , Kurta-Feira, 17/08/2022.
Xefe Nucleo ne’e hatutan atividade ne’e realiza tanba apoiu maksimu husi Profesor Departamentu Geologia e Petróleu
“Atividade sosializasaun material jeolojia ba eskola sekundária sira ne’e, iha inisiativa rasik husi estrutura Nucleo Departamento Geologia e Petróleo hamutuk ho estudante jeolojia petróleu no hetan apoiu maksimu husi Direktor Departamento Geologia Petrélo no Dosente sira”. Nia informa
Iha fatin hanesan, Diretora Eskola IHSM Madre Gilberta de Jesus Sarmento SFSC hateten estudante Geologia e Petroleo ne’ebé mai iha eskola ne’e atu sosializa materia jeolojia
“Ha’u apresia ba estudante sira tanba ho laran kamaan bele hakat mai hodi Sosializa materia siensia jeolojia hanesan introdusaun jeolojia, risku jeolojia no rekursu jeolojia iha Timor Leste no mos uso de rekurus jeolojia ba alunus sira iha eskola ne’e”. Tenik Direktora
Iha fatin hanesan Profesor da Materia Geologia,Vitorino Fernandes Ximenes agradese ho estudante Geologia e Petróleo tanba bele fo biban hodi transmite siensia ba alin sira
“Ha’u mos agradese teb-tebes ho prezensa husi estudante Departamentu Geologia e Petroleo, husi Faculdade de Engenharia UNTL nian tanba bele hakat ona mai iha ami nia eskola hodi fahe material jeolojia ba estudante sira iha eskola ida ne’e”. Tenik Professor da Materia
Entretantu, hafoin sosializasaun estudante Geologia e Petróleo sira mos hala’o jogu amizade ho estudante sira husi Immaculate Heart of Mary School Tibar hodi hametin lasu amizade entre estudante Geologia no IHMS.
Enkuantu, estudante ne’ebé partisipa iha sosializasaun refere hamutuk ema nain lima nulu (50) kompostu husi 10º ano, 11º ano no 12º ano CT hamutuk ho Profesór sira.
Jornalista : Luis dos Santos
Editor : Ekipa Editorial