Falesimentu Traballador Manuel ! SEFOPE & Família Triste Lakon Herói Ba Desenvolvimentu
Imajem : Família simu mate-isin Manuel de Albuquerque iha Aeroporto Internacional Comoro Dili, 08/01/2026.
SAPNewsTL, Dili : Hafoin entrega Maktoban Manuel Albuquerque ba familia, Representante Sekretaria Estadu ba Formasaun Profisionál no Empregu SEFOPE, Carlito do Rosário hato’o sentidu kondolénsia profunda no tristeza ba familia tanba lakon oan mane ida ne’ebe buka moris iha Sul Koreanu.
“Lori SEFOPE & funsionáriu SEFOPE nia naran hato’o sentidu kondelensia no sentimentu tristeza klean ba familia Maktoban Manuel Albuquerque. Ita la espera akontesimentu sira hanesan ne’e akontese iha sira-nia servisu fatin”.
“Laos familia mesak maka lakon ema no joven di’ak ida maibe SEFOPE mos lakon joven no ema di’ak ne’ebé ita fo esperansa ba nia atu sai eroi foun ba ita-nia nasaun no-mos ba nia familia rasik”. Hateten DJ SEFOPE Carlito do Rosário iha Aeroporto Comoro, 08/01/2026
SEFOPE sente lakon bo’ot ba ninia joven di’ak ida, governu haruka nia ba servisu iha ema nia rain ho objetivu bele kontribui ba dezenvolvimentu ekonomia nasaun ne’e nian, maibe Maromak nia planu oin seluk. Saida maka ita-nia hakarak Maromak deside oin seluk.
“Maibe ne’e maka realidade, ita sei simu maske ita sente triste tanba lakon Manuel de Albuquerque maibe ita fiar katak ninia espiritu nafatin hamutuk ho ita hodi fo forsa ba ita no ita mos la haluha nia esforsu sira ne’ebe nia halo ba familia no nasaun nia di’ak”.
Iha fatin hanesan reprezentante familia matebian Aleiço dos Santos hateten, familia nia hakarak maktoban ba di’ak atu esforsu hodi hadia ekonomia familia tanba nia maka sai hanesan aman segundu iha familia. Momentu akontese ida ne’e tantu guvernu, inan faluk no familia la simu realidade ho laran triste.
“Maktoban hanesan jerasaun kontinuador, jerasaun pasadu luta ba libertasaun patria, familia konsidera maktoban hanesan jerasaun kontinuador ba dezenvolvimentu iha rai doben ida-ne’e, tantu guvernu no familia lakoi atu simu realidade ida-ne’e maibe Nai Maromak mak hadomi liu nia”.Nia sublinha
Manuel d Albuquerque, Moris iha Munisípiu Ermera, postu administrativu Letefoho, Suku Haupú, Aldeia Ria Mori iha loron 11 fulan Jullu tinan 1995. Oan husi Americo dos Santos (Matebian) no Maria do Carmo. Matebian maka hanesan oan mane dahuluk husi maun alin nain lima (5) busi mane nain haat (4) no feto nain (1).
Matebian remata nia estudu Sekundáriu iha Escola IT iha Moleana Munisipiu Bobonaro hahu husi tinan 2015 to’o tinan 2018. Matebian hahu kursu dalen lian Korea iha Sentru Kursu Lian Korea iha Bekora hahu iha Tinan 2019 to’o tinan 2021 no Matebian tuir teste Computer ezame Basic Test (CBT) iha tinan 2020 la passa maibé nia la lakon esperansa hodi kontinua estuda nafatin hodi tuir teste ba etapa daruak nian iha tinan 2021 hodi pasa iha exame.
Matebian hetan kontratu husi Kompañia iha area Peskas no aranka ba serbisu iha Korea-Súl iha loron 20 fulan Novembru tinan 2022. Nia serbisu iha Kompañia neʼebé fo kontratu durante tinan tolu (3) semana ida (1).
Durante tinan tolu (3) Matebian Manuel De Albuquerque halao serbisu hot-hotu ho diak no halo komunikasaun diak hela ho familia no kolega sira maibé iha loron 25 fulan Novembru tinan 2025 anin lori lia rekadu husi Nasaun Korea-Súl ne’ebe hafalun familia ho notisia tristeja ba inan faluk Maria do Carmo no SEFOPE katak; Matebian mout iha Tasi Tongeon wanhira hala’o hela nia serbisu ho kolega ida iha ró laran.
Ho laloran Tasi Tongeon nia siak hasubar hela matebian durante loron rua nulu resin haat (24) iha tasi laran maibé ho Grasa Maromak Nian no esforsu sira ita ema nian hetan fali matebian nia isin iha loron 19 fulan Dezembru tinan 2025.