Falur Triste Kandidatu F-FDTL Foun Ida Hetan Mandadu Kapturasaun
![](https://sapnewstl.com/wp-content/uploads/2023/02/Jeneral-Falur.jpg)
Imajen: Xefe Estadu Maior Jeneral Tenente Domingos Raul Falur Rate Laek
SAPNewsTL, Dili: Xefe Estadu Maior Jeneral Tenente Domingos Raul “Falur Rate Laek” sente triste tanba membru foun ida husi Falintil-Forsa Defeza Timor-Leste (F-FDTL) atu gradua hetan fali mandadu kapturasaun husi tribunal tanba halo krime.
“Ita triste oituan tanba durante fulan neen ita nia governu investe ona osan ba farda ho hahan no kandidatu tuir treinu makaas hela loron ida atu gradua maibe hetan fali mandadu kapturasaun husi tribunal tanba halo krime omesidu ho arma branka ne’ebe ha’u hatun despaisu haruka polisia Militar horseik mai asegura entrega ba polisia no ohin polisia hamutuk ho nia advogadu no familia lori ba tribunal lori ba prizaun ida ne’e hatudu katak ema ida la halai ses husi justisa”. dehan xefe estadu maior jeneral tenente Domingos Raul “Falur Rate Laek”, ba jornalista sira iha Sentru Instrusaun Komandante Nicolau Lobato Metinaro, Dili tersa (7/02/2023).
Jeneral hatutan, nia preokupadu hodi sateiadu no hirus ba asesor juridiku ho pesoal rekrutmenntu sira tanba nusa husi inisiu labele hapara nia agora governu investe ona atu sai membru ona mak hasai fali produtu ne’ebe tasak ona prontu atu servisu iha militar, tinan oin atu rekruta tan jestor sira para mai halo jestaun ba justisa karik mosu krime ruma tan lori ba tribunal no ho mandadu kapturasaun husi tribunal, halo membru ne’e tenki sai husi F-FDTL maski kompleta ona treinamentu depois hela loron atu sai militar.
Nia afirma tan, membru F-FDTL ne’ebe gradua nafatin nain nain-600 maski membru ida sai ona tanba sira substitui fali membru ida antes ba iha akademia Portugal lakon entaun nia fila mai foin tuir treinamentu fali iha tinan 2023 ne’ebe membru sira gradua nain-600 nafatin.
Falur informa, situasaun ne’e sira sei hare’e komisaun rekrutmentu sira karik iha sala ruma halo sansaun dixiplinar maibe F-FDTL mos iha lisaun aprendida para aprende husi membru sira halo sala
“Situasaun ne’e komisaun rekrutmentu sira, ami sei hare’e karik iha sala ruma, ami sei halo sansaun dixiplinar tuir prosesu administrasaun iha institusaun F-FDTL nian maibe militar iha lisaun aprendida bainhira membru halo sala ruma ita aprende husi ne’eba”, Falur hateten
Reportajen: Augusto dos Santos