Festivál Fronteira, Assanami Konsidera Sidadaun NTT & TL Ida De’it, Maun-Alin Nafatin

SAPNews TL, RAEOA – Durante abertura Festivál Fronteira tinan 2024, Primeiru Ministru Interinu Mariano Assanami Sabino husu ba povu Timor-Leste hodi simu komunidade husi Nusa Tenggara Timur (NTT), nu’udar maun-alin hodi hamutuk hametin rekonsiliasaun no dezenvolve sertor ekonomia.

Vise-Primeiru-Ministru, Ministru Koordenador Asuntu Sosiál, Ministru Dezenvolvimentu Rurál no Habitasaun Komunitária, Mariano Assanami Sabino apresia ba maun-alin sira husi NTT, Malaka, Kupan, Atambua, Belu no Kefa ne’ebé marka prezensa iha Festivál Fronteira hodi bele hametin rekonsiliasaun no fraternidade.

“Lori governu Timor-Leste nia naran, apresia no agradese konvidadu sira hosi NTT, Malaka, Kupang, Atambua, Belu no Kefa ne’ebé hola parte iha Festivál Fronteira 2024, ita hamutuk hodi hametin ita nia relasaun maun-alin no rekonsiliasaun, nune’e bele haforsa no dezenvolve ita nia ekonomia, no koezaun sosial”.dehan Primeiru Ministru Interinu Mariano Assanami Sabino, Segunda, (14/10/2024).

Primeiru-Ministru Interinu Assanami Sabino, sublinha festivál refere realiza hodi hametin relasaun hodi hakat hamutuk ba oin, hatene rezolve problema, dezenvolve setor ekonomia, sosial, kultura iha illa Timor.

“Ita tenki dezenvolve setor ekonomia, sosial, kultura no identidade, maske ita haketak ho limitasaun nasaun maibe ita labele fahe ita nia fuan no konsiensia nu’udar Timoroan, ita tenki halo komunikasaun, diskusaun, relasaun liu hosi setor oioin entre ita iha negosiu, investimentu, ita tenki sai ida deit hodi bele foti illa ida ne’e”.

Primeiru Ministru Interinu Mariano Assanami Sabino husu ba povu Timor-Leste hodi simu komunidade husi Nusa Tenggara Timur (NTT), nu’udar maun-alin hodi hamutuk hametin rekonsiliasaun.

“Tanba iha konflitu mak sira iha ne’eba, maibe sira nafatin iha illa Timor, iha rai Timor, halo sira sai ita nia maun-alin, sira la’os sidadaun foun tanba sira nafatin iha illa Timor”.hateten PM Interinu

Assanami konsidera delegasaun NTT hamutuk 221 ne’ebe partisipa festival fronteira nu’udar Timoroan tanba hela iha illa Timor, “Imi bele halo negosiu, investimentu iha ne’e ka mai iha ne’e, imi nafatin iha illa Timor, imi halo iha imi nia nasaun rasik”.Assanami deklara.

Lider Nasional ne’e prefere atu ema hotu bele restaura fila fali uma lisan husi povu rua tanba konsidera uma lisan hanesan no hela iha illa Timor ida deit.

“Ita iha uma-lisan ne’ebe hanesan, ita tenki restaura fila fali, hametin fila fali ita nia identidade, kalan ne’e mai ita hamutuk haburas ita nia maun-alin,ita tenki rezolve nia problema rasik. Ita hasoru dezafiu no obstákulu tanba ita nia problema internu rasik, maibé ita tenke rezolve. Saida de’it maka mosu iha ita-nia pasadu, ita jerasaun tuir mai, tenke halibur fali espíritu unidade no maun-alin”.

Entretantu, Abertura Festivál Fronteira 2024 hetan partisipasaun husi Primeiru Ministru Interinu Mariano Assanami Sabino, Prezidente Autoridade Rejionál Administrativa Espesiál Oecusse Ambenu (RAEOA) Rogerio Tiago Lobato, reprezentante Governadór NTT, Delegasaun Xefi husi Timor Indonesia Felisberto Amaral, delegasaun NTT hamutuk 221 no sidadaun Timoroan.

Festivál Fronteira 2024 hala’o dunrante loron haat (14-18/10/2024), Festivál tinan ne’e prense ho atividade seminariu, workshop, dialogu, vizita fatin istoriku sira, no apresentasaun dansa kultura sira husi sidadaun nasaun rua.

Jornalista : Genoveva Lopes Sarmento