Feto 12 Terus & Ta’uk Iha Brunei ! MTA Bosok & Ameasa Sira, “Ha’u Tanis Lorloron”.
Imajem : Espesial
SAPNewsTL, Brunei : Manpower Timorese Agency fasilita timoroan feto hamutuk na’in 12 ba hala’o servisu doméstika iha Brunei, hafoin servisu trabalhadora timoroan hirak ne’e hetan presaun, ameasa no sai vítima iha ema nia rain.
Marciana Da Conceição Jurnalis – SAP News TL
Iha tinan 2024, Manpower Timorese Agency (MTA) servisu hamutuk ho Felimic Employment Agency (FEA) no ajensia seluk hodi fasilita timoroan ba servisu iha Brunei ho kategoria Domestic Worker. Nune’e iha Janeiru 2025, timoroan feto hamutuk na’in 12 hodi ba servisu.
Hafoin sira to’o no servisu iha Brunei, traballadora hirak ne’e hetan ameasa, presaun, sai vítima no tauk iha Brunei tanba hetan ameasa hosi Manpower Timorese Agency katak wainhira fila sei selu ajensia ho osan hamutuk 2.500 dolar.
Wainhira Jornalista SAPNews dada lia ho inisial SM ne’ebe sai vítima tanba hetan bosok no ameasa hosi ajensia. SM haktuir katak realidade hatudu katak sira hetan bosok no presaun makaas.
“Agora iha ne’e, ami sai vítima, ema bosok ami molok ami mai Brunei dehan ami bele ba eskola no halo paseiu, maibe realidade hatudu oin seluk, ami hetan presaun, ameasa no sente tauk tebtebes tanba obriga ami asina deklarasaun hodi selu karik atu fila”. Hateten inisial SM ba SAPNews liu hosi via WhatsApp iha Brunei, 05/07/2025.
SM akresenta nia parte servisu iha uma ida, hela ho patraun no kontrola makaas husi nia patraun inklui sita sira-nia passaporte sein razaun klaru.
“Sira foti hotu ami nia passaporte, ami iha ne’e servisu dook malu, ami laiha tempu livre atu hasoru malu, sira kontrola ami, ami atu chating buat ruma ami tenki subar telefone no book telefone iha haris-fatin”.
SM dehan iha traballador nain tolu ne’ebe problema ho patraun, nune’e sira deside sei haruka fila sira ba Timor-Leste iha loron Domingu tanba patraun hakilar nia iha ema barak nia oin no halo trabalhadora moe iha ema barak nian oin (hamonu dignidade umanu).
“Sira na’in tolu sei fila iha aban hosi Brunei ba Timor-Leste, patraun hakilar traballadora iha ema barak nia oin tanba kolega ne’e moras ba konsulta iha ospital no la simu telefone hosi patraun”.
Nian konta, uluk iha Timor-Leste, Manpower Timorese agency nia ema sira fo promessa midar no diak deit maibe to’o iha Brunei mosu fali oin seluk.
SM konta traballador sira hosi Indonésia servisu iha Brunei maibe la kleur deit programa ne’e para tiha to’o agora maibe nia la hatene tanba ne’e akontese.
SM husu ba timoroan sira hodi labele ba tan Brunei tanba sira-nia parte sente sai vítima no terus iha ema rain hanesan atan ne’ebe servi ema osan-na’in sira.
“Uluk ha’u hanoin diak, maibe to’o iha ne’e mosu oin seluk, ami tama tiha ona rai-kuak, tanba ne’e ha’u husu atu timoroan sira labele mai tan iha ne’e liliu servisu iha domestic worker, ba area seluk ha’u ladun hatene maibe servisu uma laran ne’e ita sai vítima”.
“Oras ne’e ha’u sente tauk, ha’u la hatene atu deside oinsa, karik iha ema ruma liliu governu bele fo atensaun ba ami ka lae, ami hakarak hadia sistema servisu ne’ebe todan no laiha tempu ba feriadu”.
Iha sorin seluk, traballadora inisial SD hakerek liu hosi whatsapp katak nia kalan tanis deit iha kuartu laran, kesi kabun hamlaha, terus no laran moras iha ema nia rain tanba la han, han wainhira patraun sira han hotu (han restu).
“Tebes, ha’u hanoin barak los, ha’u tanis lorloron, satan kalan sira han la bolu ha’u, ha’u mai kuartu laran tanis deit, ha’u tauk moras, kalan sira han mak ha’u han, karik sira seidauk han, ha’u seidauk han”. Sita SD
Ligadu ho kazu ne’e, SAPNews tenta atu halo komfirmasaun ho parte Manpower Timorese Agency, Ministério Negócio Estrangeiro e Cooperação (MNEC) no parte Embaixada Timor-Leste iha Brunei maibe seidauk konsege hetan resposta kona-ba asuntu ne’e.
Tuir planu, traballadora timoroan na’in tolu (3) ne’ebe hasoru problema iha Brunei, Femilic Employment Agency sei deportados sira mai Timor-Leste iha loron aban Domingo.
Ligadu ho kazu ne’e, SAPNews asegura mos ho deklarasaun sira no mensagem evidente sira seluk ne’ebe konsidera importante no sensitivu. Nune’e SAPNews sei kontinua tenta atu halo komfirmasaun ho parte relevante sira no sei publika hafoin kolleta.
Foto : Credit SM