FFTL Seidauk Iha Oráriu Determinadu Hili Prezidente Foun
SAPNewsTL, Dili: Federasaun Futebol Timor-Leste (FFTL) seidauk iha orariu determinadu realiza fila fali kongresu hodi hili prezidente foun tanba membru asosiasaun futebol munisipiu Viqueque ho Ainaro seidauk hadia problema internu akontese iha kongresu FFTL iha loron 10 fulan janeiru 2024 hodi rezulta kongresu kansela.
“Kongresu FFTL ita seidauk realiza fila fali tanba sei hein membru husi asosiasaun futebol munisipiu Viqueque no Ainaro, hadia tiha problema internu realiza kongresu depois membru ami husi ezekutivu FFTL halo reuniaun para ami aprova lai minuta sira lai mak ita bele halo fali kongresu”, dehan prezidente interinu FFTL Domingos Raul “Falur Rate Laek” ba jornalista sira iha Taibessi, Dili domingu (18/02/2023).
Prezidente hatutan, naton asosiasaun hetan problema internu iha kongresu FFTL iha loron 10 fulan janeiru 2024 ne’e asosiasaun tolu maka asosiasaun futebol munisipiu Viqueque, Ainaro no arbitrajen maibe daudaun ne’e asosiasaun arbitrajen mak kumpre ona saida mak FFTL fo iha momentu sira suspende kongresu ba loron seluk tanba faila husi komite eleitoral ho rekursu FFTL maka hadia sira nia asosiasaun laran hodi hili estrutura foun ba kongresu tuir mai.
Nia salienta tan, asosiasaun futebol munisipiu Viqueque ho Ainaro FFTL manda ona karta ofisial ba autorizasaun hadia problema internu hili estrutura foun la halo to’o agora, nia mos husu hela para asosiasaun futebol munisipiu Viqueque no Ainaro aselera hadia sira nia problema internu laos tanba sira nia problema impede ema hotu nia hakarak ba futebol.
Entretantu, asosiasaun futebol munisipiu Viqueque, Ainaro no arbitrajen nia problema akontese iha kongresu FFTL iha loron 10 fulan janeiru 2024 ne’e, asosiasaun tolu iha naran ema direitu votu ne’e nain rua mak submete ba komite eleitoral no rekursu maibe komite sira ne’e la iha desizaun hodi deside ema ida.
Entaun iha momentu ne’eba prezidente interinu FFTL Domingos Raul “Falur Rate Laek” deside kansela kongresu FFTL hili prezidente foun ne’e hodi adia ba loron tuir mai depois husu mos asosiasaun tolu ne’e hadia problema internu hili estrutura foun atu nune’e iha ema direitu votu ba kongresu FFTL tuir mai maibe to’o agora iha asosiasaun arbitrajen mak rezolve ona sira problema internu, enkuantu asosiasaun futebol munisipiu Viqueque no Ainaro maka seidauk, tan ne’e FFTL seidauk bele realiza kongresu tuir mai hodi hili prezidente foun.
Reportajen: Augusto dos Santos