FFTL Seida’uk Selu Arbitrajen, Juviano Ameasa Sei La Dirije Jogu Tuir Mai
Imajen konferensia imprensa arbitrajen Timor Leste iha Estadium Munisipal Dili, Sesta-Feira,30/09/2022.
SAPNewsTL, Dili: Federasaun Futebol Timor Leste (FFTL) seida’uk selu arbitrajen sira nia orsamentu ho montante hamutuk 6,180 USD ne’ebé sira diriji jogu U-23 iha Bekora, Kopa UEP 2022 no try out selesaun nasional husi fulan Janeiru to’o agora.
“Ami nia orsamentu ne’ebé FFTL seida’uk selu mak jogu U-23 iha bekora ho montante 3,960 USD ba jogu dala 44, Kopa UEP 2022 ho montante 1,920 USD ba jogu dala 33 no jogu try out ho montante 300 USD ba jogu dala neen ne’ebé eventu tolu ami dirije, komesa husi fulan Janeiru kedas to’o remata iha fulan Agustu maibe to’o agora ami seida’uk hetan ami nia direitu husi FFTL”. Dehan Porta Voz Arbitrajen Juviano Chalvez Reis liu husi konferensia imprensa ba jornalista sira iha Estadium Munisipal Dili, Sesta-Feira,30/09/2022.
Porta Voz ne’e akresenta, sira tenta ona ba FFTL hodi rezolve problema ne’e maibé FFTL halo de’it promesa barak hodi dada husi fulan Janeiru to’o agora ne’ebé seida’uk iha solusaun, tan ne’e arbitrajen sira ezizi nafatin ba FFTL atu nune’e arbitrajen sira bele hetan sira nia direitu ona.
“Tuir lolos problema ne’e labele mosu to’o agora tanba federasaun halo ignoransia, irresponsável ba direitu arbitrajen sira tanba arbitrajen sira halo ona sira nia direitu hodi diriji jogu to’o remata maibé parte FFTL seida’uk selu arbitrajen sira maski iha kampu arbitrajen sira ne’e mak hetan tolok no hotar oi-oin”. Tenik nia.
Juviano hatutan, sira ezizi nafatin ba FFTL atu nune’e tempu badak federasaun bele responde ho resposabilidade maibe karik la iha solusaun sira nafatin ezizi ba FFTL no sei la dirije kualker jogu ofisial ne’ebé realiza husi FFTL.
“Ami ezizi ba FFTL liu-liu lideransa sira iha tempu badak bele responde ba direitu arbitrajen sira nian tanba FFTL ne’e povu Timor Leste nian ne’ebé servisu ho resposabilidade, futebol ne’e la’os jogador no treinador sira de’it mak importante ne’ebé jogu ofisial sira mak arbitrajen la iha jogu sei la la’o, karik la iha solusaun nafatin, kompetisaun sira tuir mai iha Timor Leste dirije husi FFTL ami sei la dirije jogu sira ne’e liu-liu Taxa Rosa Muki Bonaparte 2022”
Enkuantu,to’o notisia ne’e fo sai, parte Federasaun Futebol Timor Leste (FFTL) seidauk fo resposta
Jornalista: Augusto dos Santos
Editor: Luis dos Santos