Timor Oan Saudavél No Prósperu, MS Lansa Livru Politika Planeamentu Familiar

SAPNewsTL, Dili: Ministra Saude Odete Maria Freitas Belo halo Lansamentu no Desiminasaun Livru Polítika Nasional Planeamentu Familiar kona-ba familia timorense saudavél no prósperu, moris iha paz no harmonia nia laran.

Tuir Ministra Saude Odete Maria Freitas Belo iha nia diskursu hateten lansamentu livru politika nasional no  planeamentu familiar ne’e halo bazeia ba rezolusaun ne’ebé aprova liu husi konsellu ministru iha tinan kotuk.

“Ita halo lansamentu livru politika nasional no planeamentu familiar, tinan kotuk liu ba Konsellu  Ministru aprova resolusaun ne’ebe adota pólitika nasional planeamentu familiar nian ne’ebe sai hanesan instrumentu  orientasaun pólitika no estratejika ne’ebe rekuñese ita nia identidade kultural Timor Leste relasiona ho direitu kazais sira ba planeamentu familiar”. Dehan Ministra Saude Odete Maria Freitas Belo iha Salaun enkontru palacio das Cinzas, Sexta-Feira, 30/09/2022.

Ministra ne’e hatutan, pólitika planeamentu familiar sai nu’udar instrumentu propriu ne’ebe bele kontribui atu empodera feto no mane relasiona ho saude familia.

Governante ne’e mos husu ba ajensia sira ne’ebé servisu hamutuk ho sira atu labele hakfodak ba dokumentus sira ne’ebé mak iha maibe halo oinsa bele iha balansu hodi implementa.

“Ha’u husu ba ajensia sira ne’ebé mak servisu hamutuk ho ita labele hakfodak ba dokumentu ne’ebé mak ita prepara ona, ita koko atu akomoda ho ema hotu-hotu nia ideia halo dokumentus ida ne’e ho balansu  tebes atu nune’e ita bele implementa, ita sira ne’ebé mak iha koñesementu kona-ba saude ita prontu atu ko’alia ho ita nia oan sira  ne’ebe mak nivel edukasaun ki’ik tebes”. Nia hakotu

Entretantu, Ministra Saude ne’e espera  katak ba oin profisional saude Timor ona ka ema estranjeiru sira bele asesu ba livru ida ne’e no mos ekipa tekniku ministeriu saude bele dezenvolve planu estratejiku ka matadalan ida ne’ebe bele kria implementasaun ba politika planemaentu familiar.

Jornalista:  Aquelina Magalhaes & Conzita Mota

Editor: Ekipa Editorial