Stok Ran Menuz, Estudante SOLS No Feto Ho Defisiensia Halo Doasaun Ran

SAPNewsTL,Dili: Juventude Asaun ba Dezenvolvimentu Timor Leste  (JADTL) realiza aktividade doasaun ran no formasaun kona-ba moras dengue, Xefe Departamentu Saude CVTL João Pinto apresia ba juventude sira tanba sira bele halo asaun solidariedade hodi fo ran ba ema ne’ebe presiza.

Tuir Prezidente JADTL David Calvario de Almeida ba hateten realidade ne’ebé mak akontese ita nia maluk sira ne’ebe  iha hospital Nasional Guidu Valadares no hospital sira seluk ne’ebé presija hela ran no dala barak povu Kiik sira la iha fundus atu sosa ran hodi salva sira nia vida nune’e liu husi ida ne’e bele fo ba sira ne’ebé presiza ran.

“Ho voluntariu ami juventude ho asaun solidariedade ran turuk ida atu salva ita nia maluk sira ne’ebé mak presija ran no nu’udar juventude ne’ebe mak iha espiritu nasionalismu no patriotismu ne’ebé hakarak halibur juventude hotu oinsa iha sentimentu solidariedade hodi hasae ran turuk ida hodi ba salva ita nia maluk sira ne’ebe presija ran”. Prezidente JADTL David Calvario de Almeida  ba jornalista sira iha salaun Cruz vermelha, Sexta-Feira,30/09/2022.

Iha fatin hanesan, Xefe Departamento Saude CVTL João Pinto hateten juventude sira halo doasaun ran ne’e mai husi sols no feto ho difisiensia 

“Ohin aktividade husi ita nia joventude sira asaun ba dezenvolvimentu no mos husi alin Sols sira no feto difisiensia iha esperansa sira hotu iha inisiativa hodi konvida ba malu oinsa atu doasaun ran ba maluk ne’ebe presija” Tenik nia

Xefe Departamentu ne’e mos apresia tanba juventude sira hanoin oinsa atu fo edukasaun ba nia maluk sira no agora dadaun ne’e ema ne’ebé mak atu fo nia ran ba ema seluk ne’e difisil maibé sira hanoin no halo.

 “Sira ne’e komprende ona oinsa atu fo asaun solidariedade entaun sira bele fo ran ba nia maluk sira ne’ebé mak presija ran, ne’e ami apresia tebes no aktividade ne’e la’os iha ne’e de’it maibé sei kontinua tanba ida ne’e pasu importante”. Nia informa

Nune’e mos, Enfermeira Doasaun de Sangue Georgina de Arauju Pereira Fernandes salienta, banhira ema ne’ebé mak atu halo doasaun ba ran tenke iha kriteria  atu nune’e labele fo impaktu ba nia saúde.

“Ita hotu hatene katak kriteriu doasaun ran ne’e saúde tenke di’ak, idade tenke 18 to’o 60 no todan tenke 45 kg  no mos deskansa mínimu oras 8 nia laran,labele konsume tua”. Nia afirma

Entertantu, Enfermeira ne’e hatutan husu ba juventude ka komunidade bele hakat ba banku de sangue ho voluntariu hodi fo ran ba sira ne’ebe presiza tanba agora dadauk stok ran menus.

“Agora dadaun stok ran ne’ebé mak iha banku de sangue ne’e minimu tebes iha golongan ran A iha ida no rua, golongan ran B iha sanulu resik tolu(13),AB mamuk, O iha de’it 5 ou 10 tanba ne’e mak ami husu ba ita nia servisu hamutuk ho juventude ou komunidade bele hakat mai iha banku de sangue atu fo voluntariu doasaun ran hodi bele ajuda ita nia maluk ne’ebé mak agora moras iha hospital  husi 13 munisipiu”. Nia hakotu

Jornalista: Marcela da Costa

Editor: Luis Pailofo