Foin Realiza Família Nia Mehi,  Ha’u Nia Mehi Sei Segredu

SAPNewsTL, Díli – Hafoin gradua iha Universidade Nasionál Timor Lorosa’e (UNTL), Graduadu Sergio Alves da Costa hateten foin realiza família nia mehi, ninia mehi lolos seidauk sai realidade, mehi refere iha segredu nia laran.

“Ha’u nia mehi lolos seidauk realiza, ha’u foin realiza deit mehi família nian, ha’u sei kontinua luta ba mehi ne’ebé seidauk sai realidade”. Tenik Graduadu UNTL Sergio Alves da Costa iha Dili, 20/12/2024

Graduadu Sergio Alves hateten normalmentu susesu ne’e sai mehi komun humanidade ida-idak nian, ema hotu iha mehi diak atu realiza, mehi ne’e rasik obriga individu atu hakaas an, servisu makaas, dedikasaun, no sakrifisiu.

“Tebes, susesu ne’e ita konkista ho folin karun, karun tanba ita hakat naruk ida hosi hakat ida ba hakat seluk ida sempre nakonu ho dejafiu liliu atividade barak ne’ebe involve, tempu la naton ba ita atu dezenvolve an, ita presiza gasta tempu, osan, no energia energia tomak”.

“Prosesu naruk ne’ebe dejafiante, fo teste ba ita nia pasiensia, koragem, brani, fiar an no firmeza iha luta, luta ne’e lori tempu maibe susesu ne’e sempre sai serteza ba ita, ha’u hanoin katak ha’u bele, ha’u bele sai susesu, se ita hanoin, ita manan, ita sei manan”. Sèrgio Alves Da Costa  sublinha

Graduadu ne’e hatutan, prosesu naruk ne’e la ses hosi esforsu, badinas, no laran di’ak ne’ebe familia sira hatudu liu hosi apoia moral, material, no finansial durante tinan 6.

“Ha’u nia susesu ne’e afirma ba familia sira, ha’u hetan susesu tanba sira nia komitmentu hodi apoia, ajuda, fo hanoin no motivasaun barak ne’ebe ha’u la sura, entaun laiha susesu ida ne’ebe oan hetan sein apoia husi inan aman sira no familia tantu kolega sira”.

“Fou-foun ha’u tama UNTL, ha’u kompromete ba ha’u nia an katak ne’e mak tempu ha’u hahu luta, loron ida sei ha’u tenki gradua, ha’u momentu ne’ebá promete ba ha’u nia an katak ha’u hahú ho xapeu akadiru, to’o loron ida ha’u tenki hotu ho xapeu metan iha ulun, ohin mehi ne’e sai realidade”.

Sergio mos fo agradese ba familia sira, Ezekutivu UNTL, Estrutura Fakuldade, Estrutura Departamentu, Dosente sira inklui kolega sira ne’ebe apoia direta no indireta tanba hosi sira nia dedikasaun no prestasaun maka bele konkista objetivu ida ne’e.

“Ha’u la haluha, agradese ba familia sira hotu, Lideransa UNTL, Fakuldade, Departamentu to’o kolega estudante sira, susesu ne’e karik ha’u labele realiza, se laiha domin no servisu makaas hosi ita boot sira”.

Sergio hatutan, “Estudu ne’e bele remata, maibe ha’u nia fuan no domin ba UNTL nunka hotu, isin UNTL no klamar UNTL, UNTL ba nafatin, buat ne’ebe ha’u aprende iha UNTL se la monu leet, maibe sei kaer nu’udar matan dalan ida hodi servi no kontribui ba dezenvolvimentu nasaun nian”.

Eis Senadu Estudantil ne’e mos husu ba nia maluk estudante ne’ebe sei luta iha banku universidade hodi kontinua dixiplina, badinas no estuda makaas, nune’e to’o loron ida bele sai susesu.

“Kolega sira ne’ebe sei frekuenta estudu iha ensinu superior,  presiza kontinua estuda badinas, tahan terus no dejafiu hotu hodi bele sai matenek, susesu no servi povu no nasaun iha futuru, tanba nasaun presiza ita joven sira nia kontribuisaun”.

Antes ne’e, Vise Reitor Asunto Akademiku no Garante Kualidade Samuel Freitas, sublinha tema jeral ba serimonia graduasaun ba dala XXXI ne’e deskreve ho sentidu katak Graduado Com Eselensia Caracter e Visao Global katak aleinde produs rekursu umanu kualidade forma mós karakter ema nian atu bele integra iha públiku hodi partisipa no garante dezenvolvimentu ne’ebé sustentavel.

Samuel mós afirma graduadu  ne’ebe UNTL produz ne’e iha kompeténsia no karater hodi integra iha sosiedade katak sira iha kapasidade hodi servi sosiedade no nasaun.

“Graduadu UNTL ne’e garante kompeténsia no kualidade, sira iha kapasidade hodi integra an iha sosiedade, ita laiha dúvida ba sira nia kapasidade”. Nia dehan

Vise Reitor ne’e parabeniza graduadu sira tanba ho esforsu no dedikasaun bele finaliza ona estudu iha UNTL.

“Parabens ba graduadu sira hotu, parabens ba família sira hotu, ita realiza graduasaun iha ámbitu natál, entaun ita selebra ita nia susesu ho bensaun no grasa maromak nian”.

Dekanu Fakuldade Engenharia Ciénsia no Tecnologia (FECT) Adalfredo Da Silva hateten Sergio  sai símbolu osan mean iha família laran, nia ema ida ne’ebé haraik an, simples, obediente, honestu no responsabilidade.

“Sergio sai ona engenheiru, símbolu osan mean iha família nia laran tanba ne’e ha’u fo parabens ba família sira hotu no ninia alin sira, família simples nia oan mós bele susesu”.

“Sergio ne’ebé ha’u kunhese, Sergio ne’ebé humilde, simples, obediente no honestu, nia sempre rona  no hatene esforsu an, ohin loron nia bele sai susesu”.

“Ita boot tenki sai engenheiru ida ne’ebé ho karakter responsivu, humilde, honestu no iha integridade. Enginheiru sivil bele hari’i restaurante, konsultan, média. Sergio ne’e, se ita tau iha fatin disertu, Sergio sei la mate, nia sei sobrevive no bele moris mesak”. Hateten Dekandu FECT Adalfredo  da Silva

Iha fatin hanesan, Diretor Departamentu Engenharia Sivil Aleixo Xavier mós kongratula graduante tanba konsege konklui estudu iha tinan neen nia laran, iha universidade presiza prense kritériu barak, maske barak maibé Segio konsege prense rekezitu sira hotu hafoin maka simu graduasaun.

“Parabens ba Sergio ho nia família sira hosi Luro-Lospalos, iha vida universitáriu sempre mosu kritériu oioin maibé Sergio bele prense hotu rekezitu sira ne’e, ohin gradua la’os ikus husi aprende maibé kontinua aprende no estuda nafatin”.

“Aprende sai matenek, nune’e ita bele hamutuk halo mudansa ba UNTL no Timor-Leste ida diak liu iha loron aban bainrua”. Sublinha Diretor

Senadu Jeral UNTL, Cejar João parabeniza Sergio Alves da Costa  tanba simu ona títulu foun enginheiru ka lisensiatura iha konstrusaun sivil.

“Ha’u nu’udar Senadu Jeral, ha’u lori estudante sira hotu nia naran hakarak hato’o felisitasaun boot no votus parabens ba Sergio tanba aumenta títulu foun ida iha perkursu akadémiku”.

“Sergio sai ezemplu no lisaun ida ba ami sira hotu ne’ebé to’o agora sei luta, keta haluha katak susesu ne’e hanesan pasu primeiru ba ita hodi kontinua hakat ba pasu foun ida, uza kunhesimentu ne’e  hodi kontribui ba dezenvolvimentu”. Sejar João dehan

Tuir numeru post graduasaun mestradu total estudante 28, Fakuldade Agrikultura hamutuk 170, Fakuldade Enjenharia Siensia no Teknolojia 201,Fakuldade Siénsia Ezata hamutuk 4, fakuldade Turizmu arte no industria kriativu hamutuk 43, Fakuldade Medisina Siénsia Saúde hamutuk 633, Fakuldade Siénsia Sosial hamutk 267, fakuldade ekonomia gestaun hamutuk 222, fakuldade direitu 34, fakuldade edukasaun hamutk 497 no fakuldade filisofia hamutuk 97.

Fo hanoin fali katak, desde 2003 to’o 2024 (Graduasaun I-XXXI), UNTL produz ona graduadu hamutuk rihun ruanulu resin hitu (27.000) resin. Entre sira maioria hetan ona servisu, kontinua estudu no balun seidauk hetan servisu.

Jornalista : Marciana da Conceição