Fulan 6, Estudante EBC Luro Seidauk Uza Kadeira & Meza Iha Prosesu Ensinu

SAPNewsTL, Lautem – Estudante 1⁰ no 2⁰ siklu  husi Ensinu Baziku Sentral Luro hetan tan edifisiu foun unidade ida maibe to’o oras ne’e seidauk tur iha kadeira hodi tuir aprendizajen.

Iha entrevista ho Diretor Ensinu Baziku Sentral Luro Filipe Soares informa edifisiu foun unidade ida halo ona maibe seidauk kompleta fasilidade sira nune’e to’o agora estudante sira sei tur deit iha azuleiju.

“Kona-ba 1⁰ no 2⁰ Siklu Ensinu Baziku Sentral Luro ninian ne’e atu ko’alia katak kondisaun ne’e la favorese edifisiu halo ona maibe kadeira laiha i estudante sira tur deit iha simente ida ne’e nia impaktu ne’e orsida bele moras no difikulta tebes ba prosesu ensinu aprendizajen nian tanba ne’e proposta ba mobiliáriu sira ne’e dala barak ona ko’alia fila fila ona, haruka beibeik ona ba parte kompetente maibe seidauk atende”. Katak Diretor EBC Luro Filipe Soares iha nia knaar fatin, 21/06/2024

Diretor Filipe hateten kondisaun la favoravel ba estudante sira labele garante nia kualidade tanba ne’e husu atu oferese fasilidade sira hanesan kadeira atu bele tur hodi tuir ensinu aprendizajen.

“Ita nia esperansa mak eskola atu sai kualidade ne’ebé kuandu kondisaun la favorese ita bele ko’alia maibe kualidade ne’e mosu liu husi ne’ebe ? Ha’u nu’udar diretor eskola situasaun ida ne’e presiza duni mobiliáriu, husu atu ajuda kadeira sira ne’e atu estudante sira bele tur hodi hala’o ensinu aprendizajen”. Tenik Diretor

Iha sorin seluk, Diretor Servisu Edukasaun Munisípiu Lautém Anibal Fernandes haktuir nia parte hato’o ona pedidu ba nasional, nune’e Meza kadeira ne’e sei prosesu laran, seidauk bele to’o iha ne’e maibe hein katak Ministeriu bele responde nesesidade urjente refere.

“Iha Ensinu Baziku Sentral Luro 1⁰ no 2⁰ Siklu ne’e ita hato’o ona pedidu ba nasional maibe sei iha prosesu laran, ita hein oinsa mak atu responde nesesidade urjente ne’ebe iha liu-liu ita nia estudante tur iha rai meza kadeira ne’ebe falta ne’e ita bele kompleta i ita husu para bele responde ida ne’e”. Anibal hato’o

Entretantu, Ensinu Báziku Sentral Luro hetan edifisiu foun unidade ida iha tinan 2023 maibe to’o agora seidauk hetan kadeira no meza ba edifisiu foun ne’e, nune’e to’o oras ne’e estudante sira sei tur deit iha azuleiju hodi tuir ensinu aprendizajen.

Jornalista: Denilia Soares