Fulan Novembru, MJDAC Sei Realiza Simulasaun Ba Jogu CPLP
Imajem : entrevista Ministru Juventude Desportu Arte Kultura Nelyo Isaac Sarmento iha salaun JL Vila Fatuhada,Dili sabadu (01/06/2024).
SAPNewsTL, Dili – Ministériu Juventude Desportu Arte Kultura sigla portuges (MJDAC) informa sei realiza simulasaun jogu CPLP iha fulan novembru 2024 antes tama jogu CPLP 2025 iha fulan jullu 2025.
“Iha fulan Novembru, ita sei realiza simulasaun ba jogu CPLP 2025, nune’e sei kria kompetisaun ba atleta U-16 sira ba federasaun hotu sai hanesan mini jogu CPLP nian, ida ne’e hanesan preparasaun ida hodi simu jogu CPLP nian iha 2025”, dehan Ministru Juventude Desportu Arte Kultura Nelyo Isaac Sarmento ba jornalista sira iha salaun JL Vila Fatuhada,Dili sabadu (01/06/2024).
Ministru hatutan, preparasaun ba jogu CPLP 2025 iha Timor-Leste, buat hotu sei prosesu nia laran seidauk konklui maizumenus tinan ikus nian bele hatene ona kondisaun saida mak Timor-Leste prepara ba jogu CPLP 2025.
Timor-Leste iha problema mak fasilidade sira hanesan Estadium Munisipal Dili maibe tanba jogu CPLP sei hala’o iha fulan jullu 2025 tan sei iha tempu ba hadia fasilidade iha fulan janeiru, Fevereiru, marsu.
Nelyo informa tan, Estadium Munisipal Dili sei utiliza ba modalidade atletizmu halai ho haksoit dook nian tuir avaliasaun ministériu nian, atu utiliza ba abertura seidauk serteza tanba iha fatin barak uza ba abertura nian hanesan kampu Bekora lakleur tan konklui ona.
Nia salienta tan, kampu voleibol praia la kleur tan sei hadia ka halo foun fila fali, basketebol, taekwondo no karate fatin iha hela tanba sei uza jinajiu desportu Dili, futebol sei uza kampu Estadium Munisipal Dili ho kampu bekora, tenis kampu uza kampu iha kampus UNTL, fatin sira ne’e sei hadia diak liu tan, molok tama ba fulan jullu buat sira preparadu hotu ona.
Governante ne’e afirma tan, fasilidade kiik oan sira ne’e ministériu sei halo jestaun interna hodi solusiona iha fulan novembru tinan ne’e, balun hein hadia ba tinan oin bainhira presiza duni orsamentu estadu nune’e sei projeta ba orsamentu estadu 2025 nian.
Reportajen: Augusto dos Santos