Funu Iha Iran, EUA & Israel Halakon Líder Supremu Khamenei Nia Vida

SAPNewsTL, Internasionál : Hafoin Israel no Estados Unidos lansa atake ba Iran, Prezidente EUA, Donald J. Trump, informa liu hosi rede sosial katak lider supremu Iran, Ayatollah Ali Khamenei lakon ona vida.

Testemuña sira hateten ba AFP katak iranianu sira rona rezultadu, hakilar no kontente iha Tehran, hafoin rona relatóriu kona-ba Khamenei nia mate, lider prinsipal Irán desde 1989. Fumu metan sa’e iha distritu Pasteur, fatin ne’ebé nia baibain hela.

“Khamenei, ida husi ema aat liu iha istória, mate ona. Ida ne’e la’ós deit justisa ba povu Irán, maibé mós ba Amerikanu sira hotu, no ba ema husi nasaun barak iha mundu ne’ebé mate ka hetan kanek todan husi Khamenei no nia grupu banditu ran-nain sira”.

“Nia la bele halai husi ami-nia intelijénsia no sistema monitorizasaun sofistikadu teb-tebes, no hamutuk ho Israel, la iha buat ida mak nia ka lider sira seluk ne’ebé mate hamutuk ho nia bele halo”. Hakerek Presidente EUA Donald Trump iha rede sosial X. 01/03/2026. Sita AFP

Trump hatutan, rezultadu ne’e nu’udar oportunidade boot ba povu Irán atu foti fila fali sira-nia rai. “Ami rona katak barak husi IRGC, militar, no forsa seguransa no polísia seluk la hakarak tan atu luta, no buka imunidade husi ami. Hanesan ha’u dehan kalan liu ba, “Agora sira bele hetan imunidade”.

Esperansa katak IRGC no polísia sei hamutuk ho patriota Irán sira iha forma pasífiku, no servisu hamutuk atu foti fila fali sira-nia rai ba nia grandeza ne’ebé merese.

“Prosesu ne’e tenke hahú lalais tanba la’ós deit Khamenei nia mate, maibé iha loron ida deit, rai ne’e hetan estragus boot no to’o atu dehan hetan destruisaun total. Maski nune’e, bombardamentu todan no presizu sei kontinua, la iha interrupsaun durante semana tomak ka to’o tempu ne’ebé presiza atu atinji ami-nia objetivu: dame iha Oriente Médiu no iha mundu tomak”. Sublinha Trump

Primeiru-Ministru Israel, Benjamin Netanyahu, dehan iha “sinal barak katak tiranu ida ne’e la moris ona”.

Khamenei maka inimigu boot Israel no Estados Unidos desde revolusaun Islámika 1979, Netanyahu dehan: “Agora tempu ba imi atu hamutuk, atu hatún rejime no asegura imi-nia futuru.”

Iran nia Guarda Revolusionária dehan katak sira-nia “misil no drone sira atingiu sede United States Fifth Fleet iha Bahrain, no base Amerikanu sira seluk iha Qatar no United Arab Emirates, no mos sentru militar no seguransa iha teritóriu okupadu (Israel).”

Irán, Iraque, Kuwait, Síria, Emiradus Árabes Unidos no Israel taka sira-nia espasu aéreu ba trafiku sivil, no kompania aviaun barak kansela viajen ba Orienti Médiu.

Esplozaun Sira Iha Golfu

Residente sira no korespondente AFP iha kapitál Emiradu, Qatar no Bahrain rona espolozaun barak husi atake retaliasaun Irán.

Iha Qatar, ema halai ho tauk bainhira misil ida monu iha área rezidensial. Iha Abu Dhabi, kapitál Emiradus Árabes Unidos, jogadór golf sira surpreende haree projetil barak liu iha leten.

Iha Manama, kapitál Bahrain, residente sira evakua lalais husi distritu Juffair ne’ebé akomoda forsa naval Amerikanu.

“Bainhira ami rona lian ne’e, ami hakilar tanba tauk,” dehan Jana Hassan, estudante feto tinan 15 ne’ebé iha área ne’e. “Ha’u la haluha lian espolozaun boot sira ne’e.”

Testemuña rua dehan ba AFP katak sira rona espolozaun ida no haree fumu sa’e iha ilha artifisial famozu Palm Jumeirah, enkuantu autoridade sira relata ema haat kanek.

Ministériu Negósiu Estranjeiru husi Oman, ne’ebé sai mediador iha negosiasaun EUA–Irán resente, bolu “parte hotu atu para operasaun militar kedas” no husu ba United Nations Security Council atu impoin sesar-fogu.

Entretantu, autoridade sira husi Israel informa ba média internasional katak Ali Khamenei mate iha atake militar boot ne’ebé halo husi Israel no Estados Unidos.

Irán Rejeita Alegasaun Husi EUA No Israel Katak Lider Supremu Ali Khamenei Mate

Ministériu Negósiu Estranjeiru Irán rejeita alegasaun husi Benjamin Netanyahu no Donald Trump, hodi deklara katak Lider Supremu Ali Khamenei no Prezidenti Masoud Pezeshkian sei moris “seguru no saudavel”.

Porta-voz Ministériu Negósiu Estranjeiru Irán, Esmail Baghaei, dehan Khamenei no Pezeshkian seguru hela, no rejeita alegasaun katak EUA no Israel oho sira.

Baghaei responde pergunta sira iha entrevista ho rede transmisaun EUA ABC News iha Sábadu kona-ba estatutu Khamenei no Pezeshkian, dehan katak sira “seguru no di’ak hela”.

“Halo tuir ami-nia planu, no forsa armada sira hala’o asaun defensiva hasoru agresaun ida ne’ebé kontinua durante loron tomak,” nia dehan.

To’o oras ne’e, Média internasional balu relata tuir deklarasaun polítika, maibé seidauk iha prova klaru husi fonte independente.

To’o agora, informasaun kona-ba falesimentu Ali Khamenei sei iha nível alegasaun polítika tanba seidauk iha konfirmasaun ofisiál husi governu Irán ka verifikasaun independente husi ajénsia notísia kredível sira.

Tanba ne’e, Sapnews.com sei kontinua hein konfirmasaun ofisiál husi média Iran tanba iha tempu konflitu, informasaun bele sai propaganda ka la kompletu.