Governu Apoia Subvensaun Millaun $ 15 ! Assanami : “Papel Igreza Importante Atu Tau Matan Ba Povu”
Imajem: Vice-Primeiro Ministro, Ministro Cordenador dos Assuntos Sociais, Mariano Assanami Sabino. Foto : Média VPM & Sapnews.com
SAPNewsTL, Baucau : Vice-Primeiro Ministro, Ministro Cordenador dos Assuntos Sociais, Mariano Assanami Sabino, hamutuk ho Gabinete Apoiu ba Sosiedade Sivil (GASC), asina ona akordu subvensaun anuál ba Konferensia Episkopál Timorense (CET) hamutuk millaun $ 15.
Marciana da Conceição – SAPNewsTL
Bispu Dioseze Baukau Dom Leandro Maria Alves, informa akordu refere kada tinan sempre halo bazeia ba konkordata neʼebé asina ona iha loron 14 fulan-Augostu tinan 2015, entre Repúblika Demokrátika Timor-Leste no Santa Sé neʼebé estabelese kuadru jurídiku kona-ba relasaun bilaterál entre País rua no Akordu-Kuadru neʼebé asina iha loron 16 fulan-juñu tinan 2017 entre Governu no CET.
Akordu sira ne’e prevee kontribuisaun anuál ida, tuir Governu nia disponibilidade finanseira ba atividade sira ho karakter sosiál, edukativu no governu ekleziál Igreja Katólika nian. Kuantidade no modalidade konsesaun ba subvensaun sei regula kada tinan liuhusi akordu espesifiku entre Governu no Konferensia Episkopál Timorense.
“Iha asina akordu anual, iha akordu konkordata ne’ebé maka halo entre ita-nia estadu Timor-Leste no estadu Vaticanu no iha mos akordu kuadru, akordu ne’e ba iha tinan lima nian, agora ba implementasaun husi akordu kuadru no implementasaun husi konkordata ne’e maka akordu anual”. Informa Bispu Dioseze Baucau Dom Leandro Maria Alves iha Baucau, 10/04/2026.
Nune’e iha palásiu governu Konferénsia Episkopal hamutuk ho governu asina akordu subvensaun públiku ninian ne’ebé maka guvernu liu husi Vise Primeiru-Ministru Mariano Assanami Sabino ho CET hodi atribui 15 millõens.
“15 milõens husi igreja halo proposta tuir programa no atividade ne’ebe maka igreja iha halo hodi hato’o ba governu, tuir konkordata ne’ebé hakerek katak governu fó tuir posibilidade ne’ebé maka iha”.
“Osan ne’e fahe tuir nia persentajen ba edukasaun iha 40%, sosial 30%, governu eklezial 20% no governasaun10%. Husi ida ne’e fahe ba Dioseze tolu mos hanesan tenke implementa tuir akordu ne’ebe maka halo ho governu, kada dioseze ha’u laiha númeru osan fiksu lolos maibe dioseze ida hetan por volta 3 melões”. Bispu Informa
Líder Religião ne’e hatutan, orsamentu ne’e kabe ba parte edukasaun, sosial no governu eklezial nian mak kobre ba iha kapela, igreja ne’ebé maka presiza halo renovasaun no balun buka atu halo foun bainhira aat loos ona ne’ebé tenke halo foun fali.
Antes ne’e, Vise-Primeiru Ministru Mariano Assanami Sabino hatete, akordu refere mai husi vontade estadu nian, governu ne’ebe ukun sempre fo apoiu, tanba futuru nasaun nian mak labarik sira, entaun Papel Igreza Katolika nian atu kuidadu, tau matan, fortifika no fortalese instituisaun sira ne’ebe tau matan ba povu.
“Igreza nia papel ida importante tebes mak dezenvolvimentu umana liuliu iha area edukasaun, Igreza Katolika nia prezensa iha Timor mak loke Kolejiu iha fati-fatin hodi produz lider matenek barak iha Timor”.
“Sira kontinua hala’o misaun ida ne’e to’o ohin loron, entaun Igreza Katolika iha Timor ne’e la’os de’it ona fiar ida, maibe ne’e sai ona kultura ba Timor oan sira atu kontinua valoriza malu liu husi asaun sosial sira”. Assanami sublinha. Segundu Média Vise PM
Vise-Primeiru Ministru akresenta katak, apoiu ne’ebe Governu fo la’os de’it ba igreza Katolika, maibe apoiu mos ba relijiaun seluk hanesan Protestante no Musulmanu sira, tanba ne’e apoiu ida ne’e sei la to’o iha ne’e maibe sei kontinua ba oin.
Partisipa iha serimonia asina akordu iha Palásiu Governu mak Arsebispu Arkidioseze Metropolitana Dili, Dom Virgilio Cardeal do Carmo da Silva, SDB, Prezidente CET Bispo Dioseze Maliana, Dom Norberto do Amaral, Bispo Dioseze Baukau, Dom Leandro Maria Alves, no Kordenador GASC, Joaquim da Costa Freitas.
