Governu Hamamuk Aitarak-Laran ! Estudante Barak Sei Hasoru Problema
Imajem : Komunidade afetadu ba eviksaun hala’o komunikadu imprensa hasoru governu iha Aitarak-Laran, Aldeia 03 Kampu Alor, Dili, 03/06/2024. Foto : Marcela Mery da Costa
SAPNewsTL, Dili- Komunidade uma kain pur volta 300 iha Aitarak-laran Aldeia 03 Postu Administrasaun Dom Aleixo ne’ebe afetadu ba eviksaun husu governu atu halo dialogu antes hetan eviksaun.
Porta voz Jacinto Quelo haktuir katak Sekretariu Estado Terras propriedade liu husi diresaun Terras ne’ebe fo notifikasaun ba komunidade iha loron 27 fulan maio 2024, ne’ebe deskreve fo praju loron 30 nia laran atu komunidade hamamuk fatin, nune’e bainhira iha loron 30 komunidade la sai husi fatin refere governu sei uza lei artigu 8 No 1/2003 hodi hasai obrigatoriu komunidade afetadu.
Komunidade afetadu ne’e hatutan katak sira sente triste ba notifikasaun refere ne’ebe mak ho tempu limitadu tebes ba sira, nune’e prejudika ba futuru estudante sira nian no komunidade ai leba sira ne’ebe mak buka moris iha kapital Dili.
“Ami komunidade husu governu liu husi lina ministerias presija mai halo dialogu ho ami komunidade afetadu hodi hetan solusaun diak entre governu no komunidade afetadu”.Dehan porta Voz Jacinto Quelo ba Jornalista sira iha iha Aitarak-laran aldeia 03, Segunda-feira(03/06/2024)
Nia salienta katak ministra edukasaun hare mos kestaun sira ne’ebe mak komunidade sira ne’e tanba estudante husi nivel primariu, pre-sekundariu, sekundariu no universitariu barak mak sei hetan eviksaun.
“Ministru edukasaun tenke tau kestaun ba problema ne’e tanba estudante balun iha nivel Primeiru, pre-sekundariu no sekundariu ne’e oinsa ho sira nia prosessu futuru estudu ho enviksaun ne’e rasik” nia informa
Imajem : Estudante sira partisipa iha komunikadu imprensa ne’ebe hala’o iha aitarak-laran
Alende ne’e, nia haktuir katak nessesidade baziku sai kestaun iha knua fatin no dejafiu bo’ot tanba ne’e mak sira buka moris iha sidade Dili, tanba ne’e sira kestiona bainhira hetan eviksaun hodi fila-fali ba iha munisipiu saida mak sira halo hodi hetan rendimentu.
Enquantu, porta voz ne’e informa katak komunidade Aitarak-laran laran prontu atu koopera ho governu hodi husik fatin maibe sira husu governu atu trata sira ho diknu nu’udar Timor oan.
Iha fatin hanesan, komunidade Isaias Soares katak komunidade uma kain pur volta 300 afetadu, no ba notifikasaun ne’ebe mak sira simu iha dia 27 de maiu tinan 2024 iha notifikasaun ne’e hateten katak sira sei sai iha loron 30 nia laran no sura husi simu notifikasaun refere.
Komunidade Isais afirma katak notifikasaun ne’ebe mak komunidade Aitarak-laran aldeia 03 simu ne’e, sira sente katak praju lalais liu tanba ne’e mak sira husu governu atu konsidera komunidade sira nia preokupasaun.
Jornalista : Marcela Mery da Costa