Governu Rekoñese Atleta Sira Halo Preparasaun Tarde Ba Jogu Sea Games 2025
Imajem : Atleta Timoroan Sea Games 2025 halibur hamutuk iha Otel Ramelau, 03/10/2025
SAPNewsTL, Díli : Governu liu husi Ministeriu Juventude Desportu Arte Kultura (Sigla Portuges MJDAC) rekoñese atleta sira husi modalidade Futebol, Taekwondo, Karate-do, Atletizmu no Boxing hala’o preparasaun tarde iha fatin konsentrasaun maibe hein katak atleta sira hatudu rezultadu diak iha jogu Sea Games 2025 iha Tailandia iha Fulan Dezembru.
Augusto dos Santos – SAPNewsTL
“Ohin, ita halo konsentrasaun ba Atleta hotu ba jogu Sea Games sei iha modalidade lima, Futebol, Taekwondo, Karate-do, Atletizmu no Boxing, ita hatama sira iha sentru treinamentu para bele halo kontrolu diak liu tan ba sira-nia saude, alimentasaun husi médiku ho treinador sira, klaru katak konsentrasaun ba Atleta sira ba jogu Sea Games tarde oituan tanba MJDAC tinan okupadu ho atividade barak liuliu jogu CPLP”, dehan Ministru Juventude Desportu Arte KulturaNelyo Isaac Sarmento ba jornalista sira iha fatin Otel Ramelau Aimutin, Dili sexta (3/10/2024).
Ministru ne’e hatutan, Planu ba konsentrasaun atleta sira ne’e iha Fulan Abril maibe tanba hasoru jogu CPLP ho kampionatu husi federasaun sira mai fali setembru, depois jogu CPLP mos la konsege ohin foin halo konsentrsaun ba Atleta sira ba jogu Sea Games 2025.
Nelyo informa tan, maski halo preparasaun fulan rua ho balun maibe hein katak sira hatudu rezultadu diak tanba antes ne’e atleta sira halo preparasaun iha idak-idak nia federasaun ho fulan neen ba leten.
Ohin konsentra sira hamutuk para sira sente sai delegasaun Timor-Leste ba jogu Sea Games 2025, nune’e ho apoiu masimu iha tempu badak ne’e bele hetan netik preparasaun diak ba Timor-Leste, tarjetu ba atleta sira tinan ba jogu Sea Games mak medalla osan mean tolu ba modalidade lima.
Iha fatin hanesan, Prezidente Komisaun Organizadorba preparasaun atleta sira Inocencio Araujo hatete, konsetra atleta sira para hala’o treinamentu ho dixiplina tuir orariu ekipa tékniku.
“Ita konsetra atleta sira para hala’o treinamentu ho dixiplina tuir orariu ekipa tekniku sira kada federasaun lima nian ne’ebé prepara ona hodi halo sira dixiplina no profesional”, tenik Inocencio
Prezidente Komisaun Organizador ne’e afirma tan, orsamentu governu aloka ba preparasaun atleta ba jogu Sea Games 2025 iha Tailandia durante fulan rua ho montante 245.000 USD ba sira-nia akomodasaun Otel, hahan, saúde no subsidiu ba atleta ho ekipa tekniku sira no ekipamentu ba preparasaun nian.
Iha sorin seluk, atleta husi modalidade Taekwondo Mesias D. Mato dehan, “Nu’udar atleta ami so bele prepara tuir saida mak governu prepara ba ami durante iha fatin konsentasaun nian tanba atleta sira nia dever mai para halo preparasaun deit”, atleta hateten
Mesias salienta tan, preparasaun sira durante ne’e hala’o iha idak-idak nia federasaun, mai tan fatin ne’e para halo preparasaun iha fatin konsentrasaun diak liu tan para ba kompete iha kompetisaun hetan rezultadu diak.
Entretantu, total atleta hamutuk nain-52 inklui feto nain-12 ho ekipa tekniku 17 ba modalidade lima, Futebol, Taekwondo, Karate-do, Atletizmu no Boxing.
Daudaun ne’e, jogador sira husi futebol mak seidauk tama fatin konsentrasaun Otel Ramelau tanba jogador barak sei tuir kompetisaun iha rai liur, nune’e sira sei tama iha otel Ramelau iha fulan Novembru nia laran.
Enquantu atleta sira husi modalidade Taekwondo, Karate-do, Atletizmu no Boxing tama ona fatin konsentrasaun Otel Ramelau iha loron 3 fulan outubru 2025.