Grandeza Ezemplar, Bibi Atan Di’ak Sa’e Bus Ba Vizita Ninia Bibi Sira
Imajem : Padre Augusto Assunção Delfim de Sá tun hosi Bus Iha Dili,13/11/2024.
SAPNewsTL, Lautém : Padre Augusto Assunção Delfim de Sá sa’e bus hosi Dili ba Luro hodi vizita ninia sarani sira iha Parokia Nossa Senhora Ranha dos Apóstolus de Luro.
Eis Paroku Luro, Padre Augusto Assunção Delfim de Sá hala’o misaun edukasionál liu hosi hanorin frater no diakonu sira iha Institutu Superior de Filosofia no Teolojia (ISFIT).
Iha tempu feriadu, Padres Augusto Assunção passa tempu hodi ba vizita ninia sarani sira ka bibi sira iha Parokia Nossa Senhora Ranha dos Apóstolus de Luro hodi kumprimenta, haree, no enkoraja sira.
Molok ba vizita ninia bibi sira, Bibi Atan Di’ak (Pe. Augusto Assunção) ne’e tuir bus ida diresaun Dili-Luro, husi viajem ho distánsia ne’ebe dook, estrada aat no klima nia manas, nia sempre hatudu ninia pasiénsia, koragem no fuan boot hodi ba haree ninia sarani sira iha Luro.
Bibi Atan Di’ak ne’e hala’o ninia misaun sai padre pároku Luro hodi tau matan, servi no bali ninia bibi sira iha Parokia Luro hahú iha tinan 2017 no remata iha tinan 2023, hafoin entrega mandatu ba Padre Tiago Soares da Costa iha loron 26 Fulan Fevereiru Tinan 2024.
Wainhira Padre ne’e hala’o misaun iha Luro, dala barak tebes nia la’o ain hodi sa’e foho, tun foho, hakur mota, la’o iha loron manas, la’o dalan dook maibe nia sempre ba hodi hala’o misaun pastoral liu hosi fo sakramentu baptismu, konfesa, mina sarani, kazamentu no lori Maromak futar liafuan ba sarani sira.
Sarani Luro, Luis dos Santos hateten Padre Augusto Assunção nia Padre ne’ebe simples, haraik an, pasiénsia, kalma, laran badinas, domin na’in ne’ebe sempre hakbesik an ba sarani sira hodi rona no enkoraja ninia bibi sira.
“Padre Augusto Assunção, Nia Padre ne’ebe nakonu ho simplesidade, humildade, pasiénsia, fuan boot no hadomi ninia sarani sira, maske nia dook ona hosi sarani sira maibe nia sempre passa tempu hodi mai haree ami, ami orgullu tebes ba nia domin no ami nunka haluha ninia ezemplu sira”. Tenik Luis dos Santos ba SAPNews iha Luro, 13/11/2024
Luis dos Santos hatutan, Padre Augusto nunka dehan liafuan lae ba ninia sarani sira wainhira husu ninia disponibilidade no presenza iha Luro, Nia la lakon vontade hodi kontinua ba haree ninia sarani sira.
“Padre Augusto mai Luro ho bus iha loron 11 Novembru hodi hatan ba konvite Madre Kongregasaun Santa Ana ninia konvite ba inaugurasaun konventu nian, iha loron 12 Novembru dader nia selebra misa ho joven sira hodi komemora 12 Novembru liu hosi halo misa, sunu lilin no kari ai-funan iha Jardim dos Herois Luro”.
“Hafoin selebra 12 Novembru, nia hamutuk ho Padre no Bispu Dioseze Baukau Dom Leandro Maria Alves inaugura Konventu Kongregasaun Irmã Santa Ana iha Amaira, Luro-Lautém, Hafoin inaugura iha loron 13 Novembru nia fila hikas ho bus ba Dill”. Luis dos Santos sublinha
Padre Augusto Assunção hatudu duni ninia gradeza ezemplu desde nia sai Padre Pároku iha Luro, la’o ain no hatudu ninia simplesidade hodi servi sarani sira.
“Padre Augusto Assunção hatudu ninia ezemplu boot, diferente no úniku iha ninia jornada serví nian, ezemplu ida ne’e presiza sai lisaun ba sarani sira hodi banati tuir tanba nia halo buat ne’ebe la’os ema barak halo, la’o la sura kolen, la sukat ninia dook ka besik, iha ema barak ka uituan, nia halo buat hotu tanba nia hadomi ninia sarani sira, ha’u fo agradese ba nia laran diak”. Luis agradese
Durante iha Luro, sarani sira ho laran ksolok, oin midar no kumprimenta Padre Augusto Assunção, tara tais, hasai foto hamutuk ho nia. Wainhira nia ho bus fila ba Dili, ninia sarani sira ho laran triste hodi kaer liman no fo boa viajem ba nia.
Padre Augusto Assunção Delfim de Sá ne’e orijem hosi Munisipiu Baukau, oras ne’e hala’o misaun iha Institutu Superior Filosofia no Teolojia (ISFIT) hodi hanorin Frater no Diakonu sira.
Jornalista : Januario Pinto