Gruta Fatin Ne’ebe Hakmatek, Ema Barak Ba Reza & Hahí Maromak

SAPNewsTL, Dili – Gruta Nossa Senhora Kampu Baru, lokaliza iha Parokia Nossa Senhora Auxiliadora Comoro, Dom Aleixu, Kapitál Dili. Fatin ne’ebe hakmatek no kada loron ema barak ba vizita hodi reza no hahí Maromak liu husi Inan Maria.

Hafoin vizita Gruta Inan Maria, visitor Marciana da Conceição hateten, gruta ne’e fatin ne’ebe silénsiu no dook husi barullu, fatin ne’ebe ema barak sempre ba hala’o sira nia vizita hodi reza, halo reflesaun, fo agradese ba Na’i Maromak.

“Ha’u sempre mai vizita fatin ne’e, gruta ne’e fatin ne’ebe hakmatek, silénsiu no dook husi barullu, gruta ne’e ema barak sempre mai vizita, mai reza, hahí Maromak, agradese ba Maromak no hakbesik an Aman Maromak”. Tenik Visitora Marciana da Conceição ba SAPNews iha Gruta Comoro, 21/07/2024

Visitora ne’e hatutan, wainhira mai vizita gruta, nia sente hakmatek, laran kmaan, sente livre no iha motivasaun boot atu hakaas an no aprende barak liu tan hodi hasoru laloran moris iha loron aban bainrua.

“Wainhira ha’u mai reza, ha’u sente hakmatek, sente livre, iha motivasaun boot liu tan inklui esperansa, hakarak aprende barak liu tan, oinsa prepara an hodi hasoru laloran moris ka dejafiu moris ne’ebe sei mai iha oin, entaun ha’u sente kontente mai vizita beibeik fatin sagradu ida ne’e”. Marciana da Conceição subliha

Marciana dehan, iha tempu ba servisu, tempu ba eskola, tempu ba kursu, tempu ba biblioteka, tempu ba halimar, tempu akompanha facebook, youtube, tiktok, no instagram maibe presiza mos maneja tempu hodi hakbesik an ba Maromak.

“Ita presiza aproveita moris ne’e hodi halo buat ne’ebe diak no los ba ema seluk, ita presiza fo tempu ba Maromak, laos deit ita iha tempu ba eskola, servisu no halimar sosial média, maibe presiza jere ho diak tempu ne’e tanba tempu ne’e lais no badak ba ita, kada minutu ita tenki uza hodi halo diak no halo istória ne’ebe furak hodi rai”.

Nune’e, ema ida-idak labele sente mesak, moris iha pressaun nia laran, moris sente la livre, moris laiha esperansa no moris iha nakukun nia laran, moris ne’e tenki kontente no moris ne’e diverte aan, tanba tempu moris ne’e lais no badak.

“Ita presiza moris ho koragem, motivasaun, fiar no esperansa, moris ne’ebe besik liu tan ba Maromak, nune’e moris ne’e labele hela iha nakukun laran, moris tenki kontente no iha paixaun ba futuru”. Marciana dehan

Tuir observasaun Jornalista SAPNews iha terenu nota katak kada loron ema barak sempre ba hala’o sira nia vizita ba fatin ne’e hahu husi dader to’o kalan, entre sira maioria foinsa’e sira.

Iha resintu gruta, iha mos kuadru avizu ne’ebe ko’alia kona ba silénsiu, soe foer iha foer fatin no regra hatais, maibe sei iha ema balun ne’ebe soe foer la tuir nia fatin.

Jornalista : Dircia Baptista Belo