Hafoin Husu Deskulpa Ba UNITAL ! Naimori Fo Segredu Vitória 3 Ba Estudante Sira

SAPNewsTL, Dili : Relasiona ho deputadu Bankada KHUNTO Luis Roberto ne’ebe kestiona kualidade Universidade privadu sira iha territóriu Timor laran tomak no foti Universidade Orientál Timor Lorosa’e (UNITAL) sai ezemplu, Konseleiru Supremu Partidu KHUNTO José dos Santos Naimori Bucar deklara deputadu refere iha direitu atu ko’alia maibe la lori partidu nia naran.

Marciana da Conceição – SAPNews TL

Konseleiru Supremu Partidu KHUNTO José dos Santos Naimori Bucar lori partidu nia naran no estrutura tomak husu perdaun ba UNITAL relasiona ho deklarasaun deputadu Luis Roberto maibe deputadu ne’e la lori partidu nia naran tanba laos xefe bankada.

“Ha’u lori Partidu KHUNTO ho estrutura tomak husu deskulpa kona-ba deputadu Luis nia deklarasaun ne’ebe kontra UNITAL, ne’e la lori partidu tanba nia laos xefi bankada, nia pesoal hanesan deputadu iha direitu atu ko’alia maibe la lori partidu, nune’e ha’u husu deskulpa ba estudante, reitor no dosente sira iha UNITAL”. Dehan Konseleiru Supremu Partidu KHUNTO José dos Santos Naimori Bucar iha Manleuana 28/06/2025.

Konseleiru Supremu Partidu KHUNTO ne’e salienta, sira kurije oinsa maka defende no hadia sistema edukasaun iha universidade hotu-hotu, nune’e ida ne’ebe la diak tur hodi buka solusaun.

“Ami partidu KHUNTO kurije, oinsa atu defende no hadia sistema edukasaun iha kualker universidade, tanba ne’e ita nia alin no bei-oan sira maka eskola iha ne’eba, diak ka aat ita presiza tur hamutuk oinsa bele hadia”.

Naimori Bucar enkoraja estudante iha UNITAL nafatin forte no fiar aan hodi aprende tanba matenek ne’e mai husi lee no ko’alia barak, hafoin sai koñesidu.

“Ba estudante sira iha UNITAL forte no fiar aan nafatin, tanba matenek ne’e iha buat rua deit kuandu hakarak matenek tenke lee no koalia barak, ne’e nia koñesidu lalais deit”. Nia subliña.

Nia hatutan, “Maibe kbiit laek sira hakarak matenek, ba eskola karik tenke uza buat tolu ; pasensia la’o, pasensia kesi kabun (hamlaha) no pasensia estuda, tolu ne’e mak imi halo tuir imi sei ultrapasa buat hotu no sai matenek, maibe hakarak ema koñese imi maka tenke ko’alia no lee barak, buat lima ne’e mak imi halo ona konseteja imi konkista vitoria, servisu hanesan atan han hanesan liurai”.

Antes ne’e, estudante Universidade Orientál Timor Lorosa’e (UNITAL) realiza konferénsia imprensa hafoin asesu deputadu husi bankada KHUNTO Luis Roberto nia intervensaun iha Parlamentu Nasional (PN) iha loron 09 de junhu 2025 inklui segunda feira 16 de junhu 2025 kona-ba universidade privadu nia kualidade iha teritóriu Timor laran tomak no foti UNITAL sai ezemplu hodi konsidera universidade privadu balun laiha kualidade.

Iha afirmasaun deputadu Luis Roberto dehan ba Ministru Assuntu Parlamentares no Vise Presidente Parlamentu Nasional, inklui deputados sira, observador sira liliu ba media kona-ba kualidade universidade privadu sira iha teritoriu Timor laran tomak.

“Ami estudante ativu hakarak husu lolos ba deputado Luis Roberto tenki aprezenta dadus no evidensia justu no kredivel mai ami problema sira ne’ebe maka deputadu mensiona iha plenaria;

1. Deputadu Luis Roberto hateten katak UNITAL simu estudante foun la priense rekezitus hanesan la iha diploma sekundaria maibe Universidade husu de’it deklarasaun ofisial husi autoridade suku.

2. Deputado Luis Roberto hateten katak Funsionariu balun hatama estudante la tuir prosesu administrativa maibe fasilita estudante semester I hakat liu ba semester III ou V.

3. Deputado Luis Roberto hateten Funsionariu balun pratika mal admistrasaun no irregularidade iha UNITAL liuliu Fakuldade Cispol Departamento Administrasaun Públika.

4. Deputado Luis Roberto hateten mos Simu informasaun husi estudante no funsionáriu balun iha nia residensia, no estudante balun la eskola mai tama iha Universidade hodi pasa ba semester III-IV.

Deputadu Luis Roberto tenke “Responsavel ninia liafuan ida husi exemplo universidade privadu hanesan UNITAL la iha qualidade”.

“Ami estudante aprende iha Universidade Privadu UNITAL, tamba kondisaun mak obriga, tan ne’e estudante UNITAL dehan :

1. Ami ezise ba deputadu Luis Robertu tenki hatudu dadus komprovativu hanesan ema la iha diploma sekundario bele asesu iha UNITAL no mos hateten katak estudante balun la tuir prosesu adiministrativa, sira hakat liu deit semester husi (1) ba de’it (5) no funsionáriu balun pratika mal adımmistrasaun.

2. Ami Estudante ativu nakloke ba deputadu Luiz Robertu uza ninia kompentesia nomos Funsaun Deliberativa, Debate públiku ho ami estudante sira.

3. Ami husu Deputadu Luis Roberto bele define ninia polítika ida kualidade akadémiku tuir méritu ba modelu universidade ne’ebe kualidade.

4. Ami husu ba Ministério Ensino Superior Ciência e Cultura nomos ANAAA atu bele halo Seminario Sentifiku hodi bele elabora Evidencia Prosesu Akreditasaun ba Prosesu husi relatorio anual.

5. Ami estudante ativu husu ba ministeiro Ensino superior no ANAA bele haree mós ba problema sira ne’ebe mak akontese iha Universidade parte ANAAA presiza justitika didiak, se wainhira akontese hanesan ne’e tamba saida mak liu husi reakreditasaun instituisional kada tinan Universidade sempre hetan valor B.

6. Ami estudante ativo husu mós ba fundasaun FUNATIL, atu bele haree ba problema sira dadaun ne’e deputadu toka iha parlamentu nasional ne’ebe sai polemika iha media sira atu bele kontrola maximu hodi hahoris kualidade di’ak ba ema hotu ba futuru.