Halibur Joven Sira, Komunidade Wairoque Kria Jogu Amizade
Imagen : Xefe Komisaun Organizadora ba eventu jogu amizade Auxilio Pascal dos Santos iha Kampu Futebol Wairoque, 14/12/2025
SAPNewsTL, Lautem: Komunidade Suku Wairoque Postu Administrativu Luro Munisípiu Lautem hala’o jogu amizade hodi hametin unidade, paz no estabilidade hodi evita problema iha Suku.
Iha entrevista ho Komisaun Organizadora ba jogu amizade, Auxilio Pascal dos Santos hateten jogu amizade ne’e realiza atu hametin unidade liuliu ba jovens sira tanba desportu nu’udar dalan ida atu hametin amizade iha Suku.
“Objektivu prinsipal ba realizasaun jogu ida ne’e atu hametin amizade entre ami komunidade Suku Wairoque iha Aldeia lima ida ne’e liu-liu ami juventude sira tanba ita iha diferensa entaun ita buka meius ida para liu husi aktividade desportu ida ne’e bele hametin amizade “. Dehan Xefe Komisaun Organizadora ba eventu jogu amizade Auxilio Pascal dos Santos hafoin remata jogu abertura iha Kampu Futebol Wairoque, 14/12/2025
Xefe Komisaun ne’e husu ba jogador sira atu pasiensia iha jogu tanba importante iha jogu ne’e mak atu hametin amizade.
“Jogador sira tenke pasiensia tanba iha jogu nia laran ne’e sempre iha naksalak ne’ebe tenke pasensia simu malu tanba prinsipal husi jogu ne’e atu mak hametin amizade no fraternidade”. Auxilio hato’o
Iha fatin hanesan, Xefe Suku Wairoque Augusto Marques haktuir jogu amizade ne’e kria atu halibur joven sira entre Suku Wairoque hodi hametin unidade no hado’ok sira husi konflitu.
“Ami realiza jogu ida ne’e tanba objektivu hakarak hametin unidade entre joven sira, ami hakarak iha paz no estabilidade tanba ne’e ami halibur joven sira liu husi jogu ne’e atu evita para problema labele akontese iha Suku”. Tenik Xefe Suku
Xefe Suku ne’e mos hameno “Jogu ne’e ita nian, ita tenke hametin ita-nia unidade, amizade no tau iha imi-nia fuan katak nasaun ne’e ita nian, Lautem ita nian, Luro ita nian, espesialmente Suku Wairoque ne’e ita nian, mai ita hamutuk unidade hodi lori jogu ne’e to’o final”. Katak Augusto
Nune’e mos jogador husi Klubu Sakisi Constantino da Gama agradese ba inan aman ho autoriedade sira ne’ebe ho inisiativa bele loke amizade ida ne’e hodi bele halibur jovens sira iha Suku Wairoque atu hametin liu tan lasu amizade entre joven sira.
“Nu’udar jogador agradese ba inan aman sira no autoriedade sira ne’ebe bele halibur joven sira liu husi jogu amizade ida ne’e atu hametin liu tan lasu amizade entre joven sira iha Suku Wairoque”. Nia agradese
Entretantu, iha aktividade jogu amizade ida ne’e iha modalidade rua hanesan jogu futebol no voleibol iha ne’ebe jogu futebol iha klubu sanulu resin ida no jogu voleibol iha klubu sanulu resin rua ba ekipa feto no ekipa mane.
Enkuantu, jogu amizade ida ne’e hetan kontribuisaun finanseira husi komunidade no autoridade Suku Wairoque.