Halo Tinan XXV ! Membru PNTL Hamutuk 2.764 Hetan Promosaun Diviza

Imajem : Primeiru Ministru Kay Rala Xanana Gusmão tau promosaun diviza ba membru PNTL iha Palásiu Governu, 27/03/2025. Foto : Augusto dos Santos

SAPNewsTL, Dili : Membru Polísia Nasionál Timor-Leste (PNTL) hamutuk 2.764 hetan promosaun diviza iha ámbitu komemorasaun ezisténsia PNTL ba dala XXV ne’ebe ho tema “Hamutuk Ita Hametin Konfiansa”.

Primeiru Ministru Kay Rala Xanana Gusmão fo arabens ba membru PNTL hothotu inklui kondekoradu 2.764 ne’ebé hetan promosaun diviza, hafoin tinan 25 ezisténsia PNTL.

“Serimonia ne’e atu rekunhese no promove kultura instituisionál ida ne’ebé valoriza, koragem, dixiplina, no sakrifisiu ba servisu hodi garante no hametin kapasidade polísia nian, esforsu nasionál ida ne’ebé akontese mais de 2.764 polísia mak hetan promosaun”.

“Nune’e bele transforma estrutura PNTL nian, promosaun ne’e iha kritériu ne’ebé rigorozu no superviziona husi komisaun independente ne’ebe livre husi kualker influensia karater polítika no sosial inklui artes marsial”.Tenik Primeiru Ministru Kayrala Xanana iha Paládiu Governu,27/03/2025

Iha fatin hanesan, Komisáriu Jeral PNTL Henrique da Costa haktuir PNTL nia tema aniversáriu maka hamutuk hametin konfiansa katak servisu hamutuk ho entidade hotu hodi fornese atendimentu diak no hetan konfiansa husi povu.

PNTL sei kontinua dedika an hodi servisu ho kompromisu motivasaun aas, enejia, espíritu misaun no sai fonte solusaun ba problema sira.

“Aniversariu tinan ne mai ho nia lema ‘hamutuk hametin konfiansa’ ninia sentidu katak PNTL presija servisu hamutuk ho entidades hotu, komunidade, jovens, feto no mane, veterano, lider relijiozos, eskola, lider komunitariu sira, nune’e ita bele fornese atendementu nebe diak no lais hodi hetan konfiansa husi povu”.

Komisáriu Jeral ne’e dehan, “Ita tenki unidos iha Instituisaun nia laran, disiplina, lealdade, hodi rona deit ba hirarquia komando, labele mete ba politiku sira nia servisu, labele mete tan grupu arte marsiais no arte ritual sira, tamba ita halo juramentu bebeik ona maibe komunidade sei nafatin koalia kona ba ita nia neutralidade ba atendemento sira iha terreno”.

“Komandante sira tenki inovativu, buka aprende barak hodi kria atividades sira tuir 5 prioridades Komando nian iha ida idak nia komando”.

Estatistikamente, relatóriu kona-ba krime tun uitoan iha tinan kotuk 2024, kompara ho tinan kotuk liu ba 2023, maibe nafatin iha nivel preokupasaun ema hotu nian e problema hirak ne’e labele haree hanesan simples deit, maibé tenke hetan aprosimasaun husi perspetiva multidisciplinaria no envolve Governu, instituisaun seluk no komunidade sira hodi prevene no kombate.

Asidente viasaun nian mos halakon vida atus ida liu iha tinan 2024, ne’ebe kauza husi ema, infraestrutura hanesan estrada no sinais sira, e fator naturesa. PNTL tau ida ne’e ba atensaun as hodi desenha programa sira prevensaun nian, edukasaun sivika, aplika lei ho forti ba autor sira. Iha parte seluk mos bele kontribui rendimento ba estado liu husi aplika multa sira. PNTL halo ona koordenasaun ho parseiro sira atu implementa programa ida ne.

“Ita labele sente orgullu ba buat ne’ebé ita mane ka feto sira halo ona ba seguransa iha nasaun ne’e, ita hatene katak ita sei iha dalan ne’ebe naruk atu perkore ba buat hirak nebe seidauk realiza, atu halo ida-ne’e, ita presiza rezolve kestaun balun: iha área Rekursu Umanu, exemplu, rekrutamentu ajente foun no promosaun”.

Komandante PNTL ne’e parabeniza membru sira ne’ebé 68% hetan promosaun diviza no husu atu asume responsabilidade, respeitu malu, unidade, kamaradagem no lealdade ba superior sira.

“Ohin ita ita halao promosaun Transitorio ba membro sira hotu e kuaze 68% benefisia ba promosaun refere. Parabems ba imi hotu. Divisa no farda ne’ebe ita usa ne’e povu nian. Responsabiliza ba divisa ne’ebe imi simu. Komandu sei jere hodi koloka imi ba asume kargo iha ne’ebe deit iha Timor Leste”.

“Balun uluk sai hanesan kondutor deit dala ruma nia sa’e liu fali nia komandante. Ita tenki simu mos realidade ida ne’e. Ida ne mak ita bolu katak mudansa. Hatudu nafatin imi nia disiplina, respeita malu, kamaradagem, unidade, lealdade ba superior sira”.

Promosaun ida ne’e fo mos servisu bot ida ba Komando atu nune’e kria formasaun ne’ebe adekuadu ba, oinsa bele ajuda sira hodi asegura divisa foun ne’ebe sira simu.

Henrique da Costa husu membru sira hotu hodi presta servisu no atendimentu ne’ebé kualidade ba populasaun sira, nia mós fo agradese ba nonu governu ne’ebé lidera hosi Primeiru Ministru Kayrala Xanana Gusmão tanba bele tau matan nafatin ba PNTL.

“Tau iha ita hotu nia neon katak populasaun sira ijiji atendementu Polisia nian ho profesional, signifika katak ita tenki hadia kualidade ita nian. Hau fiar katak ho apoiu governo nian no kbit ne’ebe PNTL iha, ita bele asegura kualidade atendementu, obrigado ba Nonu Governo konstitusional partikularmente aman nasaun nia Primeiru Ministru RDTL ne’ebe sempre tau matan ba PNTL”.

“Ha’u kontinua konta ho imi atu ita iha unidade ida ne’ebe forte e servisu hamutuk, Unidade bele sai forsa ida deit hodi asegura nasaun no povu Timor Leste. Povu Timor Leste sei apoio ita, Nai Maromak sei nafatin tulun ita hotu hodi halo servisu ho lolos no hadok PNTL no Timor-Leeste husi hanoin aat sira”. Nia hakotu

Serimonia aniversáriu PNTL ba dala 25 ne’e promove divisa ba membru PNTL hamutuk rihun rua atus hitu neenulu resin haat (2.764) no hetan partisipasaun maksimu husi konvidade internasional, nasional membru PNTL no familia PNTL.

Jornalista : Ekipa Kobertura