Hametin Eransa Kultural ! Família Inaugura Uma-Lulik Coronel Lua-Homar
Imajem : Lia Na’in Mateus dos Santos & Uma lisan Tenente Coronel Pupulu Lua-Homar Iha Postu Administrativu Luro Munisípiu Lautem, 9/08/2025.
SAPNewsTL, Lautem : Familia uma lisan Tenente Coronel Pupulu Lua-Homar hala’o inaugurasaun no bensaun kultural ba sira-nia uma-lulik hodi rai sasan lulik sira nu’udar mos mahon hodi hamahan sira husi jerasaun ba jerasaun.
Iha intrevista ho Lia Nain husi Uma Lisan Tenente Coronel Pupulu Lua-Homar Mateus dos Santos informa “Uma-Lulik ne’e halo atu rai sasan lulik, ohin ami bensa ona tuir kultura, ami simu ona matak no malirin”.
“Ami halo ida ne’e atu aban bainrua oan no bei-oan oan sira bele moris iha jerasaun ba jerasaun tanba ne’e mak ami halo uma lulik ida ne’e”. Dehan Lia Nain Uma Lisan Tenente Coronel Pupulu Lua-Homar Mateus dos Santos liu husi nia intrevista iha fatin uma Lulik Ussufaço, Suku Baricafa Postu Administrativu Luro Munisípiu Lautem, 9/08/2025
Lia-Nain ne’e aumenta, uma lulik ne’e nu’udar mos mahon no sentru ida ba sira ne’ebe lisan ida inklui mos sira-nia jerasaun sira hodi bele halibur wainhira hala’o serimonia kultura tuir lisan.
“Uma-lulik ida ne’e nu’udar mahon ida mai ami familia sira no mos ba ami-nia jerasaun, halo ida ne’e hanesan fatin ida atu halibur ami familia sira husi lisan ida nian bele hamutuk wainhira ami hala’o ami nia serimonia kultural ruma”. Tenik Mateus
Mateus mós fundamenta, “Uma lulik ne’e hafurak ho pintura simbolu sira hanesan manu sira ne’ebe tur iha uma kakuluk leten ne’e katak uluk bizavon sira tur iha manu ne’e nia leten mak lori sira-mai tanba ne’e tau sinal sira ne’e, pintura sira husi balada sira ne’ebe iha didin sira ne’e nu’udar forsa husi uma-lulik ida ne’e rasik”. Dehan Nia
Iha fatin hanesan, familia Uma Lisan Pupulu Lua-Homar Lamberto Soares hateten, “Ita hamutuk iha ne’e, la seluk no la le’et, ita familia hotu, tanba ita halo uma lisan ida ne’e mak ita bele halibur malu, husi ne’e ita bele kuñese malu”.
“Ita familia husi lisan ida ne’e nian barak ona husi jerasaun ba jerasaun, balun ita la kuñese malu maibe ohin uma-lulik ne’e hamrik bolu ita hamutuk hodi ohin ita bele kuñese malu”. Katak Lamberto
Lamberto mos agradese ba familia sira hotu nia apoiu no kontribuisaun hotu hodi bele hari’i uma lisan no bele finaliza.
“Agradese teb-tebes ba familia sira hotu, matebian no bizavon sira-nia espiritu fo nia hanoin no matenek ne’e laos hakerek maibe koalia deit, nune’e ita halo tuir mak ohin loron uma-lisan Tenente Coronel Pupulu Lua-Homar hamrik, husi familia hotu nia apoiu, kontribui maka ita bele hari’i maske ho ekonomia ne’ebe natoon maibe neineik bele finaliza no ohin ita bele inaugura”. Nia hato’o
Entretantu, konstrusaun uma lulik Tenente Coronel Pupulu Lua-Homar ne’ebe lokaliza iha Suku Barikafa ne’e hari’i durante tinan ida, hahu iha tinan 2024 no finaliza iha fulan Augustu tinan 2025.