Hametin Kooperasaun Bilateral ! Espanol Iha Komitmentu Apoiu Adezaun TL Ba ASEAN
Imajem : Embaixador Espanol iha Timor-Leste Francisco De Asis Aguilera Aranda iha Palasiu Prezidensial Nicolau Lobato Aitarak-laran, Quarta (12/03/2025).
SAPNewsTL, Díli — Hametin kooperasaun bilateral entre Timor-Leste ho nasaun Espanol, Prezidente Repúblika (PR) José Ramos Horta audiénsia ho Embaixador Espanol iha Timor-Leste Francisco de Asis Aguilera Aranda hodi diskute relasaun amizade entre nasaun rua.
Embaixador Espanol iha Timor-Leste Francisco De Asis Aguilera Aranda hateten, durante reuniaun parte rua diskute kona-ba hametin kooperasaun bilateral entre nasaun rua ne’e, hodi reforsa Timor-Leste nia prosesu dezenvolvimentu no adezaun ba ASEAN.
“Iha enkontru ne’e ami troka ideia ba malu hodi hametin amizade entre Timor Leste no Espanol”. Dehan Embaixador Espanol iha Timor-Leste Francisco De Asis Aguilera Aranda ba Jornalista
sira, hafoin remata enkontru ho PR iha Palasiu Prezidensial Nicolau Lobato Aitarak-laran, Quarta (12/03/2025)
Embaixador Espanol aprofunda, nasaun Espanol iha komitmentu atu hametin kooperasaun bilateral entre nasaun rua ne’e hodi apoiu Timor Leste ba desenvolvimentu iha futuru no mos Espanol nia apoiu ba Timor hodi hametin relasaun ASEAN no bele servisu hamutuk iha institusaun Multilateral sira, nia afirma.
Iha sorumutu ne’e Embaixador Espanol partilha ba Prezidenti Repúblika José Ramos Horta hodi husu disponibilidade PR nian atu bele partisipa iha komferensia finanseiru internasionál nivel altu ne’ebe sei hala’o nasaun Espanol.
“Iha enkontru ne’e mos ami diskute kona-ba Presidente Horta nia vizita ba Espanol hodi partisipa konferénsia finanseiru ba Desenvolvimentu iha Espanol, entaun PR sei aranka ba espanol hodi partisipa konferénsia kona ba finansiamentu ba desenvolvimentu iha Sevilha” Nia hakotu.
Jornalista: Vinsensius Saldanha Morais De Araujo
