Hametin Kooperasaun Externa ! PR Horta Fo Posse Ba Idelta & António Sai Embaixador
Imajem : Prezidente Repúblika José Ramos Horta hamutuk Embaixadora Nova Zelândia Idelta Maria Rodriguês no Embaixador Repúblika Coreia António de Sá Benevides iha Palásiu Prezidensial, 12/08/2024. Foto : Média PR
SAPNewsTL, Dili – Prezidente Repúblika José Ramos Horta fó tomada de posse ba Embaixadór foun Timor-Leste nian ba Nova Zelándia no Koreia-Súl, iha Palásiu Prezidensiál Nicolau Lobato.
Idelta Maria Rodriguês simu pose nu’udar Embaixadór Estraordináriu no Plenipotensiáriu Repúblika Demokratika Timor-Leste nian ba Nova Zelándia.
Rodriguês lori esperiénsia boot iha dezenvolvimentu sosiál, igualdade jéneru, no polítika públika ba ninia knaar foun. Nia karreira inklui kargu nu’udar Feto dahuluk ba Sekretáriu Estadu ba Promosaun Igualdade no nu’udar Konselleira Prinsipál ba Vise-Primeiru Ministru.
António de Sá Benevides simu pose nu’udar Embaixadór Estraordináriu no Plenipotensiáriu Repúblika Demokratika Timor-Leste nian ba Repúblika Koreia.
Benevides iha karreira distintu iha edukasaun, dezenvolvimentu internasionál, no servisu públiku, inklui knaar sira hanesan Membru Parlamentu Nasionál no Konselleiru Tékniku ba Ministériu Petroliu no Rekursu Naturais.
Prezidente Ramos-Horta hato’o ninia konfiansa ba nomeadu foun sira, hodi kontinua hametin liután relasaun amizade no kooperasaun ba pasís Nova Zelandia no Corea Sul.
“Ha’u iha konfiansa tomak katak Embaixadóra Rodriguês no Embaixadór Benevides sei reprezenta interese ita-nia nasaun nian no sei hametin liutan lasu amizade no kooperasaun entre Timor-Leste ho Nova Zelándia no Koreia-Súl respetivamente.”Tenik Prezidente Repúblika José Ramos Horta liu hosi nia diskursu iha Palásiu Prezidénsia Aitarak-Laran,12/08/2024
Prezidente dezeju susesu ba Embaixadór foun sira hodi hametin liután relasaun ho parseiru rejionál importante sira no promosaun ba interese sira Timor-Leste nian iha rai-li’ur.
Asisténsia kooperasaun anuál Nova Zelándia nian to’o besik 21 milliaun NZD, fó apoiu ba área sira hanesan edukasaun, agrikultura, polísia komunitária, turizmu, no produsaun kafé.
Estadu Nova Zelándia no Koreia-Súl sai ona parseiru importante iha dezenvolvimentu Timor-Leste nian dezde independénsia.
Koreia-Súl fó ona apoiu signifikativu liuhosi misaun manutensaun paz ONU nian, interkâmbiu diplomátiku, akordu komérsiu, no kooperasaun iha setór oin-oin, inklui programa KOICA no Sistema Autorizasaun Empregu.
Jornalista: Antonina lopes da silva& Eleonora Fatima dos Santos